المرة دى يااصدقائى حنطلع شوية من الجنوب الى اقصى الشمال الى فنلندا وهى دولة صغيره فى الجزء الشمالى اوى من اوروبا وذهبت اليها فى رحلة عمل ايضا فى توقيت شتوى جدا فى شهر ديسمبر الرحلة استغرقت طيران حوالى 9 ساعات مابين طيران الى امستردام ( ام ستردام ) على راى عادل امام ثم الإنتظار فى مطارها ساعتين ثم طيران الى هلسنكى المهم كانت الساعه المفروض حوالى 3 ظهرا نزلنا من الطائرة ظلام دامس ايه ياخونا هو فيه ايه احنا ظابطين الساعة غلط ولا ايه قالولنا لا هو كده الظلام هنا فى الشتاء 20 ساعة والصبح والنهار يادوب 4 ساعات وكمان شمس تشبه المغربية عندنا طبعا درجة حرارة 5 تحت الفر والناس هناك مبسوطين جدا ليه ؟؟؟ لان دى بالنسبه ليهم صيف لان المعتاد درجات حرارة من اول عشرة تحت الصفر وانت نازل المهم طبعا ثلج او سنو زى مابيقولوا بلد طبعا نظيفه تماما ولكن كئيبة شوتين تخيل انك تصحى من النوم الصبح تفطر فى الظلام وتروح شغلك والدنيا لسه ضلمه تشوف الشمس يمكن ساعة واحده ساعة الراحة او تخرج بره المبنى علشان تدخن سيجارة ترجع شغلك تيجى ساعة الإنصراف ظلام شوبنج فى الظلمه غدا فى الضلمه ايه دا اكتئاب ايه دا قالولنا ايه بقى فى الصيف العكس صحيح يعنى النهار 20 ساعة والليل 4 ساعات يعنى تتعشى فى النور ايه ياخويا اللخبطه دى المهم طبعا بعيد عن الجو والشمس بلاد طبعا كلها خضار من اللون الأخضر وحمار فى الوجوه من اللون الأحمر وصفار فى الشعور من اللون الأصفر طبعا الهجرة فى البلاد دى محدوده جدا علشان كده شوارع فاضيه تماما كأنك فى بلد مهجور اللى جاء فى بالى ساعتها طيب الناس فى فنلندا دلوقتى بيصوموا ازاى فى رمضان - الشئ بالشئ يذكر- يعنى بيصوموا فى الصيف حوالى 20 ساعة والشتا يادوب 4 ساعات حكمة ربنا المهم بقى ان فنلندا معروفه انها بلد تليفون النوكيا الغريبه جدا ان كل الناس بيستعملوا فيها تليفونات اريكسون ودورت على محلات نوكيا اشترى بطاريه اصليه لتليفونى ملقتش .
كمان المأموريه اللى كنت فيها ال ايه تخص حماية البيئة وطبعا انا مشفتش عندهم اى نوع من التلوث اللهم التلوث النفسى من موضوع النهار والليل وتشعر ان الناس عندها اكتئاب شويه بلد تقريبا مفيهوش مشاكل ودى يمكن المشكلة الكبيره عندهم ان الناس عايشه من غير مشاكل مفيش بطاله لان اصلا مفيش ناس المكاتب مفروشه مستنيه الموظفين مستوى مادى عالى جدا جمال طبيعى فى كل شئ هدوء غريب مفيش كلاكسات ( الصورة المرفقة المفروض انها ساعة ضهرية )( يعنى قارنوا بين زحمة الظهر عندنا وعندهم ) اللى عايز حاجة بيعملها علشان كده مفيش مشاكل ودا اللى بيخليهم تقريبا ينتحروا لانهم مش عارفين هما عايشين ليه بس عموما بلد نظيفة وبتكلموا عن نظافة البيئة يعنى متهيألى لو واحد منهم زار مصر وراح منشية ناصر مثلا اعتقد انه ساعتها حينتحر بجد وطبعا فنلندا هى احد الدول المكونه للفايكنج - محاربى الشمال علشان كده اثار كتيره اوى للفايكنج عموما دى كانت ملاحظاتى لان الزيارة كانت يادوب 4 ايام منهم يومين سفر والى حلقة قادمه ان شاء الله
الدكتورة نور فى تعليقها على أخر اصدار ليه اوصتنى ان اتحدث عن البلاد التى زرتها ، وانا لا أدعى انى كاتب من كتاب أدب الرحلات ولكنى سأحاول ان اعرض الدوله كما رأيتها وسأبدأ بالسودان ولكن لماذا السودان ؟ قد يكون لانها أهم دولة لمصر أو لانها امتداد طبيعى لنا وربما ايضا للعلاقة التاريخية الطويلة وربما لكل تلك الأسباب الا انى فى النهاية رأيت أن أبدأ بها . لقد زرت السودان فى مهمة عمل استغرقت 5 أيام وللعلم فان السفر الى السودان لايحتاج الى تأشيرة دخول اليها من مصر فقط الدخول بجواز السفر وكان معى فى الوفد أحد علماء مصر فى الزراعه والذى يزور السودان سنويا وكان أول ماقاله لى أنى سوف اجد مفاجأه فى التطور الذى تشهده السودان - طبعا انا لم ازر السودان قبل ذلك وبالتالى فمشاهدتى لما رأيته لم استطع مقارنته بما كانت عليه السودان من قبل ولم اشاهده ولكنى رأيت العديد من الظواهر منها أن المواصلات الرئيسية فى السودان هى التك توك بمعنى رأيت مايزيد عن 10000 توك توك فى الطريق ورأيت ايضا طرقاً ممهدة تضاهى ماشاهدته فى اوروبا فى بعض منها رايت ايضا تغييرا فى سلوكيات الإنسان السودانى عما سمعت عنه فى الماضى نشاطا وهمه بل ومستوى تعليمى وثقافى مرتفع رايت ان الجنيه السودانى يساوى 3 جنيه مصرى !!!!؟؟؟؟ ازاى مش عارف رايت حركة عمران ضخمة صحيح كل ذلك فى العاصمة الخرطوم ولكنه ينبئ باحتمال تطور اقتصادى كبير رايت حركة بناء ضخمة فى انشاء اكبر مطار فى افريقيا جنوب الصحراء كى ينقلوا حركة الطيران الى افريقيا من كينيا الى السودان رأيت وزراء بسطاء فى ملبسهم وكلامهم وحتى فى بروتوكولاتهم كرما جميلا وطيبه حلوه رايت دوله استيقظت من سباتها، وبدأت تحلم بالتنمية صحيح هناك الكثير من المعوقات والصعوبات والحروب الداخليه الأتيه من الخارج !!! ولكنهم عازمين على التنمية رايت النيل فى اجمل مارأيته النيل البكر الطمى الغزير الذى حجبه عن ارضنا السد العالى جزر كاملة تشكلت داخل النيل من هذا الطمى الكثيف ومشروعات تستعد للإستفادة من هذا الخير رايت مئات الألالاف من الأفدنه التى لاتجد من يزرعها ومستعدة للزراعه دون كيماوى او اى شئ سوى سواعد - واراها مصريه فى المستقبل - لتكون السودان وبحق سله غذاء العالم . ارى انه يجب ان نهتم بالسودان اكثر وان نتوجه بجهودنا لها فهى مستقبل مصر شئنا ام ابينا . رايت المشروعات المصرية التى بدات تغزو السودان ومطلوب اكثر عموما انا فقط احببت ان اعطى فكرة بسيطه عن دولة بدأت تستيقظ من سباتها لتلحق بالتنمية وقارنت فى نفسى بينها وبين دولة اخرى بدأت أو فلنقل استعدت للنوم مرة اخرى وياليتها تستيقظ حتى لايصبح الجنيه السودانى كما الدينار الكويتى بــ 20 جنيه مصرى والى رحلة اخرى فى دوله اخرى .
اولا الف رحمة ونور على روح الفقيد المرحوم ولكن الى متى نتكتفى بالدعاء على نزيف الدم فى شوارع وطرقات مصر ؟؟؟ الى متى نعتبر تكييف هذه الجريمة قتل خطأ لايتجاوز عقوبه 3 سنوات ؟ صحيح ولان الشهيد لواء وذو رتبه فالإهتمام الإعلامى كبير ولكن ايضا هناك ألالاف الشهداء البسطاء يسقطون صرعى تحت عجلات السيارات الطائشة دون جدوى ؟ هل لان المواطن اصبح لايحترم القانون ؟ أم لان رجال القانون لايحترمون المواطن وبالتالى فالمواطن لايحترم القانون باعتباره ان رجالات الشرطه هم من يمثلونه ؟ ام لان القانون نفسه لايجبر احدا على احترامه بنصوصه الضعيفه وضعف تنفيذ احكامة ؟ مجرد دائرة مفرغه أخرى من بين الالاف الدوائر المفرغه التى ندور فيها بحثا عن مخرج !! لقد اصبحت على يقين ان الشعب المصرى اصبح ثلاث شعوب بثلاث قوانين شعب النخبه والأغنياء ولهم قانونهم الخاص فيما بينهم لاينطبق على غيرهم وشعب الموظفين والبسطاء من ابناء الشعب ولهم القانون المكتوب الضعيف الذى يطبق عليهم هم فقط دون غيرهم موظف ارتشى بمبلغ 100 جنيه ياخد 7 سنين سجن - دا القانون اللى بيقول كده - اما الموظف الكبير اللى خد اتنين تلاثه مليار ياخد كام دا بقى ياخد ديله فى سنانه ويجرى على بره ولما يسوها يبقى يرجع دون عقاب - والفئة الثالثه فئة اللاقانون اصلا قتل وبلطجة واغتصاب كما نراها فى افلام ابراهيم الأبيض ودكان شحاته والفرح وغيؤها من الأفلام التى تعلن عن وجود الشعب الثالث فى مصر وهو شعب البلطجه بلا قانون اللى عايز حقه ياخده باسيف فان لم يستطع فابلمطواه فان لم يستطع فبيده بس يكون فتوة لان اللى معهوش التلاثه دول يتقتل وهو ساكت او تغتصب وهى راضيه . انا لو من البقية الباقية من الناس اللى المفرضو خايفه على البلد احاول تطبيق القانون الصينى اى جريمة تزهق فيها روح يكون الإعدام الفورى والعاجل والحاسم للمرتكب سواء غلطان او مهمل او حتى قاصد يعنى سائق الأتوبيس دا وغيره يجب على الفور اعدامهم وبدون تهاون وبدون اللجوء الى النصوص العرجاء بانه مش قاصده اصل الفرامل سايبه ياجماعه كفايه بقى انهيييييييييييييييييييار
كل عام وانتم بخير يااصدقائى الأعزاء واللى فعلا بجد حسيت وانا فى الغربه هنا انى مش لوحدى وبجد هونتوا عليه كتير ومعذرة لانى لم استطع التواصل معكم فى الأيام الماضية حيث كنت فى مأموريه صغيره لمدة اربعة ايام فى تونس الجميلة الخضراء اللى بجد لما زرتها اعتبرتها نموذج للدولة العربية المتحضرة والجميلة والهادئة كل الناس هناك بتبتسم فى وشك فعلا كل الناس واخدة الأمور ببساطة جدا كل حاجة جميلة وهادية يارب نبقى زيهم . يارب يكون رمضان علينا هذا العام هادى وربنا يستجيب لدعائنا فى صلاتنا وصيامنا المخلصين منا كثيرون وندعوا الله سبحانة وتعالى ان يستجيب لدعائهم يارب امين بس بجد الواحد نفسه يعيش فى تونس
اريد أن اراك شمس الشموس قبل الرحيل فما عاد فى العمر غير القليل قد كنت نجماً ساطعا فى السماء والأن صار الضوء ضوءا هزيل أين انت ... اين ماضى الزمن الجميل اين النسيم العليل وظل النخيل ؟ قد كنت فى الماضى ضوءا يهدى التائهين كنت وطنا لكل شريد تاه منه السبيل قالوا عنك مهد الحياه فى عمر الزمن الطويل اين تاه الضوء اين صار الزمن الجميل عودى ياحياتى شمسا كما كنت لا كوكب يتوارى خجلا ........ فلا مستحيل اغلى اماني ياحياتى ان ارى شمسك تسطع من جديد قبل الرحيل
ورد فى صحيفة المصرى اليوم بتاريخ 10/8/2009 موضوع بجد أصابنى بصدمة وهو قرار السيدة الفاضلة الموقرة رئيس الإذاعة فجأه وبجرة قلم الغاء تاريخ 50 سنه أو بمعنى ادق الغاء برنامج ربات البيوت على البرنامج العام ... هكذا فجأة وبلا مقدمات المشكلة ياأصدقائى ان هذا البرنامج له ذكريات كثيره وعديده وقام بالمشاركة فيه عمالقة مصر سواء ضيوف أو ممثلين ورغم انى رجل ( طبعا زمان كنت لسه صغير ) الا اننى كنت استمتع بسماع الموضوعات التى تثار فيه وحل المشكلات والمناقشات وكذا طبعا تمثيليه " عائلة مرزوق افندى " وكم كنت ارى والدتى رعاها الله وهى تنتظر بشغف لسماع هذا البرنامج وقد اصبح جزء من العائلة المصرية ولا شك ايضا انه شكل وجدان العديد من الافراد . عموما المشكلة هذه ليست غريبه علينا فبجرة قلم ايضا تم الغاء برنامج نادى السينما وهو البرنامج الوحيد الذى كان يتناول الدراما من المنظور التحليلى بحث انك كمشاهد قد ترى الفيلم من زوايا قد لاتعيها ان شاهدت الفلم منفردا . المهم بقى ايه ان الغاء برنامج ربات البيوت ال ايه بدعوى التطوير وتجديد الشباب للبرنامج بحيث يصطبغ بصبغة شبابية انا عايز اعرف هو العواجيز فى البلد دى صدر ضدهم حكم بالأعدام مثلا هل هناك قرار خفى بان يتم استفزاز كبار السن علشان يموتوا ونرتاح منهم ولا خلاص فجأة مفيش غير الشباب فى مصر ياجماعة فى دول العالم المتقدم هناك وزير مخصص لكبار السن يقوم على رعاية مصالحم والعناية بهم اسمه Minister of Old وقد قام وزير العواجيز فى فرنسا بالإستقاله مثلا لان عدد من ماتوا اثناء موجه الحر من حوالى كام سنه تعدى 1000 عجوز . طبعا هذا القرار العشوائى امتدادا لقرارات اخرى بالتطوير العشوائى ايضا وبدلا من ان نحافظ على تاريخنا بنبيعه للقنوات الخاصة او بنلغيه شوفوا المملكة المتحدة ( ام الدنيا فى رأى وليس غيرها ) تحافظ على تراثها وتقاليدها ازاى بلد محترم لايبيع تاريخه للى يدفع اكتر بدعوى التجديد والشباب انا خايف يجى يوم نلاقى وزير السياحة المصرى راح مطلع قرار ان يغير اسم هرم خوفو الى هرم تامر بدعوى ان اسم خوفو قديم وتامر اسم شبابى اكتر ودا حيجدد شباب الهرم . اهلا ومرحبا بكم فى زيارة وجوله سياحة فى منطقة اهرامات الجيزة هرم تامر وهرم سامر وهرم مازن وبعد كده حنروح متحف باكينام ( الملكه حتشبسوت سابقا)مع احترامى الشديد والإعتذار لاصحاب هذه الاسماء وانتم جميعا تعرفون ماابغى اليه
صباح الخير ياأصدقائى اخيرا قرات فى صحيفة الاهرام الصادرة اليوم بتاريخ 5/8/2009 ان عددا من اعضاء مجلس الشعب تقدموا بطلب احاطة للسؤال عن السفه الذى تقوم به الاندية المصرية فى الإنفاق على شراء لاعبى كرة القدم من المال العام دون اى وازع او احساس بما يحدث فى مصر الأن من ظروف اقتصادية . شوفوا بقى طبعا اكيد اللى قدم هذا الإستجواب اما نائب من الإسماعيليه اتحرق دمة على الجهبذ شريف عبد اللطيف او نائب زملكاوى اتغاظ من انتقال اللاعب للأهلى ، عموما مش دا المهم المهم بقى ايه ان باقى اعضاء المجلس الموقر ياخدوا الموضوع بهتمام ويحاسبوا الناس المسئولة ويطلبوا تحويلهم الى المحكمة بتهمة اهدار المال العام والغاء كافة الصفقات من النوع دا والإكتفاء بالصفقات التى تحدد سعرلاعبى الكورة المصريين بسعرهم الحقيقى الذى لايتجاوز 1000 جنيه للاعب الناشئ و2000 جنيه للاعب الكبير و يعنى ممكن 4000 جنيه حد اقصى للسوبر . اتمنى دا يحصل وان يحصل كمان وقفة احتجاجية كبيره ضد الأندية زى وقفات الضرائب العقاريه وخبراء وزارة العدل يعنى الواحد نفسه الناس بقى تحس وتفهم ان الكورة هى سبب بلاوينا كلها سايبين اللى يبيع ويشترى بملايين على لاعبين كسر واخبار ملتهبه علشان يلهوا الناس عن اللى بيحصل فسينا يارب نفوق بقى
أسمحولى فى البدايه أن اقول ايه الخيبة دى لاعب كرة قدم مصرى يزايد عليه اكبر ناديان فى مصر للوصول بسعرة الى نحو 8 مليون جنيه مبدئيا بالاضافة الى لاعب اخر فوق البيعه ليه معلش انا مع احترامى للناديين فهو صراع ديوك متخلف على لاعب يجلس فى منزله ويمتنع عن التدريب للضغط على ناديه لبيعه يبقى لاعب غير ملتزم وغير محترف يبقى ادفع فيه كل دا ليه بدلا من انى اتبرع بالمبلغ لصالح الفقراء او بلاش الفقراء علشان السادة الأغنياء ميزعلوش اروح افك اللاعب بكام لاعب ناشئ صغير يقدر يلعب كام سنه وبعدين من الاخر اروح اشترى لاعب كورة ليه وبالمبلغ دا ليه دا لو حيجيب كاس العالم برضه حرام حرام عليكوا بقى كفايه استفزاز لمشاعر القراء وبعدين يعنى شريف عبد الفضيل هو دا اللى حيجيب الديب من ديله انا بقول من دلوقتى مبروك للزمالك فلوسك اللى وفرتها وهارد لك لنادى المبادئ على فلوسك اللى خسرتها
أصدقائى الأعزاء اكتب اليوم لكم عقب عودتى من القاهرة بعد أن قضيت فيها نحو عشرة ايام منهم حوالى خمسة ايام فى طريق صلاح سالم احاول الوصول الى منزلى واثناء توقف الإشارات الطويلة جال بخاطرى سؤال هام وهو من السبب فى الفساد ؟ هل الفساد يأتى من القمة للقاع ام ان الفساد يرتفع من القاع للقمة ؟ او بمعنى اخر على راى الأغنية الشهيرة مين السبب فى الحب القلب ولا العين ؟ صدقونى لقد وقفت طويلا احاول ان اجد اجابة على هذا السؤال هل الموظف البسيط هو سبب الفساد ام المسؤلين الكبار ؟ ولنستعرض معا بعض من الفساد المنتشر فى كل مناحى حياتنا وانا هنا سأسوق مثالاً واحدا فقط وهو مايتعلق بالزحمة التى عانيت منها فالنبدأ بصدور امر تكليف من الحى المختص برصف شارع معين فى دائرة هذا الحى لاحد شركات المقاولات ، وهنا تبدا الشركة فى العمل وتضع طبعا مواصفات فنية غير مطابقة لتوفير التكاليف وزيادة الربح طيب مين اللى حيستلم الأعمال من الشركة ؟ موظف مهندس صغير فى الحى وطبعا حياخد حلاوة العمل من المقاول ( فساد صغير ) والامر ينتهى باستلام العمل وبعد شهرين الشارع تظهر فيه المطبات والحفر ويرجع المقاول يصلح علشان ياخد فلوس تانى استكمال اعمال طيب مين اللى اعطى له امر العمل - مدير الحى ( فساد متوسط) وياتى الوزير المختص ويمر من الشارع ويطنش على الحفر والشارع المطبطب - نسبة الى المطبات - ( فساد كبير ) . طيب لو ان المهندس الصغير راعى ربه وعمله ورزقه واستلم الشارع طبقا للمواصفات الفنية السليمة كان الأمر سيختلف لان المقاول ساعتها وهو المقاول الفاسد ( فساد القطاع الخاص ) لن يتقدم للمناقصة لانشاء الشارع لانه عارف انه مش حيقدر يخنسر من الفلوس وبالتالى كان سيتقدم للعمل مقاول اخر محترم لانه عارف ان اللى حيستلم منه مش حيطنش ز وبالتالى فالمقاول الفاسد مش حيدفع رشوة للمدير علشان يعطى له اذن العمل وهكذا تدور الدائرة ؟ ولكن ممكن برضه نبص ليها من منظرو تانى طيب لو المقاول طلب من الوزير انه هو اللى يرصف الشارع مقابل مجاملة معينه ساعتها المدير مش حيقدر يراقفبه لانه حيخاف والمهندس الصغير حيقول ياعم وانا مالى فيستلم العمل بدون فحص يبقى فساد من كبير للصغير بصراحة احترت واحتار عقلى وفجأة ولطول الانتظار فى الإشارة السايرة قطعت بنزين ماهى دايرة بقالها فترة وطبعا عملت ازمة مرور تانيه فاستفقت من غفوتى واحلامى وتساؤلاتى للبحث عن جركن اوصل اجيب فيه بنزين علشان العربية تدور هذه اول مغامرة بعد وصولى للأجازة المهم بقى انا طالب رايكو بصراحه مين السبب هذه القصة ذكرتنى بحوار شعرى الفته من قبل - سامحونى مش حقدر اكتبه كله - ولكن حقتبس جزء منه هـــــو : ياصديقتى أنها ليست مشكلات انه الفساد الذى أزكم أنوف العالمين لقد سرق الكبار منا كل مانملك وأصبحنا شعب من المساكين ولم يكتف الشعب بذلك فقام هو الأخر بالسرقة والنهب ونهش لحم هذا الوطن الحزين . وضج كل شريف وتعالت فينا أصوات الانين بل أضحت مبادئ الشرف والكرامة والامانة من حفريات الزمن القديم ياصديقتى لقد أصبحت على يقين أن الشيطان الأن يوسوس الى المصريين ياتباع الشرف والطريق القويم حتى يراه وهو يسقط فى براثن من يملك السلطة ولايملك الدين ويعاقب ويعذب ويسجن كل شريف فى هذا الزمن المهين فيضحك الشيطان وينادى هذا جزاء من يعمل صالحاً فيكون من المدحورين
اليوم عدت ثانية الى الكويت وكان اول مافعلته ان قمت بقراءة تعليقات اصدقائى وكم فرحت جدا لشعورى بصدق مشاعركم كلكم بجد لم أكن أتوقع فى يوم من الأيام ان يكون لى مثل هذه الصداقات الجميله التى احمد الله سبحانه وتعالى عليها اشكركم جميعا واشكر مشاعركم واشكر ظروف الغربة رغم قسوتها ان جعلتنى اتعرف عليكم جميعا والى إصدار قريب ان شاء الله اامل ان يحوذ على أعجابكم جميعا
الى كل أصدقائى الأعزاء على نفسى الى كل صديق وصديقه اشعرنى اننى لست وحدى بل مع أناس مخاصين يتفاعلون معى فى كل مااكتبه وانا ايضا اتفاعل معهم أحبكم بجد ولم استطع ان اوفيكم حقكم فى الرد بجد صحيح الأجازة مازالت ممتده ولكن لم استطع ان انتظر العودة كى اقرأ ماكتبتموه وفعلا وجدت ماتوقعته من تعليقات عجزت يدى ان ترد عليها لكا فيها من كلمات جميله ولهذا تقبول جميعا تحياتى - الصديقه نور-الأستاذ رضا -أنوس الجميله -الأستاذ عمرو-الأستاذه رانيا على-الأستاذ احمد عبد السلام - رانيا الشاعرة الجميله- نور حياتى - عصفورتى الجميله -صفاء كل الأصدقاء كل الأصدقاء تحياتى لكم من القاهرة مصر وتمنياتى لكم جميعا بالتوفيق والى لقاء قريب لان فيه حاجات كتير عايز احكيها معاكم
<اليوم أجهز نفسى للعودة الى بلدى المحبوب مصر فى اجازة قصيره اقضيها مع اسرتى ولهذا فقد يصعب على فى هذه الفترة ان اتواصل معكم وان كنت ساحاول بالطبع ولكن هذا يتوقف على اسرتى بعد هذا الغياب الطويل ولهذا اود ان استودعكم الله بهذه القصيده وارجو ان تحوذ اعجابكم والى لقاء ان شاء الله قريب
صباح الخير ياأصدقائى اليوم اتناول موضوع قد لايثير اهتمام البعض ولكنه ايضا يلقى بظلال على منظومة الحياه فى مصر كلها ألا وهى القضية المشهورة التى فاقت شهرتها القضية الفلسطنيه وهى قضية البث الفضائى لمباريات الكوره للدورى المصرى . بادئ ذى بدء ومنذ دخول الإغتراف اقصد الإحتراف فى ملاعبنا بدون اية دراسات او حتى تمهيد لنفوس الناس المتعاملة معه وانفتح كيس الفلوس وتناثرت الملايين هنا وهناك تارة على اللاعبين واخرى على المدربين اجانب ومصريين أل ايه بيقلدوا الاجانب بقه وبقينا متقدمين هو مش الأهلى كسب ريال مدريد مره نبقى احنا احسن من ريال مدريد !!!! . عموما تحول هذا الإغتراف الى إنحراف واختفى الأحتراف الحقيقى والذى له منظومة مختلفة تماما عن العشوائيه التى تدار بها الرياضه فى مصر . فمثلا اول مبادئ الإحتراف هو عدم تبعيه الاندية للحكومه أو جهات حكوميه وبالتالى فهى وكأنها شركات مستقله تمارس نشاطا اقتصاديا خدميا مثل شركات السياحة فهى تقدم خدمه مثثل هذه الشركات وهى خدمة الترفيه أما هنا فالوضع يختلف الحكومه كل يوم بتدى دعم وحسابات حكوميه ( وياريتها مظبوطه برضه ) وبتشيل مجالس وتحط مجالس طبعا إذا لايوجد احتراف ادارة وهو رأس الموضوع واذا فسد الرأس فسدت المنظومة . نأتى بقى على اللاعبين والمدربين وعن الفوضى هنا لاتسل لاعب يضغط على ناديه علشان يروح نادى تانى يقوم ميرحش التدريب ( طبعا دا لو فى اوربا كان انتهى مستقبله كلاعب لان فى اوربا اللاعب سمعه اساسا) وانا هنا اقصد تحديدا مثال فج للاعب لايستحق اكثر من 1000 جنيه صدقة وليس ثمن يزايد عليه ناديا القمة ( القمة بالمقلوب طبعا ) ليصل سعرة الى 7 مليون جنيه ليه ؟؟؟ معرفش انجازاته ايه ؟؟؟؟ مش باين . طبعا كمان الاجهزة الفنيه تلاقى مدير فنى ومدرب عام ومدرب مساعد ومساعد مدرب ( ايه الفرق مش عارف ) ومدرب حرارس مرمى ومدرب يدرب ومدرب يتفرج ومدرب رميه تماس ومدير كورة وقائم باعمال مدير كوره ايه دا كله مش عارف بيعملوا ايه متفهمش اهه ( رزق الهبل على المجانين ) ياله ولقمه هنيه تكفى ميه ادى مبادئ الإحتراف ؟!؟!؟! وبعدين رغم كل الهيصه دى لايوجد ملعب واحد محترم تلعب عليه كوره باستثناء ملعب حرس الحدود علشان الجيش بيصرف غير كده مافى ملعب واحد حتى الأستاد الوطنى اللى اتبنى ب3 مليون جنيه واتصرف عليه صيانه مايقرب من المليار ( مش عارف ازاى ) وهيئه كامله للأستاد وتنبثق منها لجان وفرعيات وادارات وكله بيصرف وكله سبهلله . وبعدين بقى طبعا هذه الفته الكبيره اسالت لعاب رجال الأعمال فناس تروح تفتح قنوات فضائية وناس تروح تدفع تشترى لعيبه كسر وهات ياتحليلات وطبعا اللى عامل نفسه حامى حمى الحياد وقائم مقام نوادى عدم الإنحياز زى قناه النيل الفضائية وقنوات اخرى بلون الفانله ولعيبه معتزله تشتغل مذيعين مبيعرفوش اصلا يتكلموا ياله ماهى برضه رزق الهبل على المجانين . واخرة المتمه بقى يدخل اتحاد الكوره الصراع الجهنمى مع التليفزيون على اذاعه المباريات ودا يقول من حقى ودا يقول من حقى - طز فى المشاهدين مش مشكله هما مين اللى بيتفرجوا ماهم الناس اللى احنا بنضحك عليهم مش مشكله المهم الإعلانات وفى الاخر اتحاد الكورة يقول مش حنزيع مباراه السوبر ال يعنى مباراه بين ريال مدريد وبرشلونه . يااصدقائى العشوائية الرياضيه ممكن يتكتب فيها كتب ولكن اين الإحتراف بقى اللى بيقولوا عليه فين ميزانيات الاندية فين العقود النموذجية للاعبين فين اللاعبين اساسا اللى بيتشدقوا ويقولوا اللاعب لازم ينام بدرى علشان صحته تلاقى طالع مذيع فى قناه فضائية مستضيف لاعب على الهواء الساعه 12 باليل . عموما انا بس حبيت اضع يديكم على مهزله الريلضه فى مصر علشان بس نصحى شويه المليارات التى صرفت على لاعبى الكورة والنوادى والإغتراف دا شعبنا المسكين كان اولى به اللى يدفع فى لاعب 7 مليون جنيه دا ربنا حيحاسبه حسابا عسيرا وهو يملك هذا المبلغ ولايستغله مثلا فى بناء مساكن للفقراء او مستشفيات او اى مشروعات ترفع من مستوى الناس اللى هو بيكسب منهم اصلا ياناس رئيس كوريا الجنوبيه اتبرع بثروته بالكامل للفقراء - حد يعرف دى - وبيل جيتس نفسه ساب شغله وبيعمل لصالح الخدمة الإجتماعية - وبعدين تقولوا حضارة ؟؟؟ على راى الهتاف الشهير فى الكورة نختم بيه الكلام دا ونقول " كفاية حراااااااام"
الغربه موضوع اعتقد أن كثير من الأصدقاء قد يرون انى قد تناولاه فى قصائد كثيره وكلام كثير قد يجعل البعض يمل من هذا الموضوع ولكن انا اتناول هذا الموضوع هذه المرة مش غربتى انا ولكن غربتنا كلنا مع انفسنا ومع اوطاننا . ومادفعنى للكتابه مجداا انى قد وجدت بعضا من المدونين يتناولون هذا الموضوع ولكن يمكن بصورة اكثر قسوة مما تناولته انا ولهذا فانى اليوم لن اتكلم عن الغربه ولكنى سأحلل لماذا الغربه ؟ وهل الغربه هى فقط ان تترك اهلك ووطنك وتسافر بعيدا ام ان الغربه قد تكون فى الوطن ذاته بل وفى المنزل ويمكن فى حجرتى الصغيره ؟ دعونا لانسترسل فى كلام مسهب قد يطول ويتوه منا المعنى والغرض ولهذا سأحلل لكم فى نقاط من وجهة نظرى طبعا لما اصبحنا جميعا نشعر بشعور الوحده والغربه 1- غياب القدوة سواء داخل المنزل او خارج المنزل وبما يعنى انفصال الفرد عن الهدف او بمعنى اشد شمولا عدم وجود هدف فى حياه الأنسان يعنى ( لو نجحت ايه اللى حيزيد عليه ولاحاجة / لو اشتغلت ايه برضه الفايده استنى اخر الشهر قرشين واخلى اللى يسوى واللى مايسواش يتحكم فيه وليه ؟/يعنى افضل اشقى واتعب وغيرى بيلهف الملايين بلا حاسب ولاضابط يحاسبه ) امثله عما يجول بخاطر البعض . 2- طغيان المشاكل الماديه وانشغال الناس بلقمة العيش كما يقولون كرس معها تراخى الروابط الإجتماعيه ثم رويدا رويدا انسحاب من الحياه الإجتماعية المحيطه واخيرا العيش فى جزيره منعزله وهى من البيت للشغل ومن الشغل للبيت طيب فين الأهل فين الأصدقاء فين الجيران كل واحد فى حاله مشغول بهمه وهم عياله . 3- عدم توافر وسائل الترفيه التى تجمع شمل الأسر مثل الماضى كان زمان الناس بتتجمع فى بيوت بعض علشان يسمعوا ام كلثوم سهره تمتد بالساعات الرجال حول الراديو يسمعون والنساء كذلك ويأكلون سويا وينسجمون مع آهات سيده الغناء اليوم حيتلموا حوالين مين تامر حسنى دا اقصى اغنيه ليه 3 دقائق وبعدين النفس بيقطع يبقى الفن اصبح مثل ساندوتش الهامبورجر الخفيف يملى البطن دون افاده . 4- انتشار القنوات الفضائية بصورة عشوائيه وتمثليات وافلام وبرامج هايفه وبرامج هامه وناس بتشتم بعض وناس بتغنى على بعض وبتغنى علينا مما جعل كل افراد الأسره المتوسطه حتى بيكون عنده تليفزيون فى حجرته اللى غاوى كوره يفتح قناه رياضيه واللى غاوى افلام يفتح قناه افلام وهكذا يبقى البيت الواحد فيه3 تلفزيون كل واحد على حاجة مفيش نقطة تجمع للأسره عكس زمان الاسره كلها حوالين تليفزيون واحد قناه واحده برنامج واحد بيلم الناس مع بعض. 5- انتشار الانترنت ايضا ساهم فى تكريس الغربه والوحده ممكن تلاقى الواحد يمكن بيفتح الأنترنت والى من 12 الى 14 ساعه فى اليوم لوحده طبعا لن اتكلم عن ماذا يشاهدون فليست الأنترنت شيطان فقط بل ايضا ملاك ولكن مااقصده انها جذبت الشباب بعيدا عن المجتمع الأسرى المحيط 6- وعلى صعيد اخر فكما ان قلة الموارد والفقر تشكل بعدا هاما فى هذا الأمر نجد ايضا الغنى ولاسيما فىى المجتمعات ذات الدخول المرتفعه ومع انفصال شبابها عن القدوه والهدف بحيث انهم يشعرون ان تلك البلاد ماهى الا ماعون نقدى فقط دون روابط دون هدف مجرد دوله فيها نخبه حاكمة وكثرة محكومين لايوجد رابط بينهم هؤلاء فى وادى والاخرون فى وادى اذا اين الأنتماء وبالتالى نجد شباب هذه الدول لا اقول يفتقد الأنتماء وانما اقول يبحث عن الانتماء فهو يحب بلده نعم ولكنه لايعرف كيف يترجم هذا الحب الى عمل فلاهدف ولا احد يمسك بيده لتحقيق الهدف . هذا فى رأى على وجه العموم سبب الغربه النفسيه ليس فى مصر فقط ولا الدول العربية فقط وانما فى العالم اجمع ستجد ذات المشاكل وذات الوحده تجلس على مقهى فى شارع ايجوار رود فى لندن( على سبيل المثال وانا هنا اقصد هذا الشارع تحديدا لانه شارع المصريين والعرب فى لندن ) تجد كل واحد فى حاله منضده فيها 4 كراسى يجلس عليها واحد فقط اما وامتنا العربيه فحالها حال فرغم وجود اهداف يجب ان تتحقق واحلام لم نسعى لتحقيقها وروابط ووشائج تجعلنا نفترض ان هذا المفروض لايحدث الا ان الوضع لايختلف كثيرا فلاهدف وطنى او قومى يجمعنا وكفايه كده بقى عليكوا والى لقاء شعرى قريب باذن الله
نعم هى المرة الثانيه التى اكتب فيها فى هذه القضية ذلك ان الأمر لواقع ليس فقط ان أمرأة مسلمه قتلت بيد رجل مجنون متعصب ولكن لأن القضية اكبر من ذلك فأنا أتذكر حينما ثارت ثائرة العالم الإسلامى من المحاضرة التى ألقاها البابا بيندكت السادس عشر بابا الفاتيكان وماجاء فى هذه المحاضرة من اساءة الى الدين الإسلامى ورسوله الكريم وتعددت الأراء بين محلل لتلك الأقوال بصورة يبدو فيها العقلانية وبين ردود أفعال ثائرة تطالب البابا بالإعتذار تارة أو سحب ماقاله تارة أخرى وإجتمعت تلك الأراء فى النهاية الى أن حوار الأديان قد أنهار الى غير رجعة . لقد تناول أستاذنا العوا أمين عام المؤتمر الأسلامى العالمى فى حواره مع مذيعتنا القديرة منى الشاذلى مقدمة برنامج بعد العاشرة أن الإعتذار لايكفى ويجب سحب ماقاله البابا وتناول سيادته بالتحليل الجميل الأسباب التى دعت البابا لما قاله وانه استخدم ورقه الهجوم على الإسلام كورقه رابحه لجذب تعاطف الحكومة الأمريكية نحو الكنسية الكاثوليكيه الأمريكية. ولكن ألم نتسائل نحن المسلمون فى كل مكان تساؤلاً هاماً ألا وهو من منا المسئول عما أصابنا ؟ ولكنى سأبدأ ماأكتبه ببيت شعر قد يفسر الرأى التالى له
هّنا على أنفسنـــــــــــاحتى صار الهوان فينا فنونـــــــــــــــــــا
وبات كل ذى جهل يرىأن هوان المسلمين أصبح قانونــــــــــــا
لقد ثارت ثائرة المسلمون أيضاً حينما قام بعض مدعى الصحافة فى الدول الغربية بنشر رسوم مسيئة الى رسولنا الكريم وقد تجلت هذه الثورة فى المقاطعة الإقتصادية لمنتجات تلك الدول وهو مأسفر عن خسائر اقتصادية فادحة لتلك الدول وأجبرت تلك الخسائر الى العودة بتقديم الأعتذار ، ولكن الى متى نتقبل الخطأ ثم الإعتذار أن هذه الأحداث تذكرنى بمقولة فنانا الراحل فؤاد المهندس فى إحدى مسرياحته الخالدة " سك على بناتك " حينما قال " أحسس وأعتذر " إن الإعتذار من تلك الجهات لم يُبن عن قناعه بجسامة الخطأ بل بنى على أساس اننا سنتقبل الإعتذار وسنعتبره انتصار وينتهى الأمر ولكن بعد أن خرجت الطلقة من فوهه المسدس وأصابت ماأصابت !
ولكنى أرى ( إن جاز ان يكون لى رؤيه ) أن هذا الأمر لابد وأن يكون له حداً فاصلاً حتى لايتكرر فلابد وأن ندفع تلك الدول الى إحترام المقدسات الدينية بكل أشكالها وذلك من خلال استخدام مافى أيدينا من أدوات وانا أعنى هنا وبوضح قاطع لالبس فيه السلاح الإقتصادى كورقة ضغط لدفع دول العالم الى الضغط على الامم المتحدة لأستصدار قرار بمعاقبة كل من يمس المقدسات الدينية كمجرم حرب فلماذا دائما نحاكم مجرمى الحرب على جرائمهم بعد اتمامها وانتهائها ألا يجب ايضاً ان يحاكم من يحاول اشعال نيران الحرب كمجرم حرب ؟ لماذا دائما نتحرك بعد وقوع الجريمة ولانتحرك لمنعها
لقد صرح الرئيس الأمريكى السابق جورج بوش فى إحدى خطبه أنه يجب القضاء على الفاشية الإسلامية ولم يتحرك العالم الإسلامى ساكنا
أن قراءة الأحداث تذكرنى بالطالب الذى لايستذكر دروسه ثم يشكو من صعوبة الأمتحان ويلقى باللوم على الممتحن او المراقب أو حرارة الجو ويتبنى نظرية المؤامرة أو أى سبب عدا السبب الرئيسى ألا وهو أنه لم يقم بواجبه ولم يذاكر دروسه .
ألم يحن منا نحن المسلمون أن نحافظ على ثروات وهبها لنا الخالق فى أراضينا ثم ألم يأت الوقت الذى يجب أن نحسب ميزان القوى الإسلامية إعتماداً علىقوة الله مع الحق " ان الله يدافع عن الذين آمنوا " .
قد يرى البعض أن ماأقوله هو درب من الخيال ولكن لماذا دائما نقول نعم ونوافق على مايطرح علينا من حلول أتت من غيرنا .
ألم يحن الوقت دوماً أن نعبد الله حقاً حتى لاينطبق علينا قول الشاعر عبد الرحمن يوسف
بداية اوجه تعازى الى اسره الشهيده راجيا ومتمنيا من الله عز وجل ان يحشرها مع الشهداء والصديقين باذن الله وانا هنا اقصد ايضا الشهداء علينا الشهداء على ضعفنا الشهداء على سكوتنا عن حقنا ؟ انا هنا اطرح سؤالا من السبب فى مقتل الدكتورة مروة ؟؟ هل هو الجهل الغربى والتعنت والإرهاب والتطرف الغربى ؟؟ ام سنعود الى نظرية المؤامرة ونقول انها اسرائيل ؟؟؟ لا انا ارفض هذه الإجابات اننا نحن من قتلنا الدكتورة مروة نعم نحن فحينما هّناعلى انفسنا هّنا على الناس وهذا شئ طبيعى فحينما لايحترم المواطن من دولته فاكيد ماهو السبب الذى يدفع الاخرين لإحترامه وارصدوا معى هذه المظاهر بداية من بوابات الدخول الى ارض الوطن . - فحينما يحظى المواطن العربى بطابور خاص له لدخوله لأرض العرب ( لوحه يكتب عليها دخول مواطن عربى ولوحه اخرى يكتب عليها أخرون ) سريعا بينما الاجانب فى طابور اخر والاولويه للمواطن العربى سيعرف السائح بمجرد دخوله اننا فى دول تحترم مواطنيها ولكن هيهات كل دول العالم المتقدم والنامى والمتخلف تفعل هذا الا نحن - حينما يخضع الاجنبى القادم الى مصر او اية دوله اسلاميه او عربية لذات مظاهر التفتيش التى نخضع لها عند سفرنا الى بلادهم من خلع الحذاء والحزام ويمكن السروال كمان سيعلمون انهم ايضا ليسوا فوق مستوى البشر - حينما يخضع الاجنبى القادم الى الدول العربية الى الوقوف ساعات وايام على ابواب سفاراتنا للحصول على تأشيرة دخول ويخضع لذات الإجراءات التى نخضع لها نحن حال طلبنا تأشيرة دخول سيعرفون ايضا اننا دول لها حريه اختيار من يدخل ومن لايدخل - حينما يعاقب الاجنبى فى بلادنا على مخالفة قوانينا بذات العقوبات التى تقع على مواطنينا سيعرفون اننا سواسية لافضل لعربى على عجمى الا بالتقوى - حينما يتم ترحيل مدرب الاهلى السابق فى 24 ساعة فقط عند تصريحه ضد المصريين منذ ثلاث سنوات وارتكابه حركه بيديه مسيئة للأداب العامة كان سيعلم وقتها اننا فى بلد له عاداته وتقاليده المفروض عليه احترامها او فليخرج منها - حينما نشعر بقيمتنا وقيمة ثرواتنا وقوتنا وثقافتنا ونحترمها نحن ولانقلد الغرب فى ترهاتهم لان لدينا ثقافة يجب الحفاظ عليها كانوا سيعلمون اننا شعوب لها تاريخ وحضارة - حينما يجتمع زعماء العرب والمسلمون وبعيدا عن الصراخ والصوت العالى ولكن ان يتفقوا على ان مايربطنا الان بعيدا عن شعارات القومية التى عفى عليها الزمن هو المصالح المشتركة فابدا ليس هناك تطابق فى كافة الرؤى ( عبارة نحن فقط نقولها ) لايوجد تطابق ولكن يوجد ارضيه مشتركه تبنى على المصالح فقط حينما يصل العرب الى هذه المرحلة من النضج سيعرف الغرب قيمتنا - حينما تبدأ ثروات العرب تستثمر فى الارض العربية ومن منطق ( عض قلبى ولا تعض رغيفى ) سيهرول الغرب علينا طالبين رضانا - واخيرا حينما نحترم نحن انفسنا مواطنين وحكومات لا أقول حكومات فقط ولكن ايضا مواطنين نحترم قواعد المرور ويحترم المواطن فى المصالح الحكوميه اى احترام متبادل سيكون لدينا عزة نفس أصدقائى ان من حرض على قتل الدكتور مروة هو نحن واداه التنفيذ هو ذلك الالمانى المتخلف
من اعز واجمل الأشياء على النفس أن تجد لكتاباتك صدى عند الاصدقاء وتشعر انهم فعلا يهتمون بما تكتب بل وينفعلون احيانا به وهو بقدر ماتشعر بالسعادة منه بقدر مايلقى على كتفيك مسئولية كبيره وهى الا تقل كتاباتك عن المستوى الذى هم به معجبون وان تختار دائما ماتكتبه حتى يظل ماتكتب عالقا فى ذاكرتهم ومن هذا المنطلق فانا سعيد جدا بالصديقة العزيزه رؤية التى اهدتنى هذه القصيدة حيث كتبتها تعليقا على ماكتبه من شعر وهذا يدل على انه قد حاز اعجابها ولهذا اتوجه بالشكر لها وانشر ماكتبته هنا بإسمها وبما يعد فخراً لى وهو بالمناسبة شعر قصير ولكن جميل
مساء الأنوار يامحمد باشا شوف ياسيدى نمسكها واحده واحده مسألة التحريك لا التحرير دى طبعا السادات قالها بعد الحرب مش قبلها واقولك ليه بس استحملنى بقى لان الموضوع عسكرى بحت . طبعا كلنا يعلم تماما ان ايام حرب اكتوبر 73 كانت الأسلحة الإسرائيليه تتفوق على المصرية كما ونوعا ( انا لسه ماجبتش سيرة الدعم الأمريكى ساعة الحرب كمان ) مثلا عدد الطيارات كان اكتر لان سلاح الطيران هو رأس الحربه الإسرائيلى بمعنى انه السلاح الرئيسى الذى طبعا يتميز بالسرعه عكس سلاح الرئيسى المصرى وهو المشاه وطبعا اقل سرعه من الطائرات والكثافة النيرانيه كمان تتميز القوات الإسرائيلية بخفة الحركة نظرا لاتبعاها التكتيك الغربى القائم على السرعة من خلال التشكيلات الصغيرة عكس التكتيك المصرى القائم على بطئ التحرك لان الأعداد بتكون اكثر وهو فكر روسى كنا ملزمين به علشان التسليح مثلا الدبابه الروسى اثقل من الأمريكانى ب25% يعنى سرعه ومناورة اقل وبالتالى استيعاب الضربة الأولى والتعامل معها كان عند الأسرائيلين اكبر واسرع من استيعابنا مثلا للضربه الاولى فى 67 وبالتالى ونظرا للتفوق الهائل فى التسليح والتكتيك كان اعتمادنا على عنصرين الأول المفاجأه والتى لن تدوم طويلا كما شرحت لك والثانيه ايمان المقاتل المصرى بالقضية مما يجعله يتحمل المستحيل مثلا ان يحمل المقاتل المصرى عده وسلاح تزن مقدار وزنه فهذا آت نتيجة الحماس ولكنه ايضا لن يدوم طويلا ناهيك طبعا على ان اسرائيل هى المسيطرة على سيناء ولديها المسافة من العريش الى القناه يمكنها ان تحشد قوة نيرانيه هائلة تدمر القوات المهاجمة لان الدفاع اصلا اسهل من الهجوم وبالتالى قامت الخطة على عنصرين الأول هو العبور السريع علشان نضع قدم داخل سيناء ونتمسك بها وبالتالى حتى ان تم وقف اطلاق النار ولم نصل الى حل فالحرب ساعتها حتكون اسهل علشان مفيش قناه ومانع مائى نعبرة الثانى هو ابهار العالم بقدرة المقاتل المصرى وبالتالى ادخال الرهبه فى نفوس الجنود الأسرائيلين ليفكروا اكثر من مرة قبل اى هجوم يخططون له لانهم طبعا حيخافوا وميعرفوش ايه كمان تسليحنا . ثالثا بعد طبعا موضوع الأسترخاء العسكرى الذى فرضه الروس والأمريكان كان يجب تذكير العالم ان عدم الحل قد يؤدى الى حرب شاملة يعنى تحريك المياه الراكده ثم الأعتماد على الدبلوماسية بالنسبة بقى لردك على سؤالى فهذا هو بيت القصيد اى عدم المرونه فى طرح القضايا وفقا للمعطيات الدوليه وليس وفقا لأفكارنا نحن لان القرار رقم 242 كان ينص على انسحاب اسرائيل من الأراضى التى احتلتها عام 1967 يعنى الوضع المقبول للعرب هو كان تنفيذ هذا القرار وليس حاجة تانيه وكلنا كنا راضيين بده طيب اذا كان اجتماع مينا هاوس وتطور عمليه السلام كان يمكن ( وانا بقول يمكن ) ان يضمن ان تنفذ اسرائيل هذا القرار مقابل السلام طيب ليه لا ليه منحاولش واذا فشلنا يبقى نحارب تانى ويبقى ساعتها الكل مش حيقدر يقف امامنا اما ان نرفض الموضوع برمته دون محاوله فهذا هو الغباء السياسى بعينه ثم ان مساله الإعتراف دى نسبية يعنى ايه يعنى ماكل دول العالم بتحارب بعضها وهى معترفه ببعضها يعنى مثلا اليابان وامريكا حاربوا بعض وضربوا بيرل هاربر والتانيين ضربوا نووى وكان سفراء الدولتين موجودين اى لم يسحبوا السفراء حاليا مثلا الهند وباكستان نازلين ضرب فى بعض على فترات فى كشمير وبرضه معترفين ببعض والسفراء موجودين ياسيدى الفاضل انا حقولك حاجتين وهذا فى رأى ان فكرت فيهم بهدوء ستجدهم معقولين الاول سؤال مين اللى تحمل وتزعم جبهه الصمود والتصدى ؟؟ سوريا ( حزب البعث السورى )والعراق (حزب البعث العراقى ) (انا بقى نفسى انك تقرأ مبادئ حزب البعث علشان تعرف ان كلامى صحيح) وطبعا منظمة التحرير الفلسطينية والباقى انضموا ليهم لانهم كانوا خايفين من حدوث قلاقل عندهم من الثلاثه دول لان عرفات قالها صراحه اللى حيقف مع مصر انا قادر انى اوصل لغرفة نومه يعنى وقفوا خوف الا سلطنة عمان طيب ليه ؟ علشان الفلوس والدعم المادى المقدم من دول البترول لجبهة الصمود والتصدى طيب لو حصل صلح بقى حياخدوا فلوس منين كله حيقول لا مفيش اعانات مادية فيه مشاريع تنمية ماشى فيه خطط ماشى لكن فلوس كاش تروح سويسرا خلاص فنيتوا ماهو مفيش حروب بقى الثانى طيب مين وراء عدم حضورهم الى مينا هاوس ؟؟؟ ومين اللى سخنها فى دماغهم ؟؟؟ الامريكان ليه بقى ياسيدى ؟ لان خطاب مناحم بيجن ردا على السادات قال ايه قال انه لو حصل سلام يمكن ان نكون اعظم منطقة فى العالم من خلال الفكر اليهودى والمال العربى والسواعد المصريه لن نحتاج لاأحد طيب الكلام دا يخوف مين ؟؟ امريكا طبعا لانه لو فرض ان هذا الكلام تم يبقى اسرائيل ستخرج من عباءة امريكا والمال فى امريكا يهودى يبقى ممكن تلاقى يهود امريكا مدوا استثماراتهم الى المنطقة العربية وبالتالى تنمية شاملة للمنطقة وطبعا مفيش حروب يبقى مفيش سلاح حيتباع والسلاح هو عماد الصناعة الأمريكيه الموضوع من الاخر ياسيدى ان المستفيد من عدم حل القضية اتجاهين الاول علشان الفلوس بتاع سويسرا والتانى مبيعات السلاح الأمريكى صدقنى واقسم لك ان الزعماء العرب لو كانوا حضروا فى ميناهاوس كان التاريخ اتغير ليس تاريخ المنطقة وانما تاريخ العالم اوعى تفتكر ان زعماء سوريا والعراق واليمن والمنظمة قلبهم على القضية بص لثرواتهم فى بنوك سويسرا واسلوب معيشتهم الامبراطورى وانت تعرف ياراجل طالما انت بتتكلم فى الدين بقى والصحابه دا سيدنا عمر بن الخطاب لما واحد من العامة سأله من اين لك هذا الثوب الطويل ياعمر قال له ان ابنه عبد لله تنازل عن نصيبه فى القماش له علشان هو طويل ودا كان مين ؟ امير المؤمنين اللى بيحكم دوله من الهند وحتى المغرب قارن بقى بينه وبين ثروات الناس اللى بالى بالك تقوم تقولى اصلهم مش عايزين يعترفوا علشان الفلسطينين ووالحق العربى والجهاد والسلاح صدقنى اول ناس مكنتش عايزة تحل ولاتربط ومستفيدين من الامر الواقع استفادة شخصية هما الزعماء اللى انت بتقول عليهم انهم رافضين التفاوض مع العدو وحقولك حاجة انا سالتك عن موضوع السم والترياق صح ؟ السم وضعوة الأسرائيلين والترياق تم احضارة من تل ابيب برضه تفسر دا بأيه يعنى انا بقى لو مناضل لا اموت بالسم ومجبش الترياق من العدو يبقى على الأقل مت شهيد صدقنى يامحمد وانا اكاد اجزم انى اللى بقوله دا هو الحقيقة المجردة اللى محدش عايز يعترف بيها رغم انها الحقيقة وانا زى ماقلت لك سيبك بقى من الشعارات المشكلة مين اللى بيقول الشعارات موقفه ايه فلوسه منين ؟ انا لا مع السادات ولا مع عبد الناصر ولا مع اى حد انا مع دماغى بس وربنا ادانا عقل نفكر بيه ونوزن الامور وفى الاخر اقول انا مقتنع بايه صدقنى انا معاك فى كل كلامك بس مين ينفذ مين يستوعب القضية بشكلها الصحيح ويدافع عن مواقفه بدون غرض شخصى وسويسرا ( مش كفايه عصام الحضرى احترف فى سويسرا )طيب هل من الإسلام بقى لو حنتكلم فى الدين هل من الأسلام الشماته فى الموت دا الرسول لم يشمت فى موت يهودى اذاه يبقى لما السادات يتقتل زعماء الكراسى والأبواق يهللوا فى اى دين هذا حتى لو اختلفت معاك بس مش بالصورة لامؤاخذه العيالى دى معلش يامحمد لقد اسهبت معك فى هذا الرد بس صدقنى لو الناس تعرف الحقائق المجردة كانت امور كثيره جدا حتتغير
أولا معذرة صديقى محمد لانى كل مااحاول اكتب تعليق يقولى ان الحروف اكتر من المسموح ؟ اصلى انا فى موضوع الكمبيوتر زى حضرتك كده مع اللغنه الصينية فبصراحه بستسهل واكتب على طول هنا
استاذ محمد اولا انا حاسس كده اننا بدانا نقرب من بعضنا ولكن اعذرنى فيما سأقوله لك السؤال الخاص بالراسمالية والإشتراكية اجابته غلط ليه بقى غلط ؟ أولا انا حبيت اضع هذا السؤال مثل شرك الصياد ولكن صدقنى طبعا تلك هى الإجابة المتوقعة سواء اتفقنا على ان الرأسمليه هى امريكا واختلفنا مين الأشتراكية ولكن فى الاخر سأجاوب لك على السؤال لتعرف شئ اهم من الإجابة أن الإعلام قادر دائما وابداً على لى الحقائق وبصورة مقنعه تماما تجعل الإنسان يؤمن بما يقولونه دون ان يعطى نفسه الفرصه ليفكر انطلاقا من حماسه للقضية التى يدافع عنها دون ان ينظر لها من منظور محايد كى يستطيع ان يحكم عليها ( الإجابة فى اخر الرد ) . ولكن لتعلم ياسيدى ان موضوع المنطقة ا-ب ج دى هى ذاتها من بين القضايا التى يتاجر بها الإعلام فمثلا ياصديقى قبل حرب 1967 لم يكن هناك قوات مصرية اصلا فى سيناء وكان مضيق باب المندب مفتوح لمرور السفن الإسرائيلية اصلا ثم ان النواحى العسكريه والطبوغرافية فى سيناء تقول ان اهم مناطق سيناء العسكرية هى المضايق من يسيطر عليها يسيطر على سيناء وبالتالى وبحمد الله قواتنا الأن وبعد كامب ديفيد موجوده بالمضايق يعنى كما كان الوضع اما انتشار القوات بعد المضايق فلافائده منه نظراً لمساحة الأرض الواسعه التى لايمكن الدفاع عنها باى قوات ( شغل عسكرى اعتقد يسهل فهمه للعسكريين أكثر ) وان كنت اريد أن اقرب الأمر لك فهى كما فعل مونتجومرى ضد روميل فى حرب الصحراء ترك له مساحات شاسعة حتى وصل حدود العلمين ولكنها عسكريا بلافائدة عموما انا حبيت بس اوضح الأمور بشئ من المنطقية العسكرية حتى تتضح الصورة امامك ولاتستمع للذين يتاجرون بقضية المناطق المشار اليها .
أما موضوع الأمر بالقتال للمسلمين فهذا فرض انا لا أنكره ولكن ايضا وكما اشرت لك من قبل عايز العب المتش لازم اكون جاهز من كله مش مجرد انى مسلم يعنى هذا انى سأنتصر واذكرك بغزوه احد كما سبق واشرت اليها وكما غزوة حنين ( ويوم حنين إذ أعجبتكم كثرتكم ولم تغن عنكم شئيا) وكاد المسلمون ينهزمون ايضا ومن كثره وليس من ضعف ولكنها الطاعه ياسيدى الطاعة المبنية على القواعد المنطقية بمعنى اعمل اللى عليك الاول خد بالأسباب ثم توكل على الله
الشئ الخاص بحق العودة برضه من بين القضايا التى يلاعب بها الإعلام ولكن صدقنى لمن حق العودة ؟ للفلسطينين المهاجرين صح ؟ هل تعتقد معى ياأخى العزيز أن قويدر - أبو حمامة - اصحاب محلات الحلويات فى مصر وهم من مهاجرى فلسطين المطلوب لهم حق العودة هل تعتقد أنهم بحق يريدون العودة ؟ هل تعتقد ان انسان استقر لمده مايقرب من 40 سنه فى بلد ما وتزوج واستقر وعمل بزنس عايز يرجع للهم والغم اللى فى الأراضى الفلسطينية ؟ انا عن نفسى اعرف كثيرين من الفلسطسنين فى مصر يرفضون العوده عندهم بزنس وشغل مش حيضحوا بكل دا علشان يرجع فى خيمه لدرجة انى متهيألى انهم هم الذين يدفعون اسرائيل لرفض عودتهم. انا بكلمك من ارض الواقع روح كده واسأل انت بنفسك اى واحد فيهم عايش فى مصر وقله ترجع وشوف الإجابة وابقى بلغنى اعمل بنفسك استطلاع رأى اما اجابة السؤال فهى ان اكبر دولة اشتراكية فى الوجود هى الولايات المتحده واكبر دولة راسماليه فى التاريخ هو الإتحاد السوفيتى هذا ليس تخريفا ولكنه الحقيقة بمعايير النظرية الإشتراكية التى وضعها كارل ماركس مش قلتلك سهل جدا لى الحقائق والتلاعب بالألفاظ اشرحلك بقى السبب . اولا ماركس قال فى كتابه أن الإحتكار الرأسمالى للثروات سيؤدى حتما الى انقلاب الطبقة العاملة على اصحاب رؤوس الاموال وفى كتاب لينين " الإمبريالية اعلى مراحل الرأسماليه " أكد على ذلك وأن الإحتكار للثروة هو اعلى مراحل الرأسمالية أما الشيوعيه فماركس عرفها بأنها ملكيه الجموع ( الشعب ) لعناصر الإنتاج اى كل يحصل على مايلزمه من ثروة البلاد . طيب تعال بقى نقارن بين المفاهيم دى وارض الواقع حنلاقى ايه ؟ الحزب الشيوعى فى روسيا كان يملك كل عناصر الإنتاج اى تركزت ثروات الإتحاد السوفيتى كلها فى يد الحزب الحاكم والشعب يحصل على قوته من خلال المرتبات يعنى تركزت الثروة فى يد قلة من الأفراد اليس هذا هو مفهوم الرأسماليه عندهم تركيز الثروة فى يد القلة تعال بقى لامريكا وانطلاقا من تعريفهم هم ايضا ملكيه الجموع لعناصر الانتاج وهذه العناصر فى امريكا ماهى الا شركات كبرى تعتمد فى تمويلها على طرح الاسهم والسندات لتوفير المكون الرأسمالى ومن يشترى هذه الأسهم هو الشعب الأمريكى الذى قلما تجد فرد فيه لايملك سهم فى شركة والسهم يعنى انه شريك يعنى توزعت الثروة بين الشعب اذا فامريكا اكبر دوله اشتراكيه !!! ألم اقل لك ياصديقى من السهل جدا تغيير الحقائق بمنطق الخصم ولهذا فانا دائما احكم على الامور بعقلى وليس بعواطفى وعلى فكرة انا لما طرحت هذه المنطق فى الاجتماع الذى اشرت له سابقا قوبل بتجهم ثم انقلب الامر الى قلة مؤيدين وكثرة معارضين كما سبق وان قلت لك .
صديقى انا معك فى احلامك وتمنياتك ورغباتك لن تجد احدا يقول عكس ماتقوله ولن تجد عربى من داخله او مسلم أو مسيحى لا يتمنى ماتتمناه ولكن هيهات فلننظر اولا الى مايجب علينا فعله وهو الجهاد الاكبر جهاد النفس جهاد الأب كى يمنع بنته من لبس المحزق ويمنع ابنه من شرب الممنوعات جهاد الموظف ضد الرشوة جهاد العامل ضد التزويغ وبعد كده اضمن لك ان ماتتمناه سيتحقق
أولا بجد فعلا انا سعيد جدا بهذا الحوار المتميز بيننا ليس فقط لانه حوار راق وبأسلوب متحضر بعيدا عن التشنج ولكنه ايضا ايقظ فى نفسى ذلك المقاتل النائم او فلنقل ذلك المحاور الذى كان غائبا عنى عموما لقد راجعت كل ماكتبناه سويا ووجدت ان هناك نقاط بدأنا نلتقى فيها على مفهموم واحد ونقاط مازالت موضع خلاف وهذا فى الحوار شئ طبيعى .
واسمحا لى ان أبدأ بنقاط الألتقاء وهى كالأتى :
1- ان تقدم الامم وإذدهارها انما يأتى بأيدى أبنائها أولا واخيرا ولكن هذا الإذدهار لن يحدث الا بالتمسك بالأخلاق ولاسيما اخلاق المعاملة والحرص على توافر مقومات النجاح بين ابناء هذه الأمم .
2- أن الشعوب العربية كافة لديها هذه المقومات ولكنها أمة بذاتها وليست امة لذاتها والفرق بين المعنيين ان الأمة بذاتها هى امة لديها مقومات الحركة القومية ولكنها لاتدرك هذه المقومات
اما الأمة لذاتها فهى امة تدرك مقوماتها وتسعى الى تحقيقها .
3- أن نظام الشورى كنظام للحكم يصلح لكل زمان ولكن ليس لكل مكان لانه نظام ينبنى علىاسس كثيرة غير متوفرة حاليا فى مجتمعاتنا الأسلامية
وهذا يذكرنى بمناقشة كنت احد اطرافها اثناء استكمال دراستى العليا فى الإقتصاد دارت حول النظام الإقتصادى فى الأسلام وهل هو اشتراكى ام رأسمالى وكان لى رأى اخر وهو ببساطة ان الأسلام كنظام اقتصادى هو نظام متفرد لا اشتراكى ولا رأسمالى لانه ببساطة اكثر ظهر الى الوجود قبل هاذين النظامين بقرون طويله اذا يجب هنا ان نعكس السؤال ايهم هو النظام الأسلامى الإشتراكية ام الرأسماليه ؟ وطبعا انا سألت السؤال من باب السخرية من النظامين الوضعيين (الذان ثبتا فشلهما احدهما تلو الاخر والأزمة المالية العالمية الأن وطلب العودة الى ضرورة تدخل الدولة فى الإقتصاد لهم دليل على فشل الرأسمالية الحرة كما فشلت من قبلها الإشتراكية ) وفى هذا الإطار ايضا طرحت على الحاضرين سؤال واطرحه عليكم الان من هى اكبر دولة رأسمالية فى الوجود ومن هى أكبر دولة اشتراكية فى الوجود أو فى التاريخ يعنى على فكرة سؤال صعب مش سهل واللى يعرف الإجابة يقولى اجابته مع التعليل ولكن ولأن التابوهات التى لاتنكسر فى عقليه المتحجرين فقد قوبلت بهجوم عنيف وهو ماادخل السرور الى نفسى لانى علمت اننى المنتصر فى النهاية لان الغوغائية وسيلة الضعفاء
نعود بقى الى نقاط الخلاف بيننا وهى تتلخص فى
1- مدى جدوى كامب ديفيد وماجنته على العرب وماحققته لهم
2- طبيعة الصراع مع اسرائيل هل هو صراع سياسى ام دينى ؟
3- الخلاف بين الفلسطينين وهل يجب ان نتركهم ام نحارب معهم
والأن اليكم رأى
ولكن قبل ان اعرض لكم رأى اود اولا أن أقول لكم ان هناك الكثير من الحقائق لايوجد لها مستندات لإثباتها ولكنها حقائق ملموسه ومحسوسه قد يكون نصيبى ان اطلعت على بعضا منها او عايشت الكثير منها وسأسردها لكم ولكنى لا أملك الا كلمتى لاثباتها فلاوثائق ولا مستندات فان وثقتم فى كلمتى او لم تثقوا فهذا بالطبع يرجع لكم ولاألوم احدا فى كل الحالات
الأستاذ الملاح ( معلش انتم الاتنين محمد اغلى اسم ) اجاب على اسئلتى فى سيناريو عدم وجود كامب ديفيد بحدوث احداث ( أحلم ان تكون بالطبع ماكان سيحدث ) ولكنها لاتعدوا احلاما فقد قال ان العلاقات العربية العربية والأفريقية كانت ستصبح اقوى ووحدة كونفدرالية وتعاون اقتصادى ومالى ذلك من الكلام الجميل الحالم ولكن فلنعد قليلا ياصديقى الى ارض الواقع ونقول
حرب اكتوبر المجيدة والتى انتهت فى اوائل عام 1974 وخرجت منها مصر منتصرة عسكريا مدمرة اقتصاديا ولمده ثلاث سنوات قبل كامب ديفيد ماذا فعل الاخوة ؟؟؟
فى غرب بلادنا( الدول من الناحية الغربية لحدودنا ) طالبونا برد الطائرات الميراج وحتى قبل ان تستقر الأمور العسكرية وكذلك طالبونا بثمن البترول الذى كان يستخدم فى تموين الدبابات والمركبات وسحبوا قواتهم بعد 24 ساعة من اعلان وقف اطلاق النار والذى ادى الى حصار السويس حيث كان من المفترض ان يسد الثغرة هذه القوات وبالتحديد قوات منافسينا فى كأس العالم .
طيب ماذا فعلت الدول البتروليه اللى من ناحية الشرق بقى ؟؟؟ ارتفع سعر برميل البترول من 3 دولار الى 40 دولار بسبب الحرب يعنى الثراء الكبير الذى ينعمون فيه الان بسبب حرب اكتوبر ( أوم ايه على راى السعدنى )بدل مايحمدوا ربنا على النعمة اللى هبطت عليهم بجهود ودماء الاخرين صاروا يوجهون استثماراتهم الى اوروبا وامريكا بدل من مصر على الرغم من صدور قانون استثمار راس المال العربى والأجنبى رقم 174 سنه 1974 ومنحهم مزايا واعفاءات ولكن ليه مصر تنموا ليه مصر تتقدم ماهم عارفين من ايام كسوة الكعبه ان المصرى جبار اديله امكانيات مفيش حد يقف ادامه وكانت النسبة المخزية التى لاتزيد عن 3% من جملة الأستثمارالاجنبى المباشر للدول العربية فى مصر بل صاروا يوزعون الدولارات من السيارات الفارهه فى شارع اكسفورد بلندن كما يفعل اصحاب النقطة على الراقصات .
فين بقى ياعم الكونفدراليه اللى بتقول عليها بل ومازاد الطين بله كانوا بيطلبوا ديونهم اللى اشترينا بيها السلاح علشان نحارب ماهم على رايك حدودهم بعيده عن فلسطين والسادات كان بيعمل رحلات مكوكية علشان ال ايه بيجدول الديون تصور مش اعفاء لا جدوله فعلا هى كانت ممكن تبقى فيدراليهازاى ؟
2- من حّول الصراع العربى الأسرائيلى الى صراع سياسى مش دينى على المقدسات ؟ هم الفلسطينيون انفسهم قالوا عايزين دولة طيب ماهى الدولة تعريف سياسى وليس دينى وبعدين من امتى كانت هناك دوله التاريخ بيقول انها اسمها الأراضى الفلسطينية جزء يخضع للنفوذ السورى والأخر وهى غزة للنفود المصرى والقطاع الغربى من نهر الأردن تسيطر عليه الأردن اذا لم يكن هناك دولة بمقومات الدولة حكومه وشعب ودستور وقوانين ومالى ذلك وبعدين وقبل ان تكون هناك كعكه نتصارع عليها من اللى يحكم طيب مش الاول يبقى فيه دولة وبعدين نتخانق طيب نقعد مع بعض نضع شروط ومقومات وبعدين ياسيدى نتخانق لما نحقق المطلوب وحكررها تانى اوروبا الغربية بحربين عالميتين عشرات الملايين راحوا ضحية الحروب ودمار شامل واقتصاد منهار ولغات مختلفة ودين مختلف ومع ذلك لما وجدوا ان امريكا تسيطر على العالم اتحدوا لمواجهة القطب الواحد يبقى احنا بقى عملنا ايه
وبعدين انا لما بتكلم عن خالد مشعل مش انه عمل غلط ولا صح انا بتكلم على ان من شيم الفرسان كما فعلها ياسر عرفات من قبل اذا اردت ان ادعوا للجهاد فيجب ان اكون اول من يحمل السلاح فعلها عرفات فى حصار بيروت وحصار غزة ومع اختلافى معه رحمه الله الا ان هذه المواقف تبقى له لايطلب من الناس مالايستطيع هو ان يفعله
وللحديث بقيه ان كان فى العمر بقيه
بس بجد سعيد جدا جدا بيكم انتم الأثنين وياريت بجد يكون هذا الحوار الراقى اثراء للغه الحوار الجميل التى يفتقدها الكثيرين
شكرا لزيارتكم لمدونتى تمنياتى ان تحوز إعجابكم دائما واتمنى المزيد من تعليقاتكم سواء من يتفق معى فى الرأى أو يختلف وطبقا للمقولة المشهورة شكرا لمن قال نعم وشكرررررررا لمن قال لا ( والحدق يفهم )
