السبت، 30 يناير 2010

تسألينى

تسألينى كيف اكتب الأغانى
كيف يأتينى شيطان الشعر بالأمانى
الا تعلمى ان عيناك شيطان شعرى
عندما ينبض قلبى بالتمنى
ويتمنى منك بأشعاره أن تغنى
يطلب منك دائما ...... أن تَمنى
فهل أطمع بنظرة من عيناك ان تمِنى
بوحى الشعر ارغب ان تحنى
بنداء العاشق اطلب منك ان لاتجنى
فأنت أنت الحياه ووحى وفنى
فحبك دوما رحيق حياتى فلا تهنى

السبت، 23 يناير 2010

هرم للبيع

اصدقائى هو دا اللى فاضل...... باعوا القطاع العام ولم نر من حصيلة بيعه شيئا فقلنا مافيش مشكله ماهى الخصخصة كالسيف على رقاب العباد ......وبعدين قالوا حيخصخصوا الخدمات الحكومية برضه قلنا مفيش مشكلة أهى تبقى سبوبه للناس العاطلين ونساهم نحن فى القضاء على البطاله أهو من قدم شئ بيداه التقاه وهنيالنا يافعله الخير.
ولكن خرج علينا مقترح قانون جديد من السيد النائب المحترم المفترض فيه ان يكون من بين حماة الوطن ومدافعا عنه وعن شرفه فهذا الوطن هو من جعله فى مصاف مليارديرات العالم ولكن هذا النائب خرج علينا بمشروع قانون كما طالعتنا جريده الاهرام الحكومية بطلب اباحة تجارة الاثار يعنى حتى تاريخنا اصبح للبيع صحيح هو بيقول ان التجارة ستكون داخليه يعنى تبع وزارة الصناعة والتجارة الداخليه مثلا وهو يعنى اللى حيشترى تمثال حور محب الصغير مش حيقدر يبيعه بره إذا كان جوه مصر سرقوا ونش مترو الأنفاق يعنى حيبقى صعب عليهم يطلعوا التماثيل لبره ؟؟؟
بصراحه هو فاضل ايه طبعا سيادته حيتقدم بعطاء لشراء الهرم ماهو برضه اثار وطبعا حيرسى عليه العطاء وعلشان يقدر يكسب منه حيمنعوا طبعا استيراد اهرامات من الخارج علشان يبقى هو محتكر الأهرام زى مااحتكر الحديد عموما مش فاضل غير النيل ياترى من يشتريه ؟؟؟؟

الخميس، 21 يناير 2010

أمازلتى تفكرين ؟


حياتى أبعد كل هذا الحب مازلت تفكرين ؟
أم أن صراع الحياة قد جعلكى تنسين
ألا تذكرين ؟
كلمات حبى صراخ قلبى بحبك المجنون
ندائى عليكى وصوتى الحنون
أحبك يامنية القلب فى سكون
فحبك فى قلبى من وحى الجنون
ولكن
رغم حبى وإشتياقى تبعدين
لقد فقدنا ياحياتى الحب فى الصراع الطويل
ومات قلبى من هول طعن السكين
ولم تبق منى إلا اشلاء تبحث عن الطريق
ولم يبق من صوتى إلا الأنين
وأنت
مازلتى تفكرين

الأحد، 10 يناير 2010

وكانت ايام

وكانت أيام
تملئ قلبى بالأحزان
ترسم فى نفسى الأشجان
تدنو من وتقول
شمس حبك فى أفول

وأضطرب عقلى المسكين
وأختلج القلب الحزين
وفاض النهر بالأنين

فياقلبى لاتحزن
فماعاد الحب يجدى
ولاالشعر أصبح بالرسول

فماذا يمكن أن يقول
أمام صراعات العقول

فالحب الصادق مهزوم
والشعر أصبح مرجوم

فاليوم فقد الأنسان
كل صفات الأنسان
أصبح يعانى الحرمان

قد يدنو من الأنهار
ويرنو من الأشجار
يقترب من الأخطار
فلا يجد القرار
فاليوم ياقلبى لاتبالى
فماعاد شئ يرجى بالأمانى

وفقد الأنسان الرفيق
والحب والصديق

وحبك الذى تاه
قد يأتى يوم وتنساه
وتذكر أيام الماضى
وتشدو باللحن الهادى
وترسم على جذوع الأشجار
كل تلك الأشعار

الخميس، 7 يناير 2010

كف جديد من بسه والخمس

اصدقائى الأعزاء على قناه نايل دراما يعرض حاليا مسمل ليالى الحلمية وهذا المسلسل كان قد اثار ضجة كبيره جدا ايام اذاعته وانا افتكر كنت تقريبا فى الجامعة وكانت الشوارع تخلو تماما فى رمضان لمشاهده هذا المسلسل عموما التابو بتاع المسلسل او الخط الدرامى الرئيسى هو الحرب الدائرة بين اتنين بشوات واحد فلاح والتانى ارستقراطى وكل ماواحد يعمل فى التانى حاجة يكون التعليق " انا اديت سليم البدرى كف على صداغه " ولما سليم البدرى يعمل مقلب فى سليمان غانم يقول نفس الحكايه كف ورا كف لحد مالمسلسل وصل الى 5 اجزاء كل جزء 30 حلقه يعنى 150 حلقه كلها كفوف اشى من دا لده ومايمنعش برضه ان الفلاح بينضرب كفوف من اخرين زى بسه والخمس اللى هما فئات تجار كل شئ خطأ ونموذج لبعض رجال الأعمال اللى طلعوا من تحت الأرض
المهم بقى ان الكفوف دى فكرتنى او شبهتنى بالكفوف اللى عاملين ناخدها مرة من الجزائريين ومرة من الأمريكان ومرة من الفلسطسينين ودول بقى بقالهم يجى 50 سنه بيدونا كفوف مرة على الخد الأيمن ومرة على الخد الأيسر ومرة على القفا ولامؤاخذه مرة يفجروا ميدان الحسين ومرة يقتلوا جندى مصرى من حرس الحدود لايزيد سنه عن 22 سنه وقناه الجزيرة برضه ليها فى الكفوف نصيب كبير
عموما سؤالى الى متى سنظل نتلقى صفعات وراء صفعات - وعلى راى عادل امام فى مدرسة المشاغبين - بيقلع هدومه واحنا قاعدين - يعنى مع احترامى لكل مايقال عن القوميه والذى منه ودور مصر ومصر الأخت الكبيره وووو طيب امتى بقى نضرب احنا ولو كف واحد ؟ دا حتى فى المسلسل كان هناك تبادل ضرب كفوف مرة دا يضرب دا والتانى يردله الكف طيب متى سنرد ولو كف واحد ؟؟؟؟؟؟؟؟؟؟؟؟؟؟؟!!!!!!!!!!!!.

الثلاثاء، 5 يناير 2010

قراقيش

صباح الخير وبداية عام جديد ربنا يجعله عام سعيد عموما هو عام هام فى تاريخ مصر - معرفش ليه هما بيقولوا كده - لاننا منذ نحو 40 عاما مضت كل خطاب رئاسى هو خطاب تاريخى وكل خدث هو استراتيجى ، عموما انا بس حبيت انوه عن بعض الأحداث الجديده .

اولا: تمخض التغيير الوزارى عن تعيين وزير جديد للتعليم وانا هنا بالطبع لى تعليقين الأول ان الوزير السابق الجمل لم يُقل ( يُقال يعنى ) من الوزارة الا بعد ان اخذ حقنة التطيعم ضد انفلوانزا الحنازير طيب ياترى ليه ؟ فيه ناس بتقول انه لايملك مبلغ ال80 جنيه حق الحقنه علشان كده استنوا عليه لحد مايطعم مجانا رأفه به وبدخله المحدود وفيه ناس بتقول لأ دا أستنوا عليه علشان ياخذ الحقنه انتقاما منه علشان المصل مضروب طيب ياترى ايه الصح لا أحد يعلم .

ثانيا : المشكلة مش فى ان الوزير اتغير ( شالوا ألدو وجابو شاهين ) وربنا يخلف ظنى المشكلة فى سنه سادسه ابتدائى وهى بالمناسبة عاملة عقدة لكل وزراء التعليم معرفش ليه ياترى الوزير الجديد من المؤمنين بسنه سادسه ولا الناكرين لها وكأن كل الوزراء الرافضين لها قد سقطوا فى امتحان سنه سادسه فبينتقموا منها بالغائها وكل الوزراء المؤيدين لها جابوا مجموع كبير جدا فيها ( ودى يمكن الشهادة الوحيده اللى جابوا فيها مجموع كبير ) علشان كده بيحترموها المهم لا أحد ينظر علميا عن فائدة المهم الجديد بقى ياترى من المؤيدين ولا لاسمح الله من المعارضييييييييين ( على رأى مسرحية تخاريف لمحمد صبحى ).

ثالثا : جريدة المصرى اليوم العدد الخاص بيوم امس الأثنين 4/1/ 2010 كان عدد جميل ومميز وكلام جميل وتحليلات نقرؤها كل عام واراء من مثقفين وغيرهم وتوقعات وتمنيات بالتغيير والتعديل لكن المشكلة انه ايه بقى عدد وراح فلاتغيير ولاتعديل لدرجة انى اصبحت اعتقد ان الكتاب اصلا غير مؤمنين باللى بيكتبوه او هى مجرد اكلاشيهات وبيفيروا التاريخ انما هو ذات الكلام وذات المعانى ياجماعة المصرى فين والحلم المصرى اصبح ايه دا فى رأيى حاجة تانيه حكتبها من وجهة نظرى قريبا .

رابعا : قذف الناس محافظ بنى سويف بالطوب اثناء مرور موكبه انا لم اتابع المشكلة بس النتيجه انه تم تغييره ؟؟؟؟!!!! والله فكرة ( مقولة المرحوم فؤاد المهندس فى مسرحية حواء الساعة 12 محدش يفهمنى غلط)

خامسا : معرفش حد من القراء الأفاضل قرأ موضوع المجنون اللى بينظم المرور فى المعادى راح مبلغ عنه وطبعا مسكوه لانى عديت من يومين ملقيتوش ولقيت المرور اتلخبط من تانى اللى !!! اللى بلغ ربنا يسامحه .

اصدقائى الاعزاء

شكرا لزيارتكم لمدونتى تمنياتى ان تحوز إعجابكم دائما واتمنى المزيد من تعليقاتكم سواء من يتفق معى فى الرأى أو يختلف وطبقا للمقولة المشهورة شكرا لمن قال نعم وشكرررررررا لمن قال لا ( والحدق يفهم )