الخميس، 31 ديسمبر، 2009

عام سعيد ان شاء الله

الى كل الأصدقاء
كل سنه وانتم طيبين بمناسبة انتهاء عام 2009 وحلول عام 2010 وان شاء الله تعالى يكون عام سعيد ينال كل الناس امانيهم فالأيام تمر والليالى تكر وعجله الزمن تدور ويأتى عام وينقضى عام وكلنا فى صراع مع الأيام فتمنياتى ان ينتهى الصراع ويدوم الوئام ويسود الحب ويرضى علينا رب الأنام

الاثنين، 21 ديسمبر، 2009

فى ظلمة ليله حالكة

فى ظلمة ليله حالكة
فتحت ابواب الشيطان
لم أدر مكانى فى لحظة
فى الجنه ؟؟؟؟
أم سجن عالى القضبان
سرقوا عمرى فى وهلة
فصرت كشجر بلا اغصان
لم يبق منى حينئذ
الا بقايا انسان
لايعرف فى الأرض مكان
دموع تحفر وجدانى
لاأعرف فى الدنيا الان
الا معانى الحرمان
وصارت كل امانى
ان ينسانى النسيان

الأحد، 20 ديسمبر، 2009

ادذواج فى الشخصية

طبعا ياأصدقائى حينما تقرأون العنوان ستعتقدون اننى قد اخطأت فى كتابه الذال مكان الدال ولكنى متعمد هذا الخطأ لانه تم ذكرة فى احد الاعمال الفنية على لسان أحد فنانى الكوميديا - لست متذكرا اسمه - ولكن اعجبنى التعبير وهو لاشك ينطبق علينا او فلنقل يتطابق معنا والعارفون لعلم الإقتصاد يعرفون الفرق بين الإنطباق والتطابق .
عموما المسألة ومافيها اننى فتحت الويب سايت الخاص بمركز المعلومات ودعم اتخاذ القرار بمجلس الوزراء وللحق فهو ويب سايت محترم جدا زاخر بالمعلومات والاخبار والدراسات والألوان والاخبار الطازة اللى على الهوا مباشرة بصراحه من يدخل على هذا السايت من الخارج اكيد لن يصدق ان عندنا فى مصرنا المحروسه هذا الكم الكبير من التخلف الإدارى والفساد فى الجهاز الإدارى للدولة وهذا التضارب فى القرارات بين الوزارات وهذا الزخم من استيلاء مافيا كل شئ على كل شئ وهذا الكم من استيلاء الدولة على اراضى المواطنين وكذا ايضا استيلاء المواطنين على اراضى الدولة - يظهر ان اجهزة الدولة بتستولى على اراضى الغلابه نكاية فى اصحاب النفوذ وبتطلع لسانها اهه مش انتوا استوليتوا على اراضى الدولة فى شرم الشيخ طيييييب انا بقى حستولى على اراضى الغلابه فى طريق الإسماعيليه واهو كله ناحية الشرق وهذا الكم من القوانين والقرارات واللوائح والتعليمات والكتب الدوريه المعمول بها من ايام المرحوم مصطفى باشا النحاس - اه والله - لائحة بدل السفر صدرت بالمرسوم الملكى سنه 1948 ولم تتغير .
عموما طبعا الراجل الاجنبى ابو برنيطه لما يدخل على الويب سايت بتاع مجلس الوزراء طبعا حيقول علينا لما يقرأ مدوناتنا شعب مفترى على حكومته صحيح شعب مايتمرش فيه الخير ماهو ويب سايت زى الفل اهه امال همه عايزين ايه يستاهلوا بقى الضرايب العقاريه المفروضه عليهم .
بس برضه الخواجه معذور ميعرفش ان احنا عندنا ادذواج فى الشخصية
سلام

الخميس، 17 ديسمبر، 2009

انادى عليكى

حبيبتى
ناديتك بكل مافى قاموس الحب من كلمات الترجى
و كتبت فى جماللك قصائد ولم تردى
أيكون جمال عيناك سبباً فى أن تصدى
ويحى 000 لماذا لم تردى ؟
أى انسان ظننتيه أنا ؟ فلم التحدى ؟
ياليتك تدركين معنى الحب ولكنك لاتدرى
أى كلمات تحرك فى نفسك الهوا ؟ فمعك لاشئ يجدى
كنت أبث لكى مع أنفاسى حبى ووجدى
ولكن معك لاشئ يجدى
حبك اصبح لى سقوط قنوط وتردى
وبعد 000000
أى حب تريديه من انسان لم يلق منك سوى التصدى

الاثنين، 14 ديسمبر، 2009

رسالة

حبيبتى أتدرين كيف يبدأ الأنسان حباً؟
أنه كمن يبنى بيتاً
كمن يعلى صرحاً
كمن يكتب شعراً
حبيبتى لقد بدأت حبى لكى
فهل تعلمين
ام لاتدرين ؟
بل تدرين
لقد بدأت أقرأ فى عينيكى اليقين
وكنت ألمس فى يديك الحنين
وأعلم أنك بى تشعرين
أم أنى بعد كل هذا واهم حزين ؟
فهل ياحياتى للحب أضيئ الشموع ؟

أم أمضى بلا رجوع ؟

السبت، 12 ديسمبر، 2009

هلوسه خيار

-كل الخيارات مفتوحة –
عبارة تردد دائما على لسان قادة الدول سواء كانوا سياسيين أو عسكريين عند سؤالهم عن رأيهم فى موقف ما أو مشكلة ما تلم ببلادهم .
المهم ان هذه العبارة انتقلت من لسان هؤلاء الى ألسنه اخرين واصبحت مضغه فى كل الأفواه واكثر حاجة اضحكتنى ان هذه العبارة وردت فى مجال الكورة ايضا فعند سؤال رئيس اركان حرب نادى الزمالك وقائد الجيوش الزملكاويه عن رد فعل الزمالك حيال ازمة اللاعب احمد عبد الملك لاعب حرس الحدود ومدى عدم قانونية اشتراكة فى مباراه الفريقين التى جرت من مده قام سيادته قال كل الخيارات مفتوحه طبعا هو يقصد اما لاللجوء لأونكل بلاتر مدير الفيفا او الإنسحاب من الدورى – طبعا هو قال ان كل الخيارات مفتوحه فجاء فى زهنى ساعتها وانا سرحان أجلس فى النادى اشرب النسكافيه الجميل منتظرا انتهاء تدريب كرة السله لاولادى انه يمكن ان يقوم بحركة حربية سريعة مثلا وقيام كوماندوز الزمالك مثلا بعمليه سريعه لاختطاف اللاعب او محاصرة نادى حرس الحدود نفسه ووالبدء بالحرب او حتى اللجوء الى الأمم المتحده لتطبيق البند الثانى من الباب السابع من ميثاق الامم المتحدة التى تجيز التدخل العسكرى لحل الأزمه ثم التجهيز للحصول على موافقة المجتمع الكروى لضرب حرس الحدود اسوة بما فعله بوش مع العراق او افغانستان .
والمشكلة الاخرى التى طرأت لذهنى ايضا هو ارتفاع اسعار الخيار ماهو الطلب عليه كتير بقى كل واحد بيقول الخيارات مفتوحه الخيارات مفتوحه من اول رؤساء الدول حتى لاعبى الكورة وتيجى علينا احنا الغلابه ومنعرفش ناكل سلطه ماهو الخيار غلى والطماطم مجنونه يبقى فاضل ايه ؟؟
معلش ياجماعة مش قولتلكوا هلوسه خيار !!!!
ملحوظة : على فكرة انا زملكاوى


الثلاثاء، 8 ديسمبر، 2009

تاه الطريق

قد يضيع الطريق من بين قدمينا أو يصير الحب كالماء يتسلل من بين يدينا قد يكون القدر قد كتب الفراق علينا لهذا :
فقد تاه الطريق منا وسط الضباب
ضاع العمر فينا وانكسر الشباب
صارت ذكرى حبنا ماضى وارى التراب
كانت أمانينا حقيقة تلاشت كالسراب
كل خطوات الحياه تاهت ... الى اين ؟
ولو كنا نريد الحب لإلتقينا
ولكنا ابينا
فلتعلمى فقد تاه الطريق منا مهما مشينا
ضاع الحلم فينا
وماتت أزهار الخميلة
وليالينا الجميلة
وإن شربنا من كأس الحب فلانحن ارتوينا
ولاعاد الحب حباً مهما التقينا
أو مشينا
فى طريقنا خطوات هوينا
فالحب لن يعود لإنا إنتهينا

الخميس، 3 ديسمبر، 2009

المجانين فى نعيييييييم

اخيرا انتهى عيد الأضحى المبارك كل عام وانتم بخير واللى اكل لحمه ربنا يوفقه واللى مااكلش وهم كثيرون ربنا ينفخ فى صورتهم وياكلوا عموما انا هنا اعرض موقف غريب وعجيب شاهدته بعينى من فترة وراقبته باستمرار ووجدت فيه شئ ان كان غريبا فهو ايجابيا ايضا
كلكم طبعا تعرفوا شارع الكورنيش عند المعادى فى الإشارة التى تلى الجراند كافيه - المهم الإشارة دى فيها تقاطع الغريب بقى ان الذى يسيطرعلى هذا التقاطع ويسير الأمور فيه راجل مجنون - اه والله مجنون - رجل ضخم الجثه عريض المنكبين اشعث اغبر يحمل في يده اليمنى عصا اسود طويل وغليظ - المهم الراجل دا هو من يقوم بتنظيم المرور فى هذا التقاطع والمهم بقى ان الناس بتسمع كلامه وتقف عندما يشير بالتوقف وتسير عند قيامه بالاشاره - طبعا اللى مش مصدقنى يروح ويشوف - المهم كمان طبعا السيارة المخالفه للتعليمات التى يصدرها هذا الرجل يقوم بضرب السيارة بالعصا اللى فى ايده على زجاج السيارة او اى مكان تصل له العصا من العربه وبالتالى من مبدأ اللى خاف سلم الناس كلها بتسمع كلامه لا والاهم ايضا ان سيارات الشرطه نفسها بتسمع كلامه وتقف وتسير طبقا لتوجيهات عصا هذا الرجل .
طيب السؤال هنا طالما ان الناس لاتحترم رجل المرور العادى الغلبان والمرور فى مصر بقى بالقوة ، وطالما ان مثل هذا المريض النفسى الناس بتسمع كلامه - طيب ليه منفكرش نسلم اشارات المرور للمجانين - تجربه يمكن ينصلح حال المرور عندنا
ممكن اسمع اجابات ؟؟؟
وعلى رأى ابو ضحكه جنان - الراحل اسماعيل ياسين -
المجانين فى نعيم

الأربعاء، 25 نوفمبر، 2009

كل عام وانتم بخير

الى كل اصدقائى كل عام وانتم بخير بمناسبة عيد الأضحى المبارك وطبعا اعتقد ان اكل اللحمة سيقوم بتعطيل مراوح العقل عن التفكير واليد عن الكتابه وحتى العين عن القرأءه وبالتالى الى لقاء بعد العيد وياريت كل واحد كده بعد العيد يكتب عمل ايه

الاثنين، 23 نوفمبر، 2009

حوار مع فيروز

بينى وبين صوت فيروز عشق ودوما اغانيها تجعل الشجون تنطلق وامس تخيلت هذا الحوار بينى وبينها
هى قالت :
أعطنى الناى وغنى
فالغنا سر الوجود
وانين الناى يبقى
بعد أن يفنى الوجود
انا قلت :
ياحياتى التاى معكى
فاعزفى لى الألحان
وخذى يدى بيدكى
نحيا فى كل الأزمان
هى قالت :
هل اتخذت الغاب ثملى
منزلا دون القصور
فتتبعت السواقى
وتسلقت الصخور
انا قلت
لم أر الغاب مثلك
فعيناكى كل القصور
فتعالى من جديد
نمد للحب الجسور

الخميس، 19 نوفمبر، 2009

وانفض المولد - أين مصر

أسمحوا لى ياأصدقائى ونظرا للأهمية التى اكتسبتها مباراه كورة قدم ان اتناولها مرة أخرى - بداية نبارك لفريق الكرة الجزائرى - فقط فريق الكورة من اللاعبين لانهم لاذنب لهم فيما حدث فكلهم محترفون ويعيشون بعيدا عن الجزائر وستدركون معنى ماقصده فى نهاية المقالة - على فوزهم على منتخب مصر لكرة القدم - منتخب الكورة فقط أما بعد
فقد انفض المولد وربح فيه من ربح واقصد هنا ربح سياسيا واقتصاديا وخسر فيه من خسر وايضا اقصد سياسيا واقتصاديا وطبعا معروف من الرابح ومن الخاسر ؟؟؟
ولكن ماحدث قبل وبعد المباراه يستوجب وقفه قوية أمام الأحداث وقفه تستوجب الشدة ومن منطلق اننا كما ندعى دائما الشقيقه الكبرى للعرب فمن واجب هذه الشقيقه وبما انها كبرى ان تعاقب الأشقاء الأصغر من باب ان مسئوليه تعليم الأدب هى للكبير ولهذا ومن المنطلق نفسه وجب علينا ان نبدأ إجراءات تعليم الأدب لكل من يتطاول علينا فنحن الكبار فأنا قد يهزمنى ابنى فى مباراه كورة بلاى ستيشن ولكن هذا لايعطيه حقا فى التطاول على فانا مازلت الأب وهو مازال الأبن .
ان ماحدث من الجمهور والحكومه الجزائرية يستوجب وقفه من مصر لتعليمهم الأدب من واقع اننا الشقيقة الكبرى التى دوما مانتشدق بها دون ان نفعلها .
الأمر الذى حدث ويحدث وسيحدث دوما يستوجب وقفه فعليه وليست اعلاميه كلاميه - محتاج قرصه ودن جامده - حتى نعود مرهوبى الجانب والأمر الذى اطلبه هنا يتعدى حتى موقف استدعاء سفير وتوبيخه لا !!! انما يتعدى ذلك أن يصل الأمر الى الإيذاء وفى حالة الدول ايذاء اقتصاديا وقويا وفعالا حتى يشعر هؤلاء الصغار أنهم بدون الشقيقه الكبرى لاشئ وسيظلون لاشئ فنحن من صنعهم دولا بعد أن كانوا مجرد مجموعه من البشر يعيشون داخل منازل من طين .
ولنبدء مثلا بشركة المقاولون العرب فماهو حجم استثماراتها فى الجزائر ؟؟؟ 5 مليون دولار ؟؟؟؟ انه مبلغ يتم انفاقه هنا فى حفلات ترفيهيه فلنسحب الشركة فورا ولنسحب رجالنا من هناك ولتعود كافة الشركات المصريه من هناك ولنفتح افاق استمثارية فى افريقيا التى تحترمنا وتقدرنا فلم نسمع يوما ان مصر حينما فازت على السنغال او الكاميرون ان تعرض مصرى هناك للإهانه وهى دولا واعدة فلنعيد توجيه خريطه الأستثمارات المصريه بما يحقق عائدا اعلا ويحفظ ايضا كرامتنا وانا ارى انها خريطه افريقية .
أن يقوم اتحاد الكورة المصرى باعادة فتح ملف الإهانات وليتقدم به للإتحاد الدولى لتكون مواجهتنا الرياضيه مع تلك الدول على اراض محايده أو بلا جمهور حتى .
ولنوجه تحذيرا شديد اللهجة للحكومات التى لاتحترم مصر او شعبها ذو الفضل عليهم بأن اى تعرض للمواطن المصرى اي كان فى اى وقت سيواجه بالشدة والتى تستوجب معها اجراءات التأديب القاسى - كما فعلها السادات زماااااااااان - وان كنت ناسى افكرك .
ان ماحدث من الجمهور الجزائرى يجعلنى اؤكد على ماأنا مقتنع به ان كل الدول - إن جاز ان نطلق عليها دول - التى لمصر فضل عليها تغار منا وتنكل بنا - صحيح الخطأ خطانا ايضا لأننا سمحنا لهم بذلك ولكن ايضا فى حالة الجزائر خصيصا جعلنى أتناول الموضوع من منظور قد يكون مجنونا ولكنى اراه صحيحا نظرا لما حدث !!!
لقد ساعدت مصر الثورة الجزائرية فى أوائل الستينيات من القرن الماضى للتخلص من ربقة الإستعمار الفرنسى بالمال والسلاح والأفراد ولكن على مايبدو لى أن هذا لم يكن مطلب الشعب الجزائرى وارى انه كان يفضل الإستعمار الفرنسى على الإستقلال ولهذا فقد كرهوا مصر لانها من ساعدتهم على الإستقلال ؟؟؟ هل يمكن ان يكون هذا هو السبب ؟؟؟؟ منتظر رأيكم

الثلاثاء، 17 نوفمبر، 2009

أمجاد ياعرب أمجاد

طبعا يااصدقائى انتوا عارفين انا حتكلم فى ايه من العنوان !!!! لو أن حشد القوى الإعلامية الذى يتم حاليا لمباراه كورة يتم لصالح قضايانا الوطنيه الأخرى لكان لنا شأن أخر .
ورغم اننى من الرافضين لنظرية المؤامرة إلا اننى أجد نفسى مضطرا لقبولها هنا نعم هى مؤامرة ولكن مؤامرة على انفسنا بأيدينا !!! أو فلنقل بيدى لابيدى عمرو - إلا بالحق مين عمرو دا ؟؟؟
عموما أنا تعمدت أن أكتب هنا قبل المباراه الفاصلة التى من خلالها سيتم تحرير القدس !!!؟؟؟ أقصد تحرير كأس العالم عموما المشكلة وكما سبق وأن طرحت مرارا وتكرارا لماذا هذا العداء بين العرب ليس القادة أو الساسة ولكنه عداء خفى بين الشعوب العربية وكأن عوامل التوحد هى ذاتها عوامل الفراق ؟؟؟ وكا سبق وأن طرحت فى اصدار سابق أننا لانتعلم من غيرنا ولانتعلم من أخطائنا وأعود واكرر أن الفرق بين الأنسان والفأر أن الفأر لايتعلم من التاريخ ويظل يواجه القط ليأكله القط منذ ان وجد القط والفأر فلا الفأر تعلم من أجداده الفئران ولانحن تعلمنا من أخطاء الأجداد ؟؟؟!!! عموما سيظل هكذا حالنا وسنظل نتغنى دوما ودائما وابدا أمجاد ياعرب أمجاد - وعلى رأى شادية أغانى أغانى وبس مبخدش منك غير اغانى !!!!!! الله يرحمك يامدبولى

الجمعة، 13 نوفمبر، 2009

المعركة

فجأه وبدون مقدمات شعرت انى لابد وأن أكتب على هذا الهزل الذى سيحدث فى مصر بعد سويعات قليله وهو مباراه الجزائر ، مش عارف ابتدى منين ابتدى من أن الإعلام وكافة الأجهزة نجحت نجاحا باهرا ان تحول كل اهتمامات المصريين بمختلف فئاتهم ومشكلاتهم وحياتهم وفقرهم وجهلهم وانفلونزاتهم الخنزيريه وفوضى مرورهم وتعليمهم الى موضوع واحد بس هو ازاى نكسب الجزائر وخطط سريه وعلنيه واناشيد وطنيه وبرامج اعلاميه حتى الراديو الى ان الهدف الأسمى هو هزيمة الأعداء وتحرير كأس العالم من ايدى الخونه الذين احتلوه كأس العالم بدل القدس وفلسطين ؟؟؟
ولا أبدأ بالشعور العربى المدمر الذى نجح اعدائنا فى زرعه فى نفوسنا ووصل الأمر الى أن فوز او هزيمة مباراه كورة اصبحت تعادل معركة حطين ؟؟؟؟
أنها المعركة المنتظرة التى اصبحت حديث الناس وفى الأخر لو كسبنا كل لاعب ومدرب ومدلك وعامل غرفة الملابس والراجل اللى بينفخ الكور حيتحين بمبلغ لايقل عن مليون جنيه بينما الدكتور عصام حجى عالم الجيولوجيا المصرى فى امريكا لم يشاهده احد ولم يتحدث احد عن انجازاته ؟؟؟؟
طيب الناس الغلابه اللى رايحه الأستاد تشجع وطبعا حتتبهدل وتنضرب من كل حته واروح الأستاد من الساعة 10 الصبح علشان الماتش الساعة 7 مساء حينوبهم ايه ؟؟؟
هل اختصرنا الوطنيه فى ماتش كورة ؟؟؟؟ طيب لو اتغلبنا حيحصل ايه ؟؟؟؟ ولا حاجة حيرجع الدورى من تانى وننسى
طيب لو كسبنا بقى ؟؟؟ حنشوف مبالغ تنفق بالهبل اشى معسكرات اعداد ومكافئات وكأننا حنروح نكسب كاس العالم طيب ماايطاليا كسبت كاس العالم اللى فات حصل ايه ؟؟؟؟
ياناس حرام عليكوا دا الحماس دا لو اتوجه الى اى حاجة تانيه اى حاجة ان شالله يكون المرور البلد حتكسب اكتر
اقول ايه واتمنى ايه بصراحه اتمنى يحصل هدوء وطبعا الهدوء دا يعنى حاجة واحده انتوا عارفينها

الثلاثاء، 10 نوفمبر، 2009

فى الغربة تناجينا


بعيون الحب تهامسنا تلامسنا
وبغدر الزمان بتاعدنا
حاولت ان انسى دنياكى بما فيها
اثار حبك تبعتنى فى
وطنى واصرت ان تجمعنا
فى كل خطوة اخطيها
يانفس دنيتى خانتنى
وان كان قلبى لازال يناديها
هربت من دنياكى كي انسى
ولكن النسيان أبى ان انسى
وظل قلبى يناجيها
حلم مستحيل يملؤنى
يطاردنى
ان فى الدنيا الاقيها
زفرات القلب تفضحنى
حاولت عن العيون اخفيها
فلم افلح وظلت عينانى تفضحنى
وصار حبك فى نفسى يواسيها

الأحد، 8 نوفمبر، 2009

قضايا متنوعه - أسئلة ومحتاج اجابات

المره دى ياأصدقاء وجدتنى ابحر فى العديد من القضايا التى شدت انتباهى ولو تحدثت فى كل منها على حده سأنسى ماكتبته فقلت فى نفسى طيب ليه مااكتبها كمقتطفات صغيره وانا اعلم جيدا انكم ستدركون مااعنيه واعانيه .
فالنبدأ بقضية هامة وهى إعتذار السيد عباس أبو مازن عن الترشح لرئاسة الدولة الفلسطينيه لفترة رئاسة قادمة - ياسلام منتهى الشعور بأهمية الدميقراطية وتداول السلطة - هل هذا صحيح ؟ أم مناورة سياسية ؟ طيب اذا اراد واصر سيادته على موقفه هل بعد ذلك سيظل فى فلسطين أم سينتقل الى بلاد بعيده يعيش عيشه رغدة جميله مع زملاء الكفاح فى الكاريبى ؟؟؟؟ وياله بقى اشترى دماغى بلا هم ؟؟

القضية الثانية هى قضية التعليم وانفلوانزا الخنازير هل يعقل ان يصل مدى العشوائية الى ماوصل اليه ؟ فصول ومدارس تغلق ومدارس مستمرة طيب ذنب الطلبه اللى مدارسها اتقفلت ايه ؟ طيب هل سيعاملون فى الأمتحانات مثل المنتظمين ؟ طيب الكل مركز على طلبة المدارس طيب فين طلبه الجامعة ؟ هل سيقفلون الجامعة او الكليه التى سيظهر وينتشر فيها المرض؟ يعنى من الاخر ايه الحل الذى ستنتهجه وزارتى التعليم والتعليم العالى لتحقيق المساواه بين الطلاب ؟ وعلى فكرة تطوير التعليم اللى بيتكلموا عليه لسه لم تظهر له معالم ؟

القضية الثالثه وهى قضية شخصية الى حد ما وان كانت برضه عامة شركة نوكيا المبجلة ووكيلتها شركة رايه - مقلب كبير عندى تليفون ماركة نوكيا 6085 تعطل لسبب ما الله اعلم المهم وهو فى الضمان ذهبت الى شركة رايه وبعد جهد وعرق وصوت عالى تم استبداله واذا بالجديد ايضا وهو مازال فى الضمان يتعطل هو الاخر فيرفضون اصلاحه او استبداله والحجج واهيه طبعا اصل التيار كان عالى حرق البورده ودا مش فى الضمان طبعا العمليه نصب فى نصب والموظفون معذورون فهذه سياسية الشركة ولذلك فكرت فى عمل حملة على الفيس بوك ضد هذه الشركة حتى يتم سحب التوكيل منها فهل تؤيدوننى ؟؟؟ وللأسف ان مايأتى الى مصر من هذه الماركات هو اسؤ مايتم تصنيعه فى الصين اذا الوكيل هو المسؤل وهل نوكيا فى مصر هو ذات نوكيا فى الكويت مثلا طبعا لأ لانهم عارفين ان الكويت ناس محترمين يحترمون عملائهم اما فى مصر فحدث ولا حرج والأقوى من ذلك يقولون لى روح اشتكى لجهاز حماية المستهلك هل وصلت الإستهانه بهذا الجهاز انهم يعلمون انه جهاز لايسمن ولايغنى من جوع - مالوش لزمه يعنى ؟؟؟

القضية الرابعة هى قضية الدكتور عصام العالم المصرى ضمن فريق البحث عن المياه فى المريخ طبعا معاناته مع البيروقراطية المصريه التى تدفع علامائنا للهروب بغير رجعه من مصر مسلسل لاينتهى بداية من زويل نهاية بالدكتور عصام حجى ماهو الحل ؟؟؟ كيف نحافظ على ثروات العقول ؟؟؟ لا أحد يهتم أو يتحرك - دماغك يعنى احنا حنستفيد ايه من ميه المريخ - طب ماهو ياجماعة فيه ميه فى الصحراء الغربية ؟؟؟ ياراجل مالنيل موجود وخير ربنا كتير
عموما دى بس قضايا بسيطه - كبيسه واجهتها فى يوم وااااااااااااحد

السبت، 31 أكتوبر، 2009

بلاغ الى النائب الخاص

عادة مايكون الكلام هو بلاغ الى النائب العام للإبلاغ عن جريمة او حدث يستحق ان يتم التحقيق فيه ولكن ولانى ارى أن هناك احداثا كبيره وكثيره داخليه وخارجية تستحق الإبلاغ عنها منها على سبيل المثال مايفعله وزير التعليم بنا وفينا وعلينا اذا كان المخطط هو غلق المدارس علشان انفلوانزا الخنازير طيب ليه فتحوتوها من الاول ؟ اسمحو لى ان اجيب علشان طبعا هذه المدارس ولاسيما الخاصة تفتح وتاخد المصاريف وبعدين مش مشكله بقى فيه دراسه مفيش دراسه مش مهم والأهالى تدفع والأولاد لايستفيدون مش مهم برضه المهم تدفع وخلاص
طيب وحاجة تانيه لما تيجى تجدد رخصة العربية تلاقى حاجة غريبه جدا ومخالفه للدستور وطبعا هذا نتاج الأرقام الجديده التى لامعنى لها وسألت العديد والعديد من مختصين فى المرورعن معنى هذه النمر ولا إجابه المهم سعاتك تروح تسدد الضريه على السيارة والمخالفات والذى منه وبعدين تروح تستلم الرخصخ يقولك ادفع مبلغ 14.2 جنيه وتشوف الوصل تلاقى مكتوب حاجات عجيبه ال منهم رسم كاسيت سيارة ورسوم اخرى تم اختراعها طيب ماانا فى الاول دافع ضريبه السيارة والرسوم هى احد انواع الضرائب يعنى انا بدفع ضريبه مرتين وهذا مخالف للدستور لانه لايجوز ان يدفع ضريبه مرتين على ذات الشئ ( اعذرونى فى الألفاظ القانونية لانى مش قانونى )

طيب حاجة تالته ولذيذه قوى أل ايه ان الدراسه سيتم استكمالها على الأنترنت يعنى لازم يكون عندك كمبيوتر ونت علشان تاخد الدروس وتذاكرها طيب دا ممكن فى المدارس ام فلوس طيب والمدارس ام بلاش اللى فيها 100 طالب فى الفصل واللى اصلا اهالى التلاميذ وربنا معاهم طبعا بيلاقوا رغيف العيش بالعافيه واللى اصلا ساعات كتيره بيفكوا الخط بالعافيه حيدخلوا بقى على النت ازاى ؟؟؟؟ يعنى تحس ان ياأما المسأله نصب فى نصب او ناس بتاخد قرارات وهى مش داريانه بحالنا يعنى تحس مثلا ان وزير التعليم البريطانى هو اللى بياخذ القرارات دى
وغيرها وغيرها وبما ان القضايا كتير وشائكه ومخلبطه فقلت بقى نعمل كمان نائب عام خاص يبصلنا فى مشاكلنا ونخلى النائب العام للقضايا الكبيره والاهم

الخميس، 29 أكتوبر، 2009

دعانى النسيان

دعانى النسيان كى انسى
فلم أنس بل مازلت أهواكى
بعيدا عن كل شئ فى الدنيا
مازلت لاأذكر ياحياتى سوى عيناكى
معين الدمع فى العين قد نضب
ومازالت العين تدمع لهفة للقياكى
وعاء الصبر قد نفذ من القلب
وسهام عيناكى مازالت ترمى فأهواكى
ياليت ينفع فى الدنيا فرار
لكنت فررت من براثن حبى لهواكى
ولكن ماعدت اقوى على النسيان
مازالت اشباح الذكرى تطاردنى
وكأن جموح قلبك لايكفى لانساكى
ثار موج الذكرى فى القلب حين راتك عيناى
وصار الصدر لاينبض الا عشقك باعماقى
بات ينادى عليكى كل جسدى باشواقى
أن عودى فلم يفلح النسيان معى لانساكى
سأنادى بكل مافى لوعة حبى عليك
أن ارجعلى وانظرى ماجنته يداكى عليكى

الخميس، 22 أكتوبر، 2009

ألوم كبريائى

ألوم كبريائى كيف لم يستطع أن يمحو حبك فى قلبى
كيف لم ينتشل القلب من غيابات سجن حبك و الضياع
ويعلمنى معنى الوداع
ولكن ................
ولاأنى أحبك فشكوت لوعة قلبى اليك
وسأحلم دوما أن اكون الحلم لك فى مقلتيك
سأنادى بكل مافى لوعة حبى عليك
أن انظرى هذا ماجنته يديكى
حطام قلب من قلب قاس
يرى حبى محطما ولاتحمر من الخجل وجنتيه

الثلاثاء، 13 أكتوبر، 2009

لماذا عدت

لماذا عدت ياحب توارى
بين طيات السنين وضجيج السكارى
كيف عاد الحب من قبره
بعد أن كان فى التراب قد وارى
ظلمات الكهوف تأوى الحيارى
وعدت انت كضوء للقهارى
قالوا عن حبى كثيراً كثيراً
عانيت منه أنينا انيناً
ورغم ذلك عدت
وكأن قلبى كقلب العذارى
يحبك ولم يزل يبغى النهار
فلا ضوء الشمس يأتى
ولا اليل يبغى الإنتظار

السبت، 3 أكتوبر، 2009

الإصدار المئوى

أصدقائى الأعزاء : فرحت جدا ان كان الإصدار السابق هو الاصدار رقم 100 فى مدونتى والتى تناولت موضوعات شتى سواء سياسية او اقتصادية او شعرية او حتى رياضية ومااسعدنى اكثر هو تعليقاتكم الجميلة على ماكتبته فى هذه المدونه وماسيسعدنى اكثر ان ترسلوا لى تقييما شاملا لما كتبته بمعنى اخر هو رايكم فى مااكتبه واتمنى وكما تعودت دائما ان اتلقى منكم ردودا عليها واشكركم شكرا عميقا

الأربعاء، 30 سبتمبر، 2009

بين الفنان والمستشار المؤامرة والإستقالة

اصدقائى الأعزاء اولا انا شاكر جدا ليكم بشأن ردودكم الجميلة التى تدل على عمق الإخلاص والصداقة بيننا وهو شئ افتخر به واعتز له وامتن تماما
نعم مازال الانترنت لايعمل منذ نحو 20 يوما تقريبا وبالتالى فقد اشتريت انترنت متنقل والعوض على الله فى شركات الدى اس ال المصرية عموما انا سعيد بالكتابة مرة اخرى واتمنى دوما استمرار التواصل .
نيجى بقى لموضوعنا لقد استثارنى فى الأيام الأخيرة الأحداث المتلاحقة على الساحة فى مصر وللوهلة الأولى وجدت ان اهم تلك الاحداث هى استقالة السيد المستشار نائب رئيس محمكة النقض وكذا عدم اختيار الفنان ؟؟ فاروق حسنى لمنصب مدير اليونسكو .
الناظر لهاذين الحدثين فى البداية قد لايجد بينهما رابط او قاسم مشترك وفكرت ان العب لعبة من سيربح المليون واطرح السؤال ماهو الرابط بين الحدثين ولكن بدون اختيارات ؟
عموما ولكى اريحكم جميعا سأتولى اجابة السؤال من وجهة نظرى الشخصية والتى تعبر عن جموح تفكير ولكنى مقتنع به تماما وارجو ان يكون محل تعليقاتكم
مبدئياً نتحدث عن استقالة السيد المستشار واتوجه اليه بسؤال لماذا الإستقالة فى هذا التوقيت بالذات ؟ هل سيادته قد اكتشف فجأة مشكلات القضاء وعدم استقلاليه القضاء عن السلطة التنفيذية وسيطرتها على القضاء المصرى ؟؟؟ اذا لماذا صبر طوال هذه المدة ولم يستقل الا قبل انتهاء مدة خدمته باحدى عشر شهرا فقط ولماذا لم يتقدم بها من قبل ؟ ولماذا 11 شهر ؟؟؟ والإجابة فى رائى الشخصى المتواضع هو أن هذه الفترة تحديدا لن ينتقص من معاش واستحقاقات سيادته شئيا وبالتالى فلاتضحية بدخل مادى نظير الإستقاله وطبعا العاملين فى الحكومه سيفهمون وجهة نظرى فالمعاش يصرف على اجمالى مايتقاضاه كمرتب اما باقى المبالغ والتى تكون اكثر من المرتب فلن يحصل عليها عند بلوغ سن المعاش اذا هو يعلم تماما ان معاشه لن يتغير بالإستقالة وقبل 11 شهر اى اقل من سنه اذا اين التضحية فى سبيل القضية ؟؟ الأمر الثانى هو البحث عن دور بعد المعاش الطبيعى ان من يحال للتقاعد انتهى دورة فى العمل ولاسيما فى الدولة ولكن بعض الناس يسعون الى استمرار التوهج والتألق وان يكون حديث الناس والصحافة والتليفزيون والبرامج ان يبنى لنفسة دورا سياسيا ومع عدم اختلافى معه فى اقضياياه المطروحة ولكنه لم يضحى فهو قد ضمن معاشة ومكافاته اذا اذهب للدور الاخر واتبنى قضايا مثيرة للجدل تجعلنى نجما مستمرا والذى يحزننى اكثر أن المعارضين دوما ايضا مازالو شبابا فوق السبعين باستثناء ايمن نور شفاه الله ايضا لم ار سياسيا فى مصر بنشاط اوباما وشبابه وقوته يارب نلاقى .
نيجى على موضوع فاروق حسنى فعندما لم ينجح فى تصويت الجولة الاخيرة قرات عنوان جريدة الجمهورية بالبنط العريض ( المؤامرة ) ذكرنى هذا العنوان بجرائد العدوان الثلاثى على مصر فقد كتبت برضه الجمهورية ذات العنوان بذات البنط وكأن الزمن توقف عندنا على نظرية المؤامرة ولم نستوعب حتى الأن ان العالم يحكمة المصالح فاذا تكتلت دولا معينه لصالح مرشح معين فلانه سيحقق مصالحها او حتى ان هناك صفقة بين هذه الدول سيتم بمتقضاها تحقيق مصلحه لهذه الدولة اذا فاذا كنت انا مندوب فرنسا مثلا ووجدت ان امريكا تريد ابعاد فاروق حسنى نظير قيام امريكا بمنحى ميزة معينه اقتصادية مثلا مقابل عدم تصويتى له افلا يكون من الوطنيه ان اسعى لتحقيق مصلحة بلدى ، اذا نظرية الخيانة التى تشدق بها البعض نظرية معكوسه لانى كمندوب لفرنسا اذا صوت لصالح فاروق حسنى سأكون قد خنت مصلحة دولتى !!! .
ياجماعة السياسة مصالح وذا استمر تفكيرنا وثقافتنا على ان الكل متأمر علينا فاننا فى هذه الحالة مازلنا نعيش عصر الجعجعة الكلامية التى اوردتنا التهلكة فيما مضى ، اما اذا كنا نتخيل ان فرنسا ستضحى بمصلحتها لصالح المبادئ فاننا نعيش فى عصر الفرسان الذى ولى .
يجب علينا ان نفهم جيدا ان السياسة مصالح وطالما اننى غير قادر على تحقيق مصالح الاخرين فلايجب ان انتظر منهم معروفا او دعما .
هذا يقودنا الى السؤال المطروح واجابته اننا امام تناقض فكرى غريب بين الداخل والخارج فى الداخل نسعى لتطبيق السياسية وانها مصالح واستقالة السيد المستشار ماهى الا تطبيق لهذا المبدأ وخارجيا ننتظر دعم الاخرين من منطق الفروسية الذى لن يتحقق لانه بلا مصالح .
الرابط الثانى هو المراهقة السياسية فى الحالتين فالأول يلعب على ذات القضايا التى نعرفها كلنا ومطروحه منذا اكثر من عشر سنوات وهى التوريث والفساد اذا لاجديد لافكر لاحل فقط عرض المشاكل واننى سأقف ضد التوريت طيب ماكلنا ضد التوريث مستقلتش ليه من زمان وانت بصحتك علشان تقف مع القضية ؟؟
والثانى رغم وجودة كوزير فى مصر منذ نحو اكثر من عشرين عاما الا انه لم يدرك حتى الان قواعد اللعبة السياسية وتخيل انه بالوسامة وارتداء البابيون والبدلة السوداء والأبتسامة الخجولة واللغة الفرنسية سيكسب الجولة ولم يضع فى حسبانه حسابات المصالح التى هى اصل اللعبة .
الفرق بين الأنسان والكائنات الاخرى ان الإنسان يتعلم من التاريخ اما الاخرى فلا بدليل انه منذ الالاف السنين القط يأكل الفأر وهذا الفأر لم يتعلم ان لايقف امام القط

الثلاثاء، 22 سبتمبر، 2009

كل عام وانتم بخير

أصدقائى الأعزاء اولا كل عام وانتم بخير بمناسبة عيد الفطر المبارم اعادة الله عليكم جميعا بالخير اتحدث اليكم من بلد المعز مصر التى استقبلتنى بانقطاع خدمة الأنترنت من يوم وصولى يعنىلا مش عارف انا اللى وشى وحش ولا هو دا الأستقبال المعتمد عموما النت عندى مفصول من حوالى 10 ايام وانا اتحدث هنا من النت كافيه ولم استطع ان امنع نفسى من الكتابة لكل اصدقائى شاكرا لكم تعليقاتكم على قصة الجنينيه والتى اسعدتنى جدا وكذلك تهانى العيد عموما انا الان فى الأسكندرية اجمل بلد فى العالم فى راى وحين العوده اتمنى ان يطون النت قد
عاد الى منزلى اشكركم مرة ثانية والى لقاء قريب

الخميس، 10 سبتمبر، 2009

الجنينه - كلاكيت تانى مره

عاد محمد من عمله فى رئاسة الحى مهموماً مكتئبا ودخل منزله فى الحارة الضيقه وكان الجو خانقا حارا فى احد أيام شهر اغسطس
سألته أمه: مالك يامحمد؟


فنظر اليها وقال مفيش حاجة انا داخل انام مضايق شويه

فسالته امه: انت مش حتتغدى؟

فقال لها: لا مش دلوقتى لما اصحى

نام محمد نوما عميقا ثم استيقظ على صوت امه اصحى يامحمد حتتأخر على الشغل ايه انت نايم زى القتيل؟
فاستيقظ محمد مسرعا وارتدى ملابسه وبحث عن امه مسرعا فلم يجدها فنزل الى الحارة وسار مسرعا الى الشارع الرئيسى ينتظر الأتوبيس فوجد الشارع مذحماً للغايه ومحطة الأتوبيس مذدحمة فوقف قليلا ينظر حوله زحاماً فى كل شئ جو حار خانق.
فقال لنفسه ماهذا الزحام الشديد وبعدين فكر قليلا وقال سأتمشى قليلا ايه المشكلة يعنى لما اروح الشغل متأخر شويه انا عندى رصيد اجازات كتير وبعدين حتروح لمين يعنى رئيس الحى اللى بيقولى ارتشى ولا الزملاء اللى كل واحد فاتح الدرج .
فهم ماشيا فى الشارع الرئيسى ودلف فجأه الى شارع فرعى على يمين الطريق فوجد امامه حديقه ذات سور حديدى واشجار وارفه فسال نفسه ايه دى الجنينه دى مكنتش هنا يظهر دى الجنينه اللى المحافظ بقالوا سنه بيقول انه حيعملها هنا بدل العشوائيات .
اقترب من باب الحديقه فوجد مكتوبا على الباب ( رسم الدخول خمسين قرش ) ياه هو فيه حاجة بخمسين قرش دلوقتى ولكن وجد الشباك مغلق لكن الباب مفتوح يظهر انها لسه مفتحتش
فدلف من الباب وقال لنفسه والله اريح هنا شويه لحد الزحمة ماتخلص شويه وبعدين وانا خارج ابقى ادفع الخمسين قرش .
ودخل من الباب فوجد اشجارا خضراء ومساحات مليئة بالزهور من كل نوع وطرقات معبده بما يشبه الزجاج الشفاف وهدوء وسكون فقال لنفسه ياسلاااااام ايه الهدوء دا دا حتى صوت الزحمة مش مسموع هنا فاخذ يتمشى قليلا فوجد محموعه اطفال صغار تلعب على مراجيح يلعبون ويقفزون سعداء.
اقترب منهم وسألهم انتم هنا من امتى؟

فرد احدهم عليه: ياعمو اتوبيس المدرسه جابنا هنا ومشى

فسأله محمد : انتوا معاكو مدرس او حد كبير ؟

فرد الطفل : مش عارف بس احنا هنا بنلعب وسعداء .

فاستغرب محمد بين نفسه ولكنه قال عموما الجنينه مقفوله اكيد فيه مدرسين هنا ولاهناك.
اكمل مسيرته فوجد شخصا جالسا من بعيد واقترب منه وفجأه وقف محمد مشدوها واقترب من هذا الشخص وقال له: سلام عليكم مش انت ابراهيم؟

فرد الأخر قائلا: وعليكم السلام ورحمة الله وبركاته ايوه انت تعرفنى؟

فقال له محمد : ايوه انا محمد مهندس فى الحى مش انت ابراهيم اللى دخلت السجن من تلات سنين فى قضية الرشوه؟

فابتسم ابراهيم وقال له: ايوه انا بس الحمدلله اتحكم عليه بالبراءه لانى برئ فعلا ومن تانى يوم وانا بره السجن ؟

فرد محمد عيله قائلا: من تانى يوم ؟ انا اسمع انك لسه بتقضى العقوبه ؟

فقال له ابراهيم :لا الحمد لله انا براءة.

فقال له محمد :امال انت مرجعتش الشغل ليه؟ فابتسم ابراهيم ولم يرد.

فقال له محمد: وانت ساكن قريب من هنا ؟

فقال له ابراهيم : لأ انا ساكن فى الجيزة.

فقال له محمد: امال ايه اللى جابك الجنينه دى هنا دا احنا بعيد اوى عن الجيزه ؟

فقال له ابراهيم : مفيش حاجة بعيد دلوقتى وانا سمعت عن الجنينه دى من زمان فقلت اشوفها بس للأسف الكافتيريات لسه قافله لو كانت فاتحه كنت عزمتك على حاجة ساقعه للحر .

فرد محمد: حر انا شايف ان الجو هنا حلو اوى دا زى مايكون مركبين تكييفات فى الجنينه زى بتاعه الكبار الشجر دا مخفف درجة الحرارة كتير اوى .

فقال له ابراهيم: هو مش المفروض انك تكون فى الشغل دلوقتى انت مزوغ ولا ايه ؟

فابتسم محمد وقال: مزوغ ؟ انا لو على نفسى عايز اسيب الشغل دا بس الدنيا مفيهاش شغل الحى كله فساد ورشوه ( معلش بقى ياابراهيم ؟) متاخذنيش كل الناس فى الحى بتترشى تصدق امابرح راجل جاى يعرض عليه 2000 جنيه رشوه علشان اديله تصريح مخالف ثرت وزعقت ودخلت لرئيس الحى لقيته بهدوء بيقولى مش مشكله يامحمد مشى نفسك وعموما المعلم مبيخالفش اوى دا همه دورين زياده مش هما يعنى اللى حيوقعوا العمارة ؟فرفضت وجريت على مكتبى واخدت حاجتى ومشيت تصدق فضلت ماشى امبارح فى الشوارع وروحت الساعه 8 باليل دخلت نمت وصحيت يادوب على ميعاد الشغل .

فابتسم ابراهيم وقال له بهدوء : عرفت بقى انى ممكن اكون مظلوم عموما ربنا معاك طالما انت رفضت الحرام .

فقال له محمد: مانت بتقول انك رفضت ودخلوك السجن ؟

فقال له ابراهيم : مانا قولتلك انا براءه اهه وادينى معاك

فقال محمد : عموما انا حسيبك دلوقتى لازم اروح الشغل بس يابختك انت حتفضل قاعد فى الجنينه شويه؟

فقال ابرهيم : اه شويه عموما ادى تليفونى لو حبيت تتصل بيه .

فقام محمد سائراً يبحث عن باب الحديقه للخروج وانتشى من الأشجار وراءى فساقى مياه جميله وطيور وعصافير تغرد فقال فى نفسه يااااه دا المحافظ باين عليه راجل صادق الجنينه دى هى اللى كانت ناقصه الحى فعلا انا كل يوم بعد ماارجع من الشغل حعدى اقعد فيها شويه.
ظل سائرا يبحث عن الباب فلم يجده وتعب من السير فجلس قليلا وقال فى نفسه بص بقى يامحمد انا مش رايح الشغل حد يسيب الجو دا ويروح للخنقه والفساد بس حقعد شويه اريح وابقى اقدم اجازة عارضه .
مدد رجليه على الكرسى الخشبى الطويل فى الحديقه ونظر الى السماء التى يتخخلها الأشجار وفروعها العاليه حاجبة حرارة الشمس وفجأه غفلت عيناه
وفجأه سمع اصوات اصحى يامحمد اصحى يامحمد انت قافل على نفسك ليه اصحى البيت بيقع العمارة بتتهد أصحى يابنى اصحى وصوت بكاء ثم طرق عنيف على الباب ابتسم محمد وظل الطرق على الباب

ثم ........ صمت

الأحد، 6 سبتمبر، 2009

لو كان بامكانى


ولأن ايام الغربة اصبحت معدوده فى حياتى تجربه بحلوها ومرها ولكن اعد الأيام بل والساعات للعودة اتمنى ان اطوى الأيام لتصبح دقائق بل ثوان اه لو كان بامكانى - لها هذه القصيدة


حياتى اكتب اليكى من غربتى باشعارى
بين أنين الذكرى وشوقى لأوطانى
وضجيج الألم فى نفسى يصرخ بالأمان
فى سجن الغربة موحشه
فى غياهب جب النسيان
لم أنس عيناكى ابدا
يا ملهمة أفكارى
قلتى فى فيما أكتبه انى شاعر
فان كنت شاعرا
فانت بحق إلهامى
اشتاق الى ضمك فى صدرى
أه لو كان بامكانى
فاليوم لااملك شيئا فى الدنيا
الا عينيك واحزانى
صورتك تملئ دنياى
وحبك باقى بوجدانى
مازلت احلم بلقاء
لاعرف فى الأرض مكانى
واضمك ثانيه فى صدرى
أه لو كان بامكانى

السبت، 5 سبتمبر، 2009

هيصه

الصديقه العزيزه منى ارسلت لى ردا على موضوع السحابة السوداء فى شكل (website) جميل عن مصر يعنى هو فيلم سياحى عن مصر وان كان الفيلم جميل وممتع لدرجة ان صديقى وزميلى فى العمل وهو هندى الجنسية عندما شاهده - بالمناسبة هو صديقى فعلا - قرر ان تكون اجازته القادمة فى مصر وشرحت له مالم يأت فى الفيلم مثلا من جمال الرحلة النيليه بين الأقصر واسوان وعظمة مصر فى كنوزها السياحية لدرجة انه فعلا قد اصر على زيارة مصر .
هذا ليس موضوعنا فلسنا سياحا ولكننا مواطنين مصريين نعيش فى الوجه الأخر من بلدنا ليس الوجه السياحى ولكنه وجه الهيصة طبعا الموضوع عند قراءته فى الوهلة الأولى حتقولوا موضوع كورة وحسن حمدى والذى منه ولكن انا عايز بس أركزعلى حاجة حقولها فى سياق الكلام.
الخبر بسيط حارس مرمى كرة اليد ومنتخب الشباب انتقل من الأهلى للزمالك فى احدى الصفقات التى يحارب بها الناديان بعضهما البعض لاشغال الرأى العام عن بلاوينا ، الى هنا والخبر عادى ثم أتى خبر مكمل بيقول ان الإتحاد المصرى لكرة اليد عند مراجعته للموقف أقر بصحة الإنتقال من الاهلى للزمالك وصحة خطواته الى هنا والخبر العادى .
عايزكو بقى تقروا معايا السطور اللى جايه علشان تشوفوا الهيصه
" وعلمت المصرى اليوم أن حسن حمدى قد عقد جلسه خاصه مع عضوين من اتحاد كرة اليد من ابناء النادى ووجه لهما لوماً شديداً على عدم معرفة النادى بالقرار قبل صدورة وحملهما مسئولية انتقال كربم هنداوى للزمالك "- جريدة المصرى اليوم - الجمعة 4 سبتمبر العدد 1909
هل يمكن ان اعلق على الخبر !!!!!!!!! يعنى ايه؟؟؟؟ كده يعنى ان ابناء النادى يشتغلوا جواسيس على اتحاد اللعبه اللى هما أصبحوا اصلاً أعضاء فيه علشان يبلغوا الباشا بقرار ما أىكان قبل صدورة ؟؟؟؟؟؟!!! ماهى هيصه - وبالمناسبة هل يقبلها الباشا على نفسه لانه رئيس مجلس ادارة النادى الأهلى يتسرب خبر او قرار من المجلس قبل الإعلان عنه واثناء مناقشته مجرد سؤال ؟؟؟؟؟؟
ويعنى ايه ان اتنين من اعضاء اتحاد اللعبه يتم تعنيفهم بواسطة رئيس نادى اى كان هذا النادى اصلهم من ابناء النادى ؟؟؟؟!!!!! ماهى هيصه
يعنى ايه اصلا ان لايتم توجيه الى رئيس هذا النادى- ان كان الكلام صادقا من الجريده- تهمة محاولة اغواء موظفين عموميين بإفشاء اسرار العمل والمفروض اصلا ان هما اول لما يدخلوا إتحاد اللعبه خلاص بقوا تبع اتحاد اللعبه مش تبع النادى ، يعنى ولائهم الاول لصالح اللعبه حتى لو كان هذا ضد مصلحة النادى بس تقول ايه ؟؟؟!!!!1 ماهى هيصه
شوفتو بقى فى خبر لايزيد عن سطرين ثلاثه فى 3 هيصات .

معنى كده بقى ان اوباما كل مايتناقش فى اى شئ على مستوى حكومته وجاء اسم كينيا بالطيب او الرضى حيقوم جرى يكلم رئيس كينيا ويبلغه ماهو اصله من كينيا - كان بيشجع نادى جورماهيا الكينى اللى ضرب الحكم زمان -
ياجماعة هى الهيصه وصلت لحد كده ان يتم التعامل مع الغلط واللامعقول بهذا الشكل على انه شئ عادى جدا بيحصل كل يوم مع انه شئ مخزى تماما وخطأ فاضح وفادح فى رأيي سواء من النادى او رئيسه وكمان من اتحاد اللعبه ورئيسها والاكثر خطأ منهم كلهم جريدة المصرى اليوم اللى نشرت الخبر بدون التعليق عليه وكأنه عادى كل نادى ليه فى اتحاد لعبه عضو او اتنين خلاص بقى اشتراهم ولازم يبلغوه بكل صغيره وكبيره داخل الإتحاد
مش عارف هو انا عايش فى زمن غير الزمن ولا الناس دى صح وانا مش فاهم ولا هما اللى غلط -
واخيرا بمناسبة اذاعة مسلسل اسماعيل ياسين حاليا فى رمضان وبمناسبة هذه الرساله ايضا تذكرفيلما للفنان الراحل من أجمل افلامه على الإطلاق الكوميدية الفلسفية التى تنطبق علينا اليوم فيلم - المجانين فى نعيييييم

الأربعاء، 2 سبتمبر، 2009

الحاق واجب للسحابة

الصديقة نور شكرتنى على هذا العرض الخاص بالسحابة وقد قمت بالرد عليها قائلا"أن هذا العرض كان مختصرا لان الموضوع يحتاج الى مقالات ومقالات و للأسف الشديد تناول الموضوع فى الصحافة او وسائل الإعلام المصرية كل عام دون ان نصيب لب الحقيقة وبمعنى يبدا الموسم بهجوم الصحافة والتريقة ورسوم الكاريكاتير دون ان يفهم الصحفيين اى شئ ويكون رد وزارة البيئة هو الدفاع الدفاع مثل فريق درجة تالته يلاعب الأهلى دون هدف وانا اعتقد ان الذى كتبته لكى باختصار لم يتم تناوله من قبل كله فقط عايز يدافع ويهاجم دون علم ودراسة وتحليل ووضع حلول منطقة والأهم مصارحة الناس بطبيعة المشكلة بل ولماذا لانشرك الناس فى اقتراح الحل لاأعلم كل واحد فى وادى " كان هذا ردى والذى اعتقد أنه يجب ان يكمل الموضوع الأصلى فعلا لماذا لاتشرك الحكومة الناس فى الحل اى حل لاى مشكلة لماذا لايتم استطلاع اراء واستضافة الناس من الطبقة المتوسطة فى برامج تليفزيونيه تناقش وتحلل لماذا نكتفى فقط بالممثلين ونجوم الكورة والكتاب الصحفيين ؟ اين الناس ؟ اكيد فى الـ 80 مليون مصرى فيه ناس عندها حلول سحرية نجيبهم وناقشهم نستضيفهم ياجماعة دا احمد زويل مننا وفاروق الباز برضه مننا وغيرهم وغيرهم مكنوش من عليه القوم والأغنياء مكنوش اصحاي شركات موبايلات او شركات تعمير يبنون البيوت ويقتلون الناس ايضا كانوا من الطبقة المتوسطة طبقة مصر والمصريين صدقونى انا قريت فى المدونات هنا لناس عظيمة واراء جميلة ليه الحكومة متعملش قناه تليفزيونيه يسموها قناة الشعب كله من الشعب مش عارف هو احنا لسه صغننين فى عين الحكومة مش عارف عايز حد يجاوبنى والله بمناسبة السحابة السوداء فيه ناس كتير عندهم حلول كتير للموضوع دا وحلول منطقية انا عارفهم بس محدش بيسمع وقلت طالما محدش بيسمع يبقى نكتب لعل وعسى حد يقرا

الثلاثاء، 1 سبتمبر، 2009

السحابة السوداء والخصخصة

الصديقة نور فى معرض تعليقها على رحلتى الى فنلندا اثارت فيما اثارته من تعليق على اهتمام هذه الدولة بنظافة البيئة المقارنة معنا فى مجال البيئة ولاسيما وأن موعد السحابة السوداء السنوى قد اقترب وبناء على طلب الصديقة العزيزة نور سأشرح لها لماذا قلت لها ان السحابة السوداء هى احد وسائل الحرب ضدنا .
وأول سؤال يمكن ان يثار فى هذا المجال هو ماهى علاقة السحابة السوداء بالخصخصة ؟وأنا هنا سأنقل لكم ياأصدقاء ماعشته فعلا وماعرفته من موضوع السحابة السوداء وسأترك لكم التعليق فى النهاية عن من المخطئ فى موضوع السحابة السوداء
أول الأمر يجب ان نعلم جميعا ان السحابة السوداء انما تتكون ليس فقط من حريق قش الأرز وانما تتجمع من العديد من المصادر منها ماتنفثه المصانع من دخان ولاسيما مصانع الطوب الطفلى ومصانع الأسمنت بالإضافة طبعا الى مايخرج من السيارات من أدخنه بالإضافة الى الأتربة العالقة من الصحراء المحيطه ولكن لماذا هى تتجمع فى هذا الوقت من العام تحديدا ؟
ان التغيرات المناخية العالمية والتى لم يكن لنا كدولة أو حتى كمجموعه دول نامية يد فيها وانما هى تكونت نتيجة مئات السنين من الغازات والأبخرة والكيماويات التى تتصاعد من مصانع الدول المتقدمة والتى كانت السبب الرئسى فى تغير طبيعة المناخ فى العالم كله وكلنا نذكر مقولة علم الجغرافيا الذى كنا ندرسه فى مدارسنا ان جو مصر حار جاف صيفا دفئ ممطر شتاء وهو بالطبع ماتغير من ضمن ماتغير من مناخ عالمى وبعدما كان شهر سبتمبر فى مصر هو اجمل شهور السنه اصبح اصعبها نتيجة سكون الرياح التى كانت زمان تأتى وتلطف الجو وياللقدر فقد كان من نصيب مصر ان تسكن الرياح فى هذا الشهر تحديدا وهو شهر حصاد الأرز الذى كان يزرع زمان ونفس الحرق يتم ولانشعر به لوجود الرياح التى تذر الغبار
ولكن السؤال يظل لم يرد له اجابة ماهى علاقة السحابة بالخصخصة ؟
فى الماضى البعيد كان هناك مايسمى بالدورة الزراعية فكانت وزراة الزراعه تقسم المساحات الزراعية بالتناوب هنا يزرع قمح وهنا الأرز وهنا القطن وهكذا ويتم الترتيب سنويا لمجموع كل نوع من المحاصيل وكان يتم الالتزام من جانب المزارعين بهذه التقسيمات وويل لمن يخالف وبالتالى كانت زراعة الأرز تاتى دوما فى محافظة كفر الشيخ والمناطق المحيطة بها لأسباب عديدة منها ان زراعة الأرز تحتاج لمياه غزيره غامرة تساعد على غسيل التربة الزراعيه من الاملاح التى تأتى من مياه البحر فى المناطق القريبة من مصب النيل فى البحر ومنها محافظة كفر الشيخ والبحيرة وهى محافظات بعيدة نسبيا عن القاهرة وبالتالى فعندما كان يتم حرق قش الأرز ومع وجود الرياح التى تذر الغبار فلم نكن نشعر بهذه السحابة ولكن ؟
أتت الخصخصة ومن بين شروطها الغاء الدورة الزراعية وبالتالى فالمزارع يزرع مايشاء وقتما يشاء دون الزام ولأن الأرز ارخص المحاصيل الزراعية تكلفة فهو لايحتاج الا الى شتلات ومياه غزيرة وأسعار تصديرة عاليه وباتالى ربحه كبير اتجه كل المزارعين الى زراعة الأرز فى هذا الوقت من العام وبعدما كان المخصص للأرز مليون طن ارز ينتج عنهم مليونى طن قش يستخدم مليون منهم فى التدوير واستخدامات اخرى ويحرق مليون فقط اصيح هناك اكثر من سته ملايين طن ارز تزرع ينتج عنها نحو ثمانية ملايين طن قش يستخدم منها فى التدوير مليونين ويحرق سته ملايين ( شوفوا الفرق الهائل ) وبالتالى اختفت تقريبا محاصيل القطن والقمح ذات التكلفة والمجهود وزاد الأرز ( استسهال من المزارع ) دون ان يكون لدى المزارعين الدراية الكافية بمخاطر الحرق وتعددت محاولات اصلاح هذا الخلل ومن بين محولات الإصلاح ان تقوم الزراعة بتحديد مساحات زراعه الأرز واماكنها ومن يخالف يتم بيع المياه له بالمال وهنا تدخلت الأيدى الخفية الخارجية ودخلت دول تقول لدول حوض النيل الحقوا مصر بتبيع المياه وبالتالى طالبت تلك الدول التى لم توقع على اتفاقية مياه النيل بنصيبها فى المال وبدأت الخلافات مع دول حوض النيل ذلك ان الأرز يستهلك نحو 15 الى 18 مليار متر مكعب مياه من جملة 55 مليار نصيب مصر من المياه فى كل الإستخدامات وبالتالى صارت المشكلة الى دولية مع الجيران ولكم طبعا ان تتخيلوا من المحرض لدول حوض النيل
محاولات تدوير قش الارز لن تنجح لكبر الحجم وقلة الامكانيات واسف فى اللفظ جهل المزارعين واستخفافهم بخطورة التلوث وعدم قدرتنا على عودة الدورة الزراعية لانها تخالف ماتم الإتفاق عليه من خصخصة مع الدول التى تنازلت عن ديون مصر لديها فى سبيل تطبيق الخصخصة
طبعا ليس هذا كل شئ فهناك اسباب عديده منها الفنية ومنها الربانيه كنوع من العقاب على مانفعله بانفسنا ولكنى احببت وبصورة مبسطة ان اشرح للأصدقاء لماذا تحول شهر سبتمبر الجميل شهر المحبين الى شهر التلوث بفعل الخصخصة

الاثنين، 31 أغسطس، 2009

رحلة الى فنلندا


المرة دى يااصدقائى حنطلع شوية من الجنوب الى اقصى الشمال الى فنلندا وهى دولة صغيره فى الجزء الشمالى اوى من اوروبا وذهبت اليها فى رحلة عمل ايضا فى توقيت شتوى جدا فى شهر ديسمبر الرحلة استغرقت طيران حوالى 9 ساعات مابين طيران الى امستردام ( ام ستردام ) على راى عادل امام ثم الإنتظار فى مطارها ساعتين ثم طيران الى هلسنكى المهم كانت الساعه المفروض حوالى 3 ظهرا نزلنا من الطائرة ظلام دامس ايه ياخونا هو فيه ايه احنا ظابطين الساعة غلط ولا ايه قالولنا لا هو كده الظلام هنا فى الشتاء 20 ساعة والصبح والنهار يادوب 4 ساعات وكمان شمس تشبه المغربية عندنا طبعا درجة حرارة 5 تحت الفر والناس هناك مبسوطين جدا ليه ؟؟؟ لان دى بالنسبه ليهم صيف لان المعتاد درجات حرارة من اول عشرة تحت الصفر وانت نازل المهم طبعا ثلج او سنو زى مابيقولوا بلد طبعا نظيفه تماما ولكن كئيبة شوتين تخيل انك تصحى من النوم الصبح تفطر فى الظلام وتروح شغلك والدنيا لسه ضلمه تشوف الشمس يمكن ساعة واحده ساعة الراحة او تخرج بره المبنى علشان تدخن سيجارة ترجع شغلك تيجى ساعة الإنصراف ظلام شوبنج فى الظلمه غدا فى الضلمه ايه دا اكتئاب ايه دا قالولنا ايه بقى فى الصيف العكس صحيح يعنى النهار 20 ساعة والليل 4 ساعات يعنى تتعشى فى النور ايه ياخويا اللخبطه دى المهم طبعا بعيد عن الجو والشمس بلاد طبعا كلها خضار من اللون الأخضر وحمار فى الوجوه من اللون الأحمر وصفار فى الشعور من اللون الأصفر طبعا الهجرة فى البلاد دى محدوده جدا علشان كده شوارع فاضيه تماما كأنك فى بلد مهجور اللى جاء فى بالى ساعتها طيب الناس فى فنلندا دلوقتى بيصوموا ازاى فى رمضان - الشئ بالشئ يذكر- يعنى بيصوموا فى الصيف حوالى 20 ساعة والشتا يادوب 4 ساعات حكمة ربنا المهم بقى ان فنلندا معروفه انها بلد تليفون النوكيا الغريبه جدا ان كل الناس بيستعملوا فيها تليفونات اريكسون ودورت على محلات نوكيا اشترى بطاريه اصليه لتليفونى ملقتش .

كمان المأموريه اللى كنت فيها ال ايه تخص حماية البيئة وطبعا انا مشفتش عندهم اى نوع من التلوث اللهم التلوث النفسى من موضوع النهار والليل وتشعر ان الناس عندها اكتئاب شويه بلد تقريبا مفيهوش مشاكل ودى يمكن المشكلة الكبيره عندهم ان الناس عايشه من غير مشاكل مفيش بطاله لان اصلا مفيش ناس المكاتب مفروشه مستنيه الموظفين مستوى مادى عالى جدا جمال طبيعى فى كل شئ هدوء غريب مفيش كلاكسات ( الصورة المرفقة المفروض انها ساعة ضهرية )( يعنى قارنوا بين زحمة الظهر عندنا وعندهم ) اللى عايز حاجة بيعملها علشان كده مفيش مشاكل ودا اللى بيخليهم تقريبا ينتحروا لانهم مش عارفين هما عايشين ليه بس عموما بلد نظيفة وبتكلموا عن نظافة البيئة يعنى متهيألى لو واحد منهم زار مصر وراح منشية ناصر مثلا اعتقد انه ساعتها حينتحر بجد وطبعا فنلندا هى احد الدول المكونه للفايكنج - محاربى الشمال علشان كده اثار كتيره اوى للفايكنج عموما دى كانت ملاحظاتى لان الزيارة كانت يادوب 4 ايام منهم يومين سفر والى حلقة قادمه ان شاء الله

السبت، 29 أغسطس، 2009

رحلة الى السودان

الدكتورة نور فى تعليقها على أخر اصدار ليه اوصتنى ان اتحدث عن البلاد التى زرتها ، وانا لا أدعى انى كاتب من كتاب أدب الرحلات ولكنى سأحاول ان اعرض الدوله كما رأيتها وسأبدأ بالسودان ولكن لماذا السودان ؟
قد يكون لانها أهم دولة لمصر أو لانها امتداد طبيعى لنا وربما ايضا للعلاقة التاريخية الطويلة وربما لكل تلك الأسباب الا انى فى النهاية رأيت أن أبدأ بها .
لقد زرت السودان فى مهمة عمل استغرقت 5 أيام وللعلم فان السفر الى السودان لايحتاج الى تأشيرة دخول اليها من مصر فقط الدخول بجواز السفر وكان معى فى الوفد أحد علماء مصر فى الزراعه والذى يزور السودان سنويا وكان أول ماقاله لى أنى سوف اجد مفاجأه فى التطور الذى تشهده السودان - طبعا انا لم ازر السودان قبل ذلك وبالتالى فمشاهدتى لما رأيته لم استطع مقارنته بما كانت عليه السودان من قبل ولم اشاهده ولكنى رأيت العديد من الظواهر منها
أن المواصلات الرئيسية فى السودان هى التك توك بمعنى رأيت مايزيد عن 10000 توك توك فى الطريق ورأيت ايضا طرقاً ممهدة تضاهى ماشاهدته فى اوروبا فى بعض منها رايت ايضا تغييرا فى سلوكيات الإنسان السودانى عما سمعت عنه فى الماضى نشاطا وهمه بل ومستوى تعليمى وثقافى مرتفع رايت ان الجنيه السودانى يساوى 3 جنيه مصرى !!!!؟؟؟؟ ازاى مش عارف رايت حركة عمران ضخمة صحيح كل ذلك فى العاصمة الخرطوم ولكنه ينبئ باحتمال تطور اقتصادى كبير رايت حركة بناء ضخمة فى انشاء اكبر مطار فى افريقيا جنوب الصحراء كى ينقلوا حركة الطيران الى افريقيا من كينيا الى السودان رأيت وزراء بسطاء فى ملبسهم وكلامهم وحتى فى بروتوكولاتهم كرما جميلا وطيبه حلوه رايت دوله استيقظت من سباتها، وبدأت تحلم بالتنمية صحيح هناك الكثير من المعوقات والصعوبات والحروب الداخليه الأتيه من الخارج !!! ولكنهم عازمين على التنمية رايت النيل فى اجمل مارأيته النيل البكر الطمى الغزير الذى حجبه عن ارضنا السد العالى جزر كاملة تشكلت داخل النيل من هذا الطمى الكثيف ومشروعات تستعد للإستفادة من هذا الخير رايت مئات الألالاف من الأفدنه التى لاتجد من يزرعها ومستعدة للزراعه دون كيماوى او اى شئ سوى سواعد - واراها مصريه فى المستقبل - لتكون السودان وبحق سله غذاء العالم .
ارى انه يجب ان نهتم بالسودان اكثر وان نتوجه بجهودنا لها فهى مستقبل مصر شئنا ام ابينا .
رايت المشروعات المصرية التى بدات تغزو السودان ومطلوب اكثر عموما انا فقط احببت ان اعطى فكرة بسيطه عن دولة بدأت تستيقظ من سباتها لتلحق بالتنمية وقارنت فى نفسى بينها وبين دولة اخرى بدأت أو فلنقل استعدت للنوم مرة اخرى وياليتها تستيقظ حتى لايصبح الجنيه السودانى كما الدينار الكويتى بــ 20 جنيه مصرى
والى رحلة اخرى فى دوله اخرى .

الجمعة، 28 أغسطس، 2009

مصطفى زيد «شهيد الأتوبيس الطائش»

اولا الف رحمة ونور على روح الفقيد المرحوم ولكن الى متى نتكتفى بالدعاء على نزيف الدم فى شوارع وطرقات مصر ؟؟؟ الى متى نعتبر تكييف هذه الجريمة قتل خطأ لايتجاوز عقوبه 3 سنوات ؟ صحيح ولان الشهيد لواء وذو رتبه فالإهتمام الإعلامى كبير ولكن ايضا هناك ألالاف الشهداء البسطاء يسقطون صرعى تحت عجلات السيارات الطائشة دون جدوى ؟ هل لان المواطن اصبح لايحترم القانون ؟ أم لان رجال القانون لايحترمون المواطن وبالتالى فالمواطن لايحترم القانون باعتباره ان رجالات الشرطه هم من يمثلونه ؟ ام لان القانون نفسه لايجبر احدا على احترامه بنصوصه الضعيفه وضعف تنفيذ احكامة ؟
مجرد دائرة مفرغه أخرى من بين الالاف الدوائر المفرغه التى ندور فيها بحثا عن مخرج !!
لقد اصبحت على يقين ان الشعب المصرى اصبح ثلاث شعوب بثلاث قوانين شعب النخبه والأغنياء ولهم قانونهم الخاص فيما بينهم لاينطبق على غيرهم وشعب الموظفين والبسطاء من ابناء الشعب ولهم القانون المكتوب الضعيف الذى يطبق عليهم هم فقط دون غيرهم موظف ارتشى بمبلغ 100 جنيه ياخد 7 سنين سجن - دا القانون اللى بيقول كده - اما الموظف الكبير اللى خد اتنين تلاثه مليار ياخد كام دا بقى ياخد ديله فى سنانه ويجرى على بره ولما يسوها يبقى يرجع دون عقاب - والفئة الثالثه فئة اللاقانون اصلا قتل وبلطجة واغتصاب كما نراها فى افلام ابراهيم الأبيض ودكان شحاته والفرح وغيؤها من الأفلام التى تعلن عن وجود الشعب الثالث فى مصر وهو شعب البلطجه بلا قانون اللى عايز حقه ياخده باسيف فان لم يستطع فابلمطواه فان لم يستطع فبيده بس يكون فتوة لان اللى معهوش التلاثه دول يتقتل وهو ساكت او تغتصب وهى راضيه .
انا لو من البقية الباقية من الناس اللى المفرضو خايفه على البلد احاول تطبيق القانون الصينى اى جريمة تزهق فيها روح يكون الإعدام الفورى والعاجل والحاسم للمرتكب سواء غلطان او مهمل او حتى قاصد يعنى سائق الأتوبيس دا وغيره يجب على الفور اعدامهم وبدون تهاون وبدون اللجوء الى النصوص العرجاء بانه مش قاصده اصل الفرامل سايبه ياجماعه كفايه بقى انهيييييييييييييييييييار

الجمعة، 21 أغسطس، 2009

كل عام وانتم بخير من تونس الخضراء

كل عام وانتم بخير يااصدقائى الأعزاء واللى فعلا بجد حسيت وانا فى الغربه هنا انى مش لوحدى وبجد هونتوا عليه كتير ومعذرة لانى لم استطع التواصل معكم فى الأيام الماضية حيث كنت فى مأموريه صغيره لمدة اربعة ايام فى تونس الجميلة الخضراء اللى بجد لما زرتها اعتبرتها نموذج للدولة العربية المتحضرة والجميلة والهادئة كل الناس هناك بتبتسم فى وشك فعلا كل الناس واخدة الأمور ببساطة جدا كل حاجة جميلة وهادية يارب نبقى زيهم .
يارب يكون رمضان علينا هذا العام هادى وربنا يستجيب لدعائنا فى صلاتنا وصيامنا المخلصين منا كثيرون وندعوا الله سبحانة وتعالى ان يستجيب لدعائهم يارب امين
بس بجد الواحد نفسه يعيش فى تونس

الجمعة، 14 أغسطس، 2009

قبل الرحيل ----- أنجى بتاعتى مغلبانى ياعلى

اريد أن اراك شمس الشموس قبل الرحيل
فما عاد فى العمر غير القليل
قد كنت نجماً ساطعا فى السماء
والأن صار الضوء ضوءا هزيل
أين انت ... اين ماضى الزمن الجميل
اين النسيم العليل وظل النخيل ؟
قد كنت فى الماضى ضوءا يهدى التائهين
كنت وطنا لكل شريد تاه منه السبيل
قالوا عنك مهد الحياه فى عمر الزمن الطويل
اين تاه الضوء اين صار الزمن الجميل
عودى ياحياتى شمسا كما كنت
لا كوكب يتوارى خجلا ........ فلا مستحيل
اغلى اماني ياحياتى ان ارى شمسك تسطع من جديد
قبل الرحيل

الى مصر

الثلاثاء، 11 أغسطس، 2009

هرم تامر

ورد فى صحيفة المصرى اليوم بتاريخ 10/8/2009 موضوع بجد أصابنى بصدمة وهو قرار السيدة الفاضلة الموقرة رئيس الإذاعة فجأه وبجرة قلم الغاء تاريخ 50 سنه أو بمعنى ادق الغاء برنامج ربات البيوت على البرنامج العام ... هكذا فجأة وبلا مقدمات المشكلة ياأصدقائى ان هذا البرنامج له ذكريات كثيره وعديده وقام بالمشاركة فيه عمالقة مصر سواء ضيوف أو ممثلين ورغم انى رجل ( طبعا زمان كنت لسه صغير ) الا اننى كنت استمتع بسماع الموضوعات التى تثار فيه وحل المشكلات والمناقشات وكذا طبعا تمثيليه " عائلة مرزوق افندى " وكم كنت ارى والدتى رعاها الله وهى تنتظر بشغف لسماع هذا البرنامج وقد اصبح جزء من العائلة المصرية ولا شك ايضا انه شكل وجدان العديد من الافراد .
عموما المشكلة هذه ليست غريبه علينا فبجرة قلم ايضا تم الغاء برنامج نادى السينما وهو البرنامج الوحيد الذى كان يتناول الدراما من المنظور التحليلى بحث انك كمشاهد قد ترى الفيلم من زوايا قد لاتعيها ان شاهدت الفلم منفردا .
المهم بقى ايه ان الغاء برنامج ربات البيوت ال ايه بدعوى التطوير وتجديد الشباب للبرنامج بحيث يصطبغ بصبغة شبابية
انا عايز اعرف هو العواجيز فى البلد دى صدر ضدهم حكم بالأعدام مثلا هل هناك قرار خفى بان يتم استفزاز كبار السن علشان يموتوا ونرتاح منهم ولا خلاص فجأة مفيش غير الشباب فى مصر ياجماعة فى دول العالم المتقدم هناك وزير مخصص لكبار السن يقوم على رعاية مصالحم والعناية بهم اسمه Minister of Old
وقد قام وزير العواجيز فى فرنسا بالإستقاله مثلا لان عدد من ماتوا اثناء موجه الحر من حوالى كام سنه تعدى 1000 عجوز .
طبعا هذا القرار العشوائى امتدادا لقرارات اخرى بالتطوير العشوائى ايضا وبدلا من ان نحافظ على تاريخنا بنبيعه للقنوات الخاصة او بنلغيه شوفوا المملكة المتحدة ( ام الدنيا فى رأى وليس غيرها ) تحافظ على تراثها وتقاليدها ازاى بلد محترم لايبيع تاريخه للى يدفع اكتر بدعوى التجديد والشباب
انا خايف يجى يوم نلاقى وزير السياحة المصرى راح مطلع قرار ان يغير اسم هرم خوفو الى هرم تامر بدعوى ان اسم خوفو قديم وتامر اسم شبابى اكتر ودا حيجدد شباب الهرم .
اهلا ومرحبا بكم فى زيارة وجوله سياحة فى منطقة اهرامات الجيزة هرم تامر وهرم سامر وهرم مازن وبعد كده حنروح متحف باكينام ( الملكه حتشبسوت سابقا)مع احترامى الشديد والإعتذار لاصحاب هذه الاسماء وانتم جميعا تعرفون ماابغى اليه

السبت، 8 أغسطس، 2009

سوف احيا

ياحياتى سوف احيا رغم الصعاب
سوف أمضى دون نظرة للعذاب
دون أن انتظر منك العتاب
فحبى لك سطرته فى كتاب

فماذا بعد العذاب إلا الدموع
اتسأل هل أمض أم انوى الرجوع
لقد أحببتك بقلب ملئ بالخشوع

لقد كتبنا حبنا على الأشجار
وتركناه ذكرى مرسومة على الأحجار
لقد كان حبنا كالأحلام
وتغلبنا به على الألام

ولكن رغم ذلك لن أعود
لأنى لأستطيع الصمود
أمام هذا الجمود

لقد رأيت الحب ينهار فى قلبك
لقد غابت قصائدى عن عقلك

فآثرت أن انسحب فى سكون
قبل أن يمسنى الجنون
وأدخل فى صراع لايهون
أكون فيه أو لا أكون

فوداعاً
وداعاً يأحلى سنين
فلم يتبق منك إلا الأنين

الأربعاء، 5 أغسطس، 2009

أخيرا ؟؟؟؟؟

صباح الخير ياأصدقائى اخيرا قرات فى صحيفة الاهرام الصادرة اليوم بتاريخ 5/8/2009 ان عددا من اعضاء مجلس الشعب تقدموا بطلب احاطة للسؤال عن السفه الذى تقوم به الاندية المصرية فى الإنفاق على شراء لاعبى كرة القدم من المال العام دون اى وازع او احساس بما يحدث فى مصر الأن من ظروف اقتصادية .
شوفوا بقى طبعا اكيد اللى قدم هذا الإستجواب اما نائب من الإسماعيليه اتحرق دمة على الجهبذ شريف عبد اللطيف او نائب زملكاوى اتغاظ من انتقال اللاعب للأهلى ، عموما مش دا المهم المهم بقى ايه ان باقى اعضاء المجلس الموقر ياخدوا الموضوع بهتمام ويحاسبوا الناس المسئولة ويطلبوا تحويلهم الى المحكمة بتهمة اهدار المال العام والغاء كافة الصفقات من النوع دا والإكتفاء بالصفقات التى تحدد سعرلاعبى الكورة المصريين بسعرهم الحقيقى الذى لايتجاوز 1000 جنيه للاعب الناشئ و2000 جنيه للاعب الكبير و يعنى ممكن 4000 جنيه حد اقصى للسوبر . اتمنى دا يحصل وان يحصل كمان وقفة احتجاجية كبيره ضد الأندية زى وقفات الضرائب العقاريه وخبراء وزارة العدل يعنى الواحد نفسه الناس بقى تحس وتفهم ان الكورة هى سبب بلاوينا كلها سايبين اللى يبيع ويشترى بملايين على لاعبين كسر واخبار ملتهبه علشان يلهوا الناس عن اللى بيحصل فسينا يارب نفوق بقى

الأحد، 2 أغسطس، 2009

مازلتى تفكرين

حياتى بعد كل هذا الحب مازلتى تفكرين

أم أن صراع الحياة جعلك تنسين ؟

أفلا تذكرين ؟

كلمات حبى وصراخ قلبى بحبك المجنون

نداء عقلى وصوتى الحنون

احبك ياحياتى فى سكون

فحبى لكى من وحى الجنون

ولكن رغم حبى وإشتياقى تبعدين

لقد فقدنا ياحياتى الحب فى الصراع الطويل

ومات قلبى من هول طعن السكين

ولم تبق منى سوى أشلاء تبحث عن الطريق

ولم يبق من صوتى إلا الأنين

وانت

مازلت تفكرين

ايه الخيبه دى

أسمحولى فى البدايه أن اقول ايه الخيبة دى لاعب كرة قدم مصرى يزايد عليه اكبر ناديان فى مصر للوصول بسعرة الى نحو 8 مليون جنيه مبدئيا بالاضافة الى لاعب اخر فوق البيعه ليه معلش انا مع احترامى للناديين فهو صراع ديوك متخلف على لاعب يجلس فى منزله ويمتنع عن التدريب للضغط على ناديه لبيعه يبقى لاعب غير ملتزم وغير محترف يبقى ادفع فيه كل دا ليه بدلا من انى اتبرع بالمبلغ لصالح الفقراء او بلاش الفقراء علشان السادة الأغنياء ميزعلوش اروح افك اللاعب بكام لاعب ناشئ صغير يقدر يلعب كام سنه وبعدين من الاخر اروح اشترى لاعب كورة ليه وبالمبلغ دا ليه دا لو حيجيب كاس العالم برضه حرام حرام عليكوا بقى كفايه استفزاز لمشاعر القراء وبعدين يعنى شريف عبد الفضيل هو دا اللى حيجيب الديب من ديله انا بقول من دلوقتى مبروك للزمالك فلوسك اللى وفرتها وهارد لك لنادى المبادئ على فلوسك اللى خسرتها

الجمعة، 31 يوليو، 2009

دائرة الفقر المفرغه - دائرة الفساد

أصدقائى الأعزاء اكتب اليوم لكم عقب عودتى من القاهرة بعد أن قضيت فيها نحو عشرة ايام منهم حوالى خمسة ايام فى طريق صلاح سالم احاول الوصول الى منزلى واثناء توقف الإشارات الطويلة جال بخاطرى سؤال هام وهو من السبب فى الفساد ؟ هل الفساد يأتى من القمة للقاع ام ان الفساد يرتفع من القاع للقمة ؟ او بمعنى اخر على راى الأغنية الشهيرة مين السبب فى الحب القلب ولا العين ؟
صدقونى لقد وقفت طويلا احاول ان اجد اجابة على هذا السؤال هل الموظف البسيط هو سبب الفساد ام المسؤلين الكبار ؟ ولنستعرض معا بعض من الفساد المنتشر فى كل مناحى حياتنا وانا هنا سأسوق مثالاً واحدا فقط وهو مايتعلق بالزحمة التى عانيت منها فالنبدأ بصدور امر تكليف من الحى المختص برصف شارع معين فى دائرة هذا الحى لاحد شركات المقاولات ، وهنا تبدا الشركة فى العمل وتضع طبعا مواصفات فنية غير مطابقة لتوفير التكاليف وزيادة الربح طيب مين اللى حيستلم الأعمال من الشركة ؟ موظف مهندس صغير فى الحى وطبعا حياخد حلاوة العمل من المقاول ( فساد صغير ) والامر ينتهى باستلام العمل وبعد شهرين الشارع تظهر فيه المطبات والحفر ويرجع المقاول يصلح علشان ياخد فلوس تانى استكمال اعمال طيب مين اللى اعطى له امر العمل - مدير الحى ( فساد متوسط) وياتى الوزير المختص ويمر من الشارع ويطنش على الحفر والشارع المطبطب - نسبة الى المطبات - ( فساد كبير ) .
طيب لو ان المهندس الصغير راعى ربه وعمله ورزقه واستلم الشارع طبقا للمواصفات الفنية السليمة كان الأمر سيختلف لان المقاول ساعتها وهو المقاول الفاسد ( فساد القطاع الخاص ) لن يتقدم للمناقصة لانشاء الشارع لانه عارف انه مش حيقدر يخنسر من الفلوس وبالتالى كان سيتقدم للعمل مقاول اخر محترم لانه عارف ان اللى حيستلم منه مش حيطنش ز
وبالتالى فالمقاول الفاسد مش حيدفع رشوة للمدير علشان يعطى له اذن العمل وهكذا تدور الدائرة ؟
ولكن ممكن برضه نبص ليها من منظرو تانى طيب لو المقاول طلب من الوزير انه هو اللى يرصف الشارع مقابل مجاملة معينه ساعتها المدير مش حيقدر يراقفبه لانه حيخاف والمهندس الصغير حيقول ياعم وانا مالى فيستلم العمل بدون فحص يبقى فساد من كبير للصغير
بصراحة احترت واحتار عقلى وفجأة ولطول الانتظار فى الإشارة السايرة قطعت بنزين ماهى دايرة بقالها فترة وطبعا عملت ازمة مرور تانيه فاستفقت من غفوتى واحلامى وتساؤلاتى للبحث عن جركن اوصل اجيب فيه بنزين علشان العربية تدور
هذه اول مغامرة بعد وصولى للأجازة
المهم بقى انا طالب رايكو بصراحه مين السبب
هذه القصة ذكرتنى بحوار شعرى الفته من قبل - سامحونى مش حقدر اكتبه كله - ولكن حقتبس جزء منه
هـــــو : ياصديقتى أنها ليست مشكلات انه الفساد الذى أزكم أنوف العالمين لقد سرق الكبار منا كل مانملك وأصبحنا شعب من المساكين ولم يكتف الشعب بذلك فقام هو الأخر بالسرقة والنهب ونهش لحم هذا الوطن الحزين .
وضج كل شريف وتعالت فينا أصوات الانين بل أضحت مبادئ الشرف والكرامة والامانة من حفريات الزمن القديم ياصديقتى لقد أصبحت على يقين أن الشيطان الأن يوسوس الى المصريين ياتباع الشرف والطريق القويم حتى يراه وهو يسقط فى براثن من يملك السلطة ولايملك الدين ويعاقب ويعذب ويسجن كل شريف فى هذا الزمن المهين فيضحك الشيطان وينادى هذا جزاء من يعمل صالحاً فيكون من المدحورين

الأربعاء، 29 يوليو، 2009

وحشتونى يااصدقائى

اليوم عدت ثانية الى الكويت وكان اول مافعلته ان قمت بقراءة تعليقات اصدقائى وكم فرحت جدا لشعورى بصدق مشاعركم كلكم بجد لم أكن أتوقع فى يوم من الأيام ان يكون لى مثل هذه الصداقات الجميله التى احمد الله سبحانه وتعالى عليها اشكركم جميعا واشكر مشاعركم واشكر ظروف الغربة رغم قسوتها ان جعلتنى اتعرف عليكم جميعا والى إصدار قريب ان شاء الله اامل ان يحوذ على أعجابكم جميعا

الأربعاء، 22 يوليو، 2009

الى كل لأصدقائى

الى كل أصدقائى الأعزاء على نفسى الى كل صديق وصديقه اشعرنى اننى لست وحدى بل مع أناس مخاصين يتفاعلون معى فى كل مااكتبه وانا ايضا اتفاعل معهم
أحبكم بجد ولم استطع ان اوفيكم حقكم فى الرد بجد صحيح الأجازة مازالت ممتده ولكن لم استطع ان انتظر العودة كى اقرأ ماكتبتموه وفعلا وجدت ماتوقعته من تعليقات عجزت يدى ان ترد عليها لكا فيها من كلمات جميله ولهذا تقبول جميعا تحياتى - الصديقه نور-الأستاذ رضا -أنوس الجميله -الأستاذ عمرو-الأستاذه رانيا على-الأستاذ احمد عبد السلام - رانيا الشاعرة الجميله- نور حياتى - عصفورتى الجميله -صفاء كل الأصدقاء كل الأصدقاء تحياتى لكم من القاهرة مصر وتمنياتى لكم جميعا بالتوفيق والى لقاء قريب لان فيه حاجات كتير عايز احكيها معاكم

الجمعة، 17 يوليو، 2009

أنت الحب لو تعلمين

<اليوم أجهز نفسى للعودة الى بلدى المحبوب مصر فى اجازة قصيره اقضيها مع اسرتى ولهذا فقد يصعب على فى هذه الفترة ان اتواصل معكم وان كنت ساحاول بالطبع ولكن هذا يتوقف على اسرتى بعد هذا الغياب الطويل ولهذا اود ان استودعكم الله بهذه القصيده وارجو ان تحوذ اعجابكم والى لقاء ان شاء الله قريب
أنتى الحب لو تعلمين/

أنه قلبى ماتملكين/

حبك ملاذى فى صراع الحياة المرير/

صار حبك لى وحياً محدداً للمصير/

أرأيت مافعل الزمان بى ؟/

فى هذا الزمن العسير/

فلم يبق لى سوى حبك لو تنظرين/

عيناكى باتت شاطئى/

عندما أُصبح فى بحر الحياه اسير/

تاهت خطواتى مرات ومرات/

حتى لم اعد أعرف أين أسير/

لا أجد سوى عيناكى منقذا أخير/

رباه/

أيكون حُبك سفينة نجاتى/

أم أظل فى اليم غارقاً بلا انتهاء/

فلا الموت يأتينى/

ولا الحياة تبغينى/

بربك أنصفينى/

فانت الحياة لو تعلمين



الخميس، 16 يوليو، 2009

الإحتراف المشلول

صباح الخير ياأصدقائى اليوم اتناول موضوع قد لايثير اهتمام البعض ولكنه ايضا يلقى بظلال على منظومة الحياه فى مصر كلها ألا وهى القضية المشهورة التى فاقت شهرتها القضية الفلسطنيه وهى قضية البث الفضائى لمباريات الكوره للدورى المصرى .
بادئ ذى بدء ومنذ دخول الإغتراف اقصد الإحتراف فى ملاعبنا بدون اية دراسات او حتى تمهيد لنفوس الناس المتعاملة معه وانفتح كيس الفلوس وتناثرت الملايين هنا وهناك تارة على اللاعبين واخرى على المدربين اجانب ومصريين أل ايه بيقلدوا الاجانب بقه وبقينا متقدمين هو مش الأهلى كسب ريال مدريد مره نبقى احنا احسن من ريال مدريد !!!! .
عموما تحول هذا الإغتراف الى إنحراف واختفى الأحتراف الحقيقى والذى له منظومة مختلفة تماما عن العشوائيه التى تدار بها الرياضه فى مصر .
فمثلا اول مبادئ الإحتراف هو عدم تبعيه الاندية للحكومه أو جهات حكوميه وبالتالى فهى وكأنها شركات مستقله تمارس نشاطا اقتصاديا خدميا مثل شركات السياحة فهى تقدم خدمه مثثل هذه الشركات وهى خدمة الترفيه أما هنا فالوضع يختلف الحكومه كل يوم بتدى دعم وحسابات حكوميه ( وياريتها مظبوطه برضه ) وبتشيل مجالس وتحط مجالس طبعا إذا لايوجد احتراف ادارة وهو رأس الموضوع واذا فسد الرأس فسدت المنظومة .
نأتى بقى على اللاعبين والمدربين وعن الفوضى هنا لاتسل لاعب يضغط على ناديه علشان يروح نادى تانى يقوم ميرحش التدريب ( طبعا دا لو فى اوربا كان انتهى مستقبله كلاعب لان فى اوربا اللاعب سمعه اساسا) وانا هنا اقصد تحديدا مثال فج للاعب لايستحق اكثر من 1000 جنيه صدقة وليس ثمن يزايد عليه ناديا القمة ( القمة بالمقلوب طبعا ) ليصل سعرة الى 7 مليون جنيه ليه ؟؟؟ معرفش انجازاته ايه ؟؟؟؟ مش باين .
طبعا كمان الاجهزة الفنيه تلاقى مدير فنى ومدرب عام ومدرب مساعد ومساعد مدرب ( ايه الفرق مش عارف ) ومدرب حرارس مرمى ومدرب يدرب ومدرب يتفرج ومدرب رميه تماس ومدير كورة وقائم باعمال مدير كوره ايه دا كله مش عارف بيعملوا ايه متفهمش اهه ( رزق الهبل على المجانين ) ياله ولقمه هنيه تكفى ميه ادى مبادئ الإحتراف ؟!؟!؟!
وبعدين رغم كل الهيصه دى لايوجد ملعب واحد محترم تلعب عليه كوره باستثناء ملعب حرس الحدود علشان الجيش بيصرف غير كده مافى ملعب واحد حتى الأستاد الوطنى اللى اتبنى ب3 مليون جنيه واتصرف عليه صيانه مايقرب من المليار ( مش عارف ازاى ) وهيئه كامله للأستاد وتنبثق منها لجان وفرعيات وادارات وكله بيصرف وكله سبهلله .
وبعدين بقى طبعا هذه الفته الكبيره اسالت لعاب رجال الأعمال فناس تروح تفتح قنوات فضائية وناس تروح تدفع تشترى لعيبه كسر وهات ياتحليلات وطبعا اللى عامل نفسه حامى حمى الحياد وقائم مقام نوادى عدم الإنحياز زى قناه النيل الفضائية وقنوات اخرى بلون الفانله ولعيبه معتزله تشتغل مذيعين مبيعرفوش اصلا يتكلموا ياله ماهى برضه رزق الهبل على المجانين .
واخرة المتمه بقى يدخل اتحاد الكوره الصراع الجهنمى مع التليفزيون على اذاعه المباريات ودا يقول من حقى ودا يقول من حقى - طز فى المشاهدين مش مشكله هما مين اللى بيتفرجوا ماهم الناس اللى احنا بنضحك عليهم مش مشكله المهم الإعلانات وفى الاخر اتحاد الكورة يقول مش حنزيع مباراه السوبر ال يعنى مباراه بين ريال مدريد وبرشلونه .
يااصدقائى العشوائية الرياضيه ممكن يتكتب فيها كتب ولكن اين الإحتراف بقى اللى بيقولوا عليه فين ميزانيات الاندية فين العقود النموذجية للاعبين فين اللاعبين اساسا اللى بيتشدقوا ويقولوا اللاعب لازم ينام بدرى علشان صحته تلاقى طالع مذيع فى قناه فضائية مستضيف لاعب على الهواء الساعه 12 باليل .
عموما انا بس حبيت اضع يديكم على مهزله الريلضه فى مصر علشان بس نصحى شويه المليارات التى صرفت على لاعبى الكورة والنوادى والإغتراف دا شعبنا المسكين كان اولى به اللى يدفع فى لاعب 7 مليون جنيه دا ربنا حيحاسبه حسابا عسيرا وهو يملك هذا المبلغ ولايستغله مثلا فى بناء مساكن للفقراء او مستشفيات او اى مشروعات ترفع من مستوى الناس اللى هو بيكسب منهم اصلا
ياناس رئيس كوريا الجنوبيه اتبرع بثروته بالكامل للفقراء - حد يعرف دى - وبيل جيتس نفسه ساب شغله وبيعمل لصالح الخدمة الإجتماعية - وبعدين تقولوا حضارة ؟؟؟
على راى الهتاف الشهير فى الكورة نختم بيه الكلام دا ونقول " كفاية حراااااااام"

الاثنين، 13 يوليو، 2009

الغربه - بس المره دى مش غربتى

الغربه موضوع اعتقد أن كثير من الأصدقاء قد يرون انى قد تناولاه فى قصائد كثيره وكلام كثير قد يجعل البعض يمل من هذا الموضوع ولكن انا اتناول هذا الموضوع هذه المرة مش غربتى انا ولكن غربتنا كلنا مع انفسنا ومع اوطاننا .
ومادفعنى للكتابه مجداا انى قد وجدت بعضا من المدونين يتناولون هذا الموضوع ولكن يمكن بصورة اكثر قسوة مما تناولته انا ولهذا فانى اليوم لن اتكلم عن الغربه ولكنى سأحلل لماذا الغربه ؟ وهل الغربه هى فقط ان تترك اهلك ووطنك وتسافر بعيدا ام ان الغربه قد تكون فى الوطن ذاته بل وفى المنزل ويمكن فى حجرتى الصغيره ؟
دعونا لانسترسل فى كلام مسهب قد يطول ويتوه منا المعنى والغرض ولهذا سأحلل لكم فى نقاط من وجهة نظرى طبعا لما اصبحنا جميعا نشعر بشعور الوحده والغربه
1- غياب القدوة سواء داخل المنزل او خارج المنزل وبما يعنى انفصال الفرد عن الهدف او بمعنى اشد شمولا عدم وجود هدف فى حياه الأنسان يعنى ( لو نجحت ايه اللى حيزيد عليه ولاحاجة / لو اشتغلت ايه برضه الفايده استنى اخر الشهر قرشين واخلى اللى يسوى واللى مايسواش يتحكم فيه وليه ؟/يعنى افضل اشقى واتعب وغيرى بيلهف الملايين بلا حاسب ولاضابط يحاسبه ) امثله عما يجول بخاطر البعض .
2- طغيان المشاكل الماديه وانشغال الناس بلقمة العيش كما يقولون كرس معها تراخى الروابط الإجتماعيه ثم رويدا رويدا انسحاب من الحياه الإجتماعية المحيطه واخيرا العيش فى جزيره منعزله وهى من البيت للشغل ومن الشغل للبيت طيب فين الأهل فين الأصدقاء فين الجيران كل واحد فى حاله مشغول بهمه وهم عياله .
3- عدم توافر وسائل الترفيه التى تجمع شمل الأسر مثل الماضى كان زمان الناس بتتجمع فى بيوت بعض علشان يسمعوا ام كلثوم سهره تمتد بالساعات الرجال حول الراديو يسمعون والنساء كذلك ويأكلون سويا وينسجمون مع آهات سيده الغناء اليوم حيتلموا حوالين مين تامر حسنى دا اقصى اغنيه ليه 3 دقائق وبعدين النفس بيقطع يبقى الفن اصبح مثل ساندوتش الهامبورجر الخفيف يملى البطن دون افاده .
4- انتشار القنوات الفضائية بصورة عشوائيه وتمثليات وافلام وبرامج هايفه وبرامج هامه وناس بتشتم بعض وناس بتغنى على بعض وبتغنى علينا مما جعل كل افراد الأسره المتوسطه حتى بيكون عنده تليفزيون فى حجرته اللى غاوى كوره يفتح قناه رياضيه واللى غاوى افلام يفتح قناه افلام وهكذا يبقى البيت الواحد فيه3 تلفزيون كل واحد على حاجة مفيش نقطة تجمع للأسره عكس زمان الاسره كلها حوالين تليفزيون واحد قناه واحده برنامج واحد بيلم الناس مع بعض.
5- انتشار الانترنت ايضا ساهم فى تكريس الغربه والوحده ممكن تلاقى الواحد يمكن بيفتح الأنترنت والى من 12 الى 14 ساعه فى اليوم لوحده طبعا لن اتكلم عن ماذا يشاهدون فليست الأنترنت شيطان فقط بل ايضا ملاك ولكن مااقصده انها جذبت الشباب بعيدا عن المجتمع الأسرى المحيط
6- وعلى صعيد اخر فكما ان قلة الموارد والفقر تشكل بعدا هاما فى هذا الأمر نجد ايضا الغنى ولاسيما فىى المجتمعات ذات الدخول المرتفعه ومع انفصال شبابها عن القدوه والهدف بحيث انهم يشعرون ان تلك البلاد ماهى الا ماعون نقدى فقط دون روابط دون هدف مجرد دوله فيها نخبه حاكمة وكثرة محكومين لايوجد رابط بينهم هؤلاء فى وادى والاخرون فى وادى اذا اين الأنتماء وبالتالى نجد شباب هذه الدول لا اقول يفتقد الأنتماء وانما اقول يبحث عن الانتماء فهو يحب بلده نعم ولكنه لايعرف كيف يترجم هذا الحب الى عمل فلاهدف ولا احد يمسك بيده لتحقيق الهدف .
هذا فى رأى على وجه العموم سبب الغربه النفسيه ليس فى مصر فقط ولا الدول العربية فقط وانما فى العالم اجمع ستجد ذات المشاكل وذات الوحده تجلس على مقهى فى شارع ايجوار رود فى لندن( على سبيل المثال وانا هنا اقصد هذا الشارع تحديدا لانه شارع المصريين والعرب فى لندن ) تجد كل واحد فى حاله منضده فيها 4 كراسى يجلس عليها واحد فقط
اما وامتنا العربيه فحالها حال فرغم وجود اهداف يجب ان تتحقق واحلام لم نسعى لتحقيقها وروابط ووشائج تجعلنا نفترض ان هذا المفروض لايحدث الا ان الوضع لايختلف كثيرا فلاهدف وطنى او قومى يجمعنا
وكفايه كده بقى عليكوا والى لقاء شعرى قريب باذن الله

الأحد، 12 يوليو، 2009

كالقعقاع افعل - شعر حلمنتيشى


القعقاع بن ميسوم الهيثمى خاطب حبيبته موؤومة السبيانية فقال


وتفشحط الفشحاط فى غسق الدجا حتى كاد من فرط جماليه ان يتكلما


وانت ياحبيبتى كبدر الصبا


ألم يأن للبدر أن للناس ينظرا ؟


فردت موؤمة السبيانيه قائلة وهى تنظر للقعقاع من العلا


كيف ياقعقاع تريد البدر للناس ينظرا


الا تعلم ان البدر فى سماه يُبتغا


ولا يرنو الى الأرض ابدا


والناس دوما تنظر له فى العلا


وهكذا


انت ياحياتى تفعلين معى كما قالت موؤومة وأنا مازلت كالقعقاع أفعلٌ

الجمعة، 10 يوليو، 2009

كانت ايام

وكانت أيام

تملئ قلبى بالأحزان

ترسم فى نفسى الأشجان

تدنو من وتقول

شمس حبك فى أفول

وأضطرب عقلى المسكين

وأختلج القلب الحزين

وفاض النهر بالأنين

فياقلبى لاتحزن

فماعاد الحب يجدى

ولاالشعر أصبح بالرسول

فماذا يمكن أن يقول

أمام صراعات العقول

فالحب الصادق مهزوم

والشعر أصبح مرجوم

فاليوم فقد الأنسان

كل صفات الأنسان

أصبح يعانى الحرمان

قد يدنو من الأنهار

ويرنو من الأشجار

يقترب من الأخطار

فلا يجد القرار

فاليوم ياقلبى لاتبالى

فماعاد شئ يُرجى بالأمانى

وفقد الأنسان الرفيق

والحب والصديق

وحبك الذى تاه

قد يأتى يوم وتنساه

وتذكر أيام الماضى

وتشدو باللحن الهادى

وترسم على جذوع الأشجار

كل تلك الأشعار

الأربعاء، 8 يوليو، 2009

فى قضية مقتل الدكتورة مروه -كلاكيت ثانى مره

نعم هى المرة الثانيه التى اكتب فيها فى هذه القضية ذلك ان الأمر لواقع ليس فقط ان أمرأة مسلمه قتلت بيد رجل مجنون متعصب ولكن لأن القضية اكبر من ذلك فأنا أتذكر حينما ثارت ثائرة العالم الإسلامى من المحاضرة التى ألقاها البابا بيندكت السادس عشر بابا الفاتيكان وماجاء فى هذه المحاضرة من اساءة الى الدين الإسلامى ورسوله الكريم وتعددت الأراء بين محلل لتلك الأقوال بصورة يبدو فيها العقلانية وبين ردود أفعال ثائرة تطالب البابا بالإعتذار تارة أو سحب ماقاله تارة أخرى وإجتمعت تلك الأراء فى النهاية الى أن حوار الأديان قد أنهار الى غير رجعة .
لقد تناول أستاذنا العوا أمين عام المؤتمر الأسلامى العالمى فى حواره مع مذيعتنا القديرة منى الشاذلى مقدمة برنامج بعد العاشرة أن الإعتذار لايكفى ويجب سحب ماقاله البابا وتناول سيادته بالتحليل الجميل الأسباب التى دعت البابا لما قاله وانه استخدم ورقه الهجوم على الإسلام كورقه رابحه لجذب تعاطف الحكومة الأمريكية نحو الكنسية الكاثوليكيه الأمريكية.

ولكن ألم نتسائل نحن المسلمون فى كل مكان تساؤلاً هاماً ألا وهو من منا المسئول عما أصابنا ؟ ولكنى سأبدأ ماأكتبه ببيت شعر قد يفسر الرأى التالى له

هّنا على أنفسنـــــــــــا حتى صار الهوان فينا فنونـــــــــــــــــــا

وبات كل ذى جهل يرى أن هوان المسلمين أصبح قانونــــــــــــا


لقد ثارت ثائرة المسلمون أيضاً حينما قام بعض مدعى الصحافة فى الدول الغربية بنشر رسوم مسيئة الى رسولنا الكريم وقد تجلت هذه الثورة فى المقاطعة الإقتصادية لمنتجات تلك الدول وهو مأسفر عن خسائر اقتصادية فادحة لتلك الدول وأجبرت تلك الخسائر الى العودة بتقديم الأعتذار ، ولكن الى متى نتقبل الخطأ ثم الإعتذار أن هذه الأحداث تذكرنى بمقولة فنانا الراحل فؤاد المهندس فى إحدى مسرياحته الخالدة " سك على بناتك " حينما قال " أحسس وأعتذر " إن الإعتذار من تلك الجهات لم يُبن عن قناعه بجسامة الخطأ بل بنى على أساس اننا سنتقبل الإعتذار وسنعتبره انتصار وينتهى الأمر ولكن بعد أن خرجت الطلقة من فوهه المسدس وأصابت ماأصابت !

ولكنى أرى ( إن جاز ان يكون لى رؤيه ) أن هذا الأمر لابد وأن يكون له حداً فاصلاً حتى لايتكرر فلابد وأن ندفع تلك الدول الى إحترام المقدسات الدينية بكل أشكالها وذلك من خلال استخدام مافى أيدينا من أدوات وانا أعنى هنا وبوضح قاطع لالبس فيه السلاح الإقتصادى كورقة ضغط لدفع دول العالم الى الضغط على الامم المتحدة لأستصدار قرار بمعاقبة كل من يمس المقدسات الدينية كمجرم حرب فلماذا دائما نحاكم مجرمى الحرب على جرائمهم بعد اتمامها وانتهائها ألا يجب ايضاً ان يحاكم من يحاول اشعال نيران الحرب كمجرم حرب ؟ لماذا دائما نتحرك بعد وقوع الجريمة ولانتحرك لمنعها

لقد صرح الرئيس الأمريكى السابق جورج بوش فى إحدى خطبه أنه يجب القضاء على الفاشية الإسلامية ولم يتحرك العالم الإسلامى ساكنا

أن قراءة الأحداث تذكرنى بالطالب الذى لايستذكر دروسه ثم يشكو من صعوبة الأمتحان ويلقى باللوم على الممتحن او المراقب أو حرارة الجو ويتبنى نظرية المؤامرة أو أى سبب عدا السبب الرئيسى ألا وهو أنه لم يقم بواجبه ولم يذاكر دروسه .

ألم يحن منا نحن المسلمون أن نحافظ على ثروات وهبها لنا الخالق فى أراضينا ثم ألم يأت الوقت الذى يجب أن نحسب ميزان القوى الإسلامية إعتماداً على قوة الله مع الحق " ان الله يدافع عن الذين آمنوا " .

قد يرى البعض أن ماأقوله هو درب من الخيال ولكن لماذا دائما نقول نعم ونوافق على مايطرح علينا من حلول أتت من غيرنا .

ألم يحن الوقت دوماً أن نعبد الله حقاً حتى لاينطبق علينا قول الشاعر عبد الرحمن يوسف

نـَقـــُـــولُ : " أرْوَاحُـنــَـــا لله خـَالِـصَــــــــة ٌ "
و أغـْـلـَـبُ الـنـَّـاس ِ لـلـزِّنـْـدِيـق ِ قــَـدْ سَـجَــدُوا !

نـَقــُــولُ : " يَـــا رَبـَّنـَـــا ثـَبـِّـــتْ عَـزَائِـمَـنـَــا "
لـكِــــنْ فـَرَائِـصُـنـَـــا لـلـوَغــْـــدِ تـَرْتـَعِــــدُ ! ! !


اصدقائى الاعزاء

شكرا لزيارتكم لمدونتى تمنياتى ان تحوز إعجابكم دائما واتمنى المزيد من تعليقاتكم سواء من يتفق معى فى الرأى أو يختلف وطبقا للمقولة المشهورة شكرا لمن قال نعم وشكرررررررا لمن قال لا ( والحدق يفهم )