الثلاثاء، 19 أكتوبر، 2010

بعد العودة من كوريا

اصدقائى الأعزاء لم اجد بعد زيارة كوريا غير هذه الكلمات واتمنى ان تعبر بصدق عما يجول فى خاطرى :

دواكى يامصر صحوة ضمير
من كل راجل من كل ست
من كل واحد كبير او صغير
من كل عامل فى اقصى قريه بيشتغل غفير
او من اعلى منصب من مدير حتى الامير
دواكى يامصر صحوة ضمير
محدش يقولى الناس كتير
دى ثروة عايزة واحد عليكى يابلدنا يغير
دواكى يامصر صحوة ضمير
بلدنا للاسف هما نوعين
واحد بيشتكى من الغلا وفى الفقر واقع اسير
وواحد ثروته تملا زكايب
وتسأله يقولك برضه فقير
دواكى يامصر صحوة ضمير

هذه الكلمات كتبتها على عجالة وامتى ؟ عندما بدأت الطائرة فى الإقلاع الى الجو والكل جالس فى مقعدة رابط الحزام فاذا بى اقوم من الكرسى وافك الحزام وانا اسمع صوت المضيفة ترجونى بالجلوس بس كنت عايز اجيب ورقة اكتب عليها الكلمات دى علشان منسهاش

الخميس، 14 أكتوبر، 2010

احييكم من كوريا

اصدقائى الأعزاء احييكم من كوريا الجنوبية حيث الساعة الأن الرابعة وعشر دقائق مساء اى التاسعة صباحا فى مصر واول ماافتكر كلمة كوريا افتكر على طول فيلم محمد هنيدى فى عسكر فى المعسكر وصديقة خاله الست كوريا !!! ولكن طبعا مع الفارق فكوريا التى انا فيها بلد جميل لن اتحدث عن النظافة لان كل البلاد التى سافرتها شرقا وغربا وشمالا وجنوبا نظيفة لدرجة انى مش عارف عندنا فى مصر الحكومة هى اللى غلطانة ولا الشعب ولا هى ثقافة نظافة ؟؟؟؟
الشئ الغريب ان كوريا بلد السيارات الدايو لايوجد بها سيارة دايو يعنى بقالى ثلاثة ايام لم ار طيف الدايو ولكن طبعا الهيونداى متوفرة بكثرة ولكن باشكال غير اللى عندنا مش عارف ليه ؟؟؟؟
الشعب الكورى الجنوبى شعب جميل وطيب جدا ومتعاون بشكل كبير وادب جم ولكن الشئ الوحيد الذى فى صالحنا معهم اذا عقدنا مقارنه ان مفيش هنا غير اللغة الكورية صعب جدا ان أحد يتعلم اى لغة اخرى وبالتالى التوهان هنا عجب وطبعا لاعارف اقرأ ولا اتكلم وماشية هنا بالبركة ؟؟
البلد غالية جدا يعنى فى مصر اسعار الألكترونيات عموما ارخص ودا شئ غريب برضه بس مستوى معيشى جامد جدا ودا اللى مخلينى استغرب ازاى كوريا مصفة دوله نامية يعنى احنا والست كوريا نفس المستوى على موائد المفاوضات وهوامش الإجتماعات مش حاجة غريبة برضه !!!!!!!!!!!
طبعا فارق التوقيت يجعل من الصعب النوم ولذلك جفانى النوم على راى الست ام كلثوم

الاثنين، 4 أكتوبر، 2010

بدون عنوان

طبعا انا زهقت من الكتابة عن مايحدث فينا فى كل مباراه لكرة القدم بيننا وبين اى فريق عربى مره نضرب فى بلدهم ومرة فى السودان والأنكى اننا نتضرب فى بلدنا والأمن بيتفرج اعمالا لمقوله اسد على وعلى الغريب فراشة مش حتى قطه لاننا محصلناش القطه ودا بيفكرنى بمقولة الفنان عادل امام قعد يقلع هدومه واحنا قاعدين بس بقى الأية اتقلبت واصبح العرب هم من يقلعونا هدومنا واحنا ساكتين !!! انا لو بصراحة مكان اى راجل اهلاوى ولو انى مبحبش النادى الاهلى لكنت نزلت ضرب واجرت شوية بلطجية من بتوع الإنتخابات ونزلت ضرب وتقطيع وتقتيل فى هذه الزمره القذرة وبلاها كاس افريقيا او كاس العالم اللى حيخلينا يتمسح بكرامتنا الأرض ببلاش وكنت بجد روحتهم مكسوحين على نقالات ومش عايز كاس افريقيا ياسيدى طز فى افريقيا كلها لو حتيجى على كرامتى .
سؤال اخير بمناسبة لقاء السيد رئيس الجمهورية بالمثقفين الا هو تعريف المثقف ايه فى بلدنا ؟؟؟؟

اصدقائى الاعزاء

شكرا لزيارتكم لمدونتى تمنياتى ان تحوز إعجابكم دائما واتمنى المزيد من تعليقاتكم سواء من يتفق معى فى الرأى أو يختلف وطبقا للمقولة المشهورة شكرا لمن قال نعم وشكرررررررا لمن قال لا ( والحدق يفهم )