- نبدأ بالتساؤل المطروح فى اخر الجزء الأول أين المجنون الذى كان ينظم المرور فى المعادى؟ بجد مفتقدينه
- الدكتور / محمد البرادعى - تابعت جزء كبير من حوارة الراقى مع منى الشاذلى فى برنامج العاشرة مساء - نعم هو رجل راق فى كلامه جميل فى أهدافه وأحلامه والتى اراها احلام الكثيرين ولكن التساؤل المطروح كم هم الكثيرون الذين يحلمون مثلما يحلم هو ؟ ففى حوار مع احد المواطنين فى التقرير الذى عرضه البرنامج هل تعرف من هو الدكتور البرادعى ؟ فأجاب المواطن "طبعا مش هو اللى اخد جايزة الأيزو ؟؟؟!!!!! " أشفق على البرادعى بعد التعامل الراقى فى بلاد الدانوب الأزرق وليالى الانس فى فينا دى فيينا روضه من الجنه الى ارض الواقع فى بلاد النيل والعشوائيات ؟!!! أتمنى ان يكون الحلم على قدر مشكلات الواقع .
- نادى الزمالك والذى يراه البعض الفريق القادم من بعيد زحفا نحو المنافسة على قمة الدورى وبصفتى زملكاوى واقعى ارى هذا الحلم كحلم الدكتور البرادعى فى التغيير !!!
- صحيح هو ايه اخر اخبار المشكلة التى ثارت بين الكابتن شوبير والسيد / مرتضى منصور ؟؟؟ مهاترات ومشاحنات وفضائيات اثارت الجميع وتوقع البعض سقوط حلم شوبير أقصد احلامه بين براثن مرتضى منصور ثم ........ لاشئ ؟؟؟
- الطبيب السابق علاء صادق هو فعلا الذى يزحف حثيثا وبصورة قويه جدا نحو الفوز بكراهية الجماهير .
- دوما نسمع عن مشكلة الدعم وماهو الأفضل العينى ام النقدى ام خليط بينهما ؟؟؟ فيارجال ونساء الإقتصاد لماذا دوما من خمسين سنه لانجد سوى هاذين الحلين ؟ هناك حلول اخرى وجذريه ومفيده وتعطى الدعم لمستحقية الفعليين بل ويزيد من رقعة الإستفادة ليس فقط للمدعومين بل ايضا الى السلع المدعومه وهو حل بسيط احتفظ به لنفسى كحق ملكية فكريه واللى عايز يعرف الحل يسألنى .
- واخيرا اصدقائى الذين شاركونى يوم السبت الماضى فى الجلسه الفكريه مع الأستاذه منى - تمتعت جدا بالحوار معكم جميعا واكتسبت صداقات جديده اتمنى لها الدوام وتمنياتى بدوام المقابلات والجلسات والمناقشات
هناك 8 تعليقات:
بس أحلى حاجة أنك عارف أن الزمالك من ضمن الأحلام :) شفت الحقد الأهلاوى - ممكن تبعت لى الحل فى الايميل وأقسم أنى أحتفظ به سرا - ولما تعرف أى تحديث عن المهاترات قول لى - وبعدين ياسيدى خلى الشعب يعيش فى الاحلام يومين ويعدوا - أنا الى أشكرك على اللقاء الجميل والشباب كلها كانت معجبة بحضرتك وأرائك - اللهم دمها علينا نعمة يارب
شوفى بالنسبة للزمالك انا صادق جدا مع نفسى زى بالظبط اللى بيشجع الإتحاد السكندرى اهو بيشجعة وهو عارف انه مش حيكسب بطوله
بالنسبة لمشكلة الدعم حبعتلك على الميل فكرة الحل ويمكن والله تضيفى ليها شئ ويبقى حل كويس
يااااااااااه ايه الغيبة دى
حمدالله على سلامتك بخصوص البرادعى بجد راجل راقى جدا بس المواطن المصرى اللى خلاه كده تراكم ربع قرن من الزمان
يعنى اكتر من جيل اتدمر ياعزيزى
وحكاية الدعم هو ده دعم اصلالالالا؟
لو اتكلمت هروح فى داهية سيبونى ساكتة احسن
تحياتى حسيت انك عملتلى ريفرش للاحداث
كلامانك دائما معبره و لا اجد أي تعليق أمتر من اللي كتبته
بس مش باين ليه يا رب خير؟
تحياتي
ازيك يامى والله انا مبسوط جدا بشأن متابعتك للمدونه بجد شكرا وشكرا على رايك فيها واتمنى ان يكون البرادعى كما تتمنين
افلح ان صدق
نور
اشكرك على كلماتك الرقيقه
فعلا قراقيش وموافقه حضرتك فى كل النقط الا نقطه البرادعى انا ضد الشخص ده جذريا منها سبب انه ماعاصرش مشاكلنا زي ماحضرتك قلت لكن مش كل الاسباب
ومعاك فى مرتضى منصور وعلاء صادق وبالذات علاء صادق مش ممكن واحد بيحب الخناق بهذه الصوره بجد مش ممكن
جيجي والعالم
جيجى
والله انا برضه لست موافقا او معارضا ولكن بالنسبة لموضوع انه ميعرفش حاجة عننا لانه كان مسافر فاعتقد ان القنوات الفضائية استطاعت ان توصل للجميع مايعانيه كل الناس فى كل العالم المشكلة بقى انى اكون عارف ومش حاسس
إرسال تعليق