الأحد، 2 أغسطس 2009

ايه الخيبه دى

أسمحولى فى البدايه أن اقول ايه الخيبة دى لاعب كرة قدم مصرى يزايد عليه اكبر ناديان فى مصر للوصول بسعرة الى نحو 8 مليون جنيه مبدئيا بالاضافة الى لاعب اخر فوق البيعه ليه معلش انا مع احترامى للناديين فهو صراع ديوك متخلف على لاعب يجلس فى منزله ويمتنع عن التدريب للضغط على ناديه لبيعه يبقى لاعب غير ملتزم وغير محترف يبقى ادفع فيه كل دا ليه بدلا من انى اتبرع بالمبلغ لصالح الفقراء او بلاش الفقراء علشان السادة الأغنياء ميزعلوش اروح افك اللاعب بكام لاعب ناشئ صغير يقدر يلعب كام سنه وبعدين من الاخر اروح اشترى لاعب كورة ليه وبالمبلغ دا ليه دا لو حيجيب كاس العالم برضه حرام حرام عليكوا بقى كفايه استفزاز لمشاعر القراء وبعدين يعنى شريف عبد الفضيل هو دا اللى حيجيب الديب من ديله انا بقول من دلوقتى مبروك للزمالك فلوسك اللى وفرتها وهارد لك لنادى المبادئ على فلوسك اللى خسرتها

هناك 14 تعليقًا:

nor يقول...

يا بس 8 مليون دول حتي ما يجيبولوش شقه 63 متر في بورت مارينا..دي الشقه عدت الرقم ده بكتير وصلت ل 12 مليون اللي علي البحر ..يبقي كده يا عيني هيضطر يجيب شقه جوه مش علي البحر
ربنا يعينه و يعينا
تحياتي

اســ الغربه ـــير يقول...

وربنا انا بلعب كوره كويس خليهم يشترونى بمليون واحد بس علشان اتجوز والنبى


لا مليون ايه خليها نص


اقولك اخر كلام 200000 جنيه هيجوزونى وربنا يلا مافيش عرض احسن من كدا اهو


ههههههههههههههههههه
تحياتى اسير الغربه مشمش

ليس فقيرا من يحب يقول...

احنا بقه كفايه علينا نسمع

الارقام وخلاص

Hesham يقول...

الى نور
خدى بالك برضه الشقة اللى جوه فيها مزايا منها ان مفصلات الشبابيك مبتصديش من البحر يعنى برضه حنوفر تغيير المفصلات سنويا

Hesham يقول...

ياعم اسير الغربة كان غيرك اشطر انا زمان كنت لاعب كرة فى نادى الشمس ودفعتى والله العظيم علاء نبيل كان بيلعب معايا شوف بقى هو فين وانا فين دا نصيب ياباشا وبعدين ايه يعنى لما اخذ 5 مليون جنيه علشان انا لاعب كورة برضه المهم الصحة هاهاها

Hesham يقول...

الى رانيا
لعلمك حتى سمع الأرقام دى بيوجع الودن بلاش حتى تسمعى احسن

غير معرف يقول...

السلام عليكم
عمو هشام
أعجبنى رأيك الصريح بالموضوع
إحنا بنسمع أرقام كبيرة
وده اللى علينا
خالص تقديرى

♥نبع الغرام♥♪≈ يقول...

هههههههههههههه

صباحك سكر ياهشام وحشتنى قوووى والله

والله احنا بنسمع ارقام كبيره قووى ياهشام هما بيجيبو الفلوس دى منين

عااااااااااااااااااااااااااااااا


ربنا يسعدك

تحياتى
انوسه

The illusionist يقول...

هههههههههههههه
والله يا استاذنا
لما الواحد بيسمع كده
بيستغرب
هما دول يستاهلوا اصلا
لاعيبه مصر كلهم بجد
من كتر لعبهم فى الدورى المصرى
مينفعش يسووا المبلغ ده
دول اصلا مش لاعيبه
ده اصلا مش دورى
احنا بنتفرج على قاع دوريات العالم
الا وهو دورى الابطال
الدورى المصرى
بلا خيبه
الدورى العربى كله بلا قيمه
وييجى يقولك
هو احنا مش مشهورين ليه
واللاعيبه كذا وكذا ليه
الفرق تعبانه
ولياقتها تعبانه
وكله تعبان
والمنتخب بتاعنا
والله مع اننا بنكسب وبنعمل ماتشات حلوه
الا ان مستوى الاداء المصرى
ساعات بيرجع لمستواه المعروف
ويبقى مش حلو
وفى الاخر
يجرى الاهلى والزمالك والاسماعيلى على لاعب
تقولش لما ييجى هيعمل فرق
معلش خدتنى الحماسه حبتين
مساء الخير

Hesham يقول...

الى العصفورة
شوفى ياعصفورتى العزيزة المشكلة مش فى الأرقام الكبيره المشكلة فان اللى بيندفع فيه مايستهالش الأرقام دى يعنى لو جابوا مثلا لاعب كبير زى كريسيانو رونالدوا تقوليلى يستاهل طبعا يستاهل لاسباب كتير مش كورة وبس احنا عندنا الأحتراف اسمه الحقيقى انحراف

Hesham يقول...

انوس العزيزة
اللى معاه قرش محيره يجيب حمام ويطيره ولو ان جوز الحمام دلوقتى بالشئ الفلانى

Hesham يقول...

الى الشاب الروسى ( معذرة مش عارف اقرا الأسم) سعدت جدا بزيارتك لى طبعا ان شاء الله حنتبادل الزيارات بس قولى انت احمر ولا ابيض اهلاوى ولا زللكاوى ( على فكرة مكتبتهاش غلط هى المفروض كده من الذل ) صباح الكورة الجميله اللى بنشوفها بره بس

Mona يقول...

يعنى أنت عندك أرق وعندك 100 مشكلة أرحم نفسك شوية من الحقد الطبقى ده على فئة اللعيبة الغلبانة بجد ياهشام اوفر أوفر :)))) وبالمناسبة بيقولك ألهام شاهين رفضت التصريح عن أجرها فى مسلسل رمضان ليه بقى ياسيدى علشان مش حتقدر تقول الرقم علشان لا تستفز الفقراء فى مصر الى مش لاقيين يأكلوا ايه رايك بقى؟؟؟!!! بذمتك فيه حلاوة تبرير وتصريح أحلى من كده - يلا 2 قرص كاليبام بس من ابو 3 مش ا ونصف ووحياتك تبعتى لى زيهم وسلملى على المليون وفيما فوق ده طبعا لو شفتهم :)))))

Hesham يقول...

الى منى
انا قريت تصريح الهام شاهين وطبعا الست عندها دم يعنى برضه بتراعى بس انتى بتقوليلى لو شفت المليون انا حقولك على حاجة مره من ذات المرات دخلت خزينه البنك المركزى - والله العظيم القصه دى حقيقية - فى مامورية كده المهم اول لما دخلت لقيت ياستى خير اللهم ماجعله خير مليارات من الجنيهات فى كراتين كل كرتونه فيها مايون جنيه وبينى وبينك ريحه الفلوس حلوة وخصوصا وهى جديده طبعا والله بجد اصابنى دوار وكاد ان يغشى عليه فعلا جلست على كرتونه من ام مليون علشان الدوخه بس ساعتها حسيت ان الواحد فقرى يعنى لو كسبت مثلا كرتونه ممكن اروح فيها وفى الاخر الحمدلله الذى لايحمد على مكروة سواه وتوته توته فرغت الحندوته فاهمة الحندوته

اصدقائى الاعزاء

شكرا لزيارتكم لمدونتى تمنياتى ان تحوز إعجابكم دائما واتمنى المزيد من تعليقاتكم سواء من يتفق معى فى الرأى أو يختلف وطبقا للمقولة المشهورة شكرا لمن قال نعم وشكرررررررا لمن قال لا ( والحدق يفهم )