كل عام وانتم بخير

اصدقائى الاعزاء بجد وحشتونى جدا وفعلا انا حاسس بفراغ كبير نتيجة عدم انتظامى فى الكتابة الفترة الماضية بس قولت الواحد يحاول يلحق له يومين تلاثه مصيف قبل رمضان وربنا ان شاء الله يوفق الجميع ولكن طبعا هناك بعض الموضوعات التى ارغب فقط فى ان المسها دون الخوض فى التفاصيل .

واول هذه الموضوعات هو موضوع انتخابات مجلس الشعب القادم هل ترون انه سيحدث جديد؟ ام كانك ياأبو زيد ماغزيت سينجح نفس الناس يبقى فى الحالة دى العيب فينا احنا !!!!!!

وثانى موضوع هو موضوع اللاعب جدو الذى قامت الدنيا ولم ولن تقعد بالطبع قرارات اتحاد الكورة تكرس ماسبق ان تناولته فى الماضى من ان النادى الأهلى والحزب الوطنى متطابقان ففى اى دولة تراعى ابسط قواعد القانون فان هذا اللاعب يتم ايقافة وتغريمه بل وتغريم النادى الذى تعاقد معه وزمان ايام ماكان فيه كورة بجد واحترام بجد كان هذا التصرف يستوجب شطب اللاعب من سجلات كورة القدم ولكن نروح فين فى زمن زاهر وشركاه.

ثالث الموضوعات هو رمضان القادم وكم هائل من المسلسلات طبعا الموضوع مش جديد بس المشكله ان الناس دايما تنادى وتقول دا حراام دول بيشغلوا الناس عن العبادة طيب ياجماعة ماالى عايز يصلى يروح يصلى واللى عايز يتعبد يروح يتعبد وهو ماله ومال المسلسل هكذا دائما المصريين نلقى باللوم على غيرنا فى حاله تقصيرنا ال ايه المسلسل هو اللى فوت عليه التراويح !!!!! طيب تشوف المسلسل اصلا ليه !!!؟؟؟

رابع الموضوعات وهو التعليم احنا ياجماعة رايحين فيييييين بجد سواد سواد انا بفكر جديا اعلم ولادى اما الغناء فيضربله شريطين تلاته مع كام كليب ويعيشنا ملوك او يحترف كوره ويتعاقد هنا بمليون وهنا بتلاثه مليون واهو برضه ولادى مش حينسونى برضه اما انى ادفع الألاف للتعليم وفى الاخر يطلع عاطل يبقى مين فينا المجنون بقى ؟؟؟
وكل عام وانتم بخير مع الياميش واللوز والجوز والفستق والبندق وقمر الدين واطايب الديوك الرومى ولحم الغزال ......... فى الاحلام