الجمعة، 26 يونيو 2009

قضايا ساخنه - الاخ محمد الملاح

صديقى العزيز سعدت جدا بمرورك على مدونتى المتواضعة ليس فقط لاهتمامك بالعديد من الإصدارات وتعليقك عليها ولكن ايضا لكونى اشعر اننى اكتسبت صديقا جديدا عزيزا سندا لى فى هذه الغربة الموحشه
سابدا اولا بالرد على موضوع الديمقراطية
فلتعلم ياصديقى ان الديمقراطية مفهوم غربى نعم ولكنه يعتد اساسا على فصل الدين عن الدوله او بمعنى اخر ان الحاكم انما هو رجل عادى اختاره الشعب لقيادة الدوله ويجوز محاسبته وعزله ايضا ان لزم الامر وذلك عكس النظم العربية التى يضفى بعضها نوعا من القدسية الدينية على الحاكم من منطلق الاية الكريمة " واطيعوا الله واطيعوا الرسول واولى الامر منكم " وانا هنا سأقتبس جزء من كتابى الذى بصدد ان انشره قريبا يفسر هذا الأمر

وإذا نظرنا الى مفهوم السلطة أو الرئاسة أو الخلافه بين المنظور الإسلامى والمنظور الغربى نجد إختلافاً جوهرياً ليس فقط فى الممارسة الفعلية للسلطة وأنما أيضاً فى اسلوب إختيار الحاكم .

فعندما توفى رسول الله صلى الله عليه وسلم وجد المسلمون أنفسهم يواجهون ولأول مره مثل هذا الموقف فقد مات القائد وهو ليس قائداً سياسياً فقط بل مُنشأ الحضارة والدولة وأختلف الناس فى البداية مابين مصدق للحدث ومكذب له غير مصدق الى أن تلى أبو بكر الصديق " ومامحمد إلا رسول قد خلت من قبله الرسل أفإن مات أو قتل إنقلبتم على أعقابكم"

وهنا فقط أدرك المسلمون أن عليهم الإختيار للحاكم الجديد وكانت ثقيفة بنى سعد مكان التجمع والإختيار وقام المجتمعون بإختيار أبو بكر الصديق خليفة لرسول الله (ص) حاكماً وإماماً ثم أجتمع الناس للمبايعة والموافقة على هذا الإختيار وقد كان هذا الإختيار والموافقة عليه من قبل المسلمون لانهم يعرفون مكانة أبى بكر الصديق عند الرسول (ص) وبالتالى فأنهم اعتبروا ان إختيار أبو بكر للخلافة انما هو إستمرار لطاعة الرسول (ص) وحتى حينما شارف الخليفة على الموت قام بترشيح عمر بن الخطاب للخلافة من بعده.

وهكذا إذا نظرنا الى هذه الآلية فى الأختيار فأننا نجد أن الخليفة يتم إختياره من الحاكم السابق ثم تتم المبايعة له على الطاعه من قبل جمــوع المسلمين ( لاحظ أن هذا النظام مستمر فى العالم الأسلامى حتى الأن فعندما توفى جمال عبد الناصر وصدم الناس فى ذلك فانهم إختاروا أنور السادات لانه الخليفة الذى إختاره الرئيس الراحل وهكذا

أيضا فعندما إغتيل السادات إختار الناس الرئيس مبارك لانه إختيار السلف أى يمكن القول ان إختيار الحاكم فى الأسلام يشبه نظام الإستفتاء الحالى .

وهذا النظام يختلف جذرياً عن اسلوب إختيار الحاكم فى النظم الغربية أو مايطلق عليها النظم الديمقراطية فيأتى إختيار الحاكم من قبّل الجماعة مباشره دون ترشيح من الحاكم السابق أى أن الحاكم السابق ليس له علاقة بإختيار الحاكم الحالى بل أن الحاكم الحالى قد يأتى والحاكم السابق على قيد الحياه أى أن إنتقال السلطة من شخص لأخر لايرتبط بوفاة الحاكم وهو أيضا مايختلف عن النظم الشرقية .

وقد يأتى هذا الإختلاف فى منظور إختيار الحاكم الى أن هذا الحاكم فى منظور الحضارة الإسلامية يُحاط به نوعاً من القدسية أى أن الحاكم فى النظام الإسلامى يرتبط من قريب أو من بعيد بصورة مباشرة أو غير مباشره ولكنه يرتبط بمفهوم الخليفة الدينى أى أنه الراعى فى الإسلام ويعتبر العامة أن طاعة الحاكم من طاعة الله عز وجل ( وأطيعوا الله وأطيعوا الرسول وآولى الأمر منكم ).

وبالتالى وحتى بدون مايتم من تزوير فى الإنتخابات أو مايطلق عليه تزييف إرادة الشعب فأنه حتى بدون هذا التزييف ففى كل مرة يخوض فيها الحاكم العربى آية إنتخابات فانه حتما سينتصر على خصومه ولكن الإختلاف هنا فى نسبه ماسيحصل عليه من أصوات المؤيدين والتى بلا شك وبدون أية جهود ستتعدى النسبة المطلوبة للإستمرار فى الحكم لانه وكما سبق أن قلنا فان الحاكم هنا هو من أمر الله بطاعته .

أما مااثرته فى موضوع عدو عدوى والخاص بالصراع الفلسطسنى الفلسطينى فانا هنا اقول لك من واقع الممارسه الفعليه والدراسة النظرية فى الإقتصاد نعم مصر من اغنى دول العالم ( إن حسٌن توظيف مواردها ) وحسن استخادم الموارد هنا اعنيه بمفهومه الشامل ولكنى اطرح عليك مجموعه اسئلة فى هذا الصدد اين زعماء فتح وحماس ؟؟؟ من أنقذ خالد مشعل من التسمم ومن ارسل له الترياق؟؟؟ سيدى الفاضل الجهاد ليس فقط ان اشهر السلاح فى وجه عدوى ولكنه ايضا ان احسن التفكير والتدبر فى امرى وان اتحد مع اعوانى ورفقائى لنصر قضيتنا اما ان نتصارع على السلطة والعدو جاثم على صدورنا فهذا هو الغباء السياسيى الذى تتحدث عنه ثم هل كانت كامب ديفيد هى التى عطلت القضية الفلسطينية ؟ طيب لو لم تكن هناك كامب ديفيد هل يمكنك ان تضع لى تصورا ماكان سيحدث ؟؟ انه سيناريو الحروب المتكررة التى لن تأتى لنا بنصر ولكن بدمار وموت الالاف اخرى من الشهداء بلا طائل سوى مجد الزعماء فقط اما الجندى البسيط فهو من يموت بلا معنى وهذا ماقاله صلاح الدين لقلب الاسد فى فيلم الناص صلاح الدين " ان الحرب لديك ياملك الأنجليز هى المجد والهتاف باسمك ولكنها لدى الجندى البسيط هى الحياة نفسها
هل نعلم ياصديقى ان زعماء الفلسطنين لايريدون اصلا للمشكلة ان تحل اتعلم لماذا ؟ لانهم يستمدون وجودهم اصلا من تفاقم هذه المشكله فلك ان تتصور ان تم حل المشكلة الفلسطينية اذا سيكون التغيير هنا واجبا كما قالها ليندون جونسون أن كما ان الفشل يقتضى التغيير فان النجاح ايضا يقتضى التغيير ذلك ان النجاح يولد ظروفا جديده تقتضى مؤسسات جديده واجراءات مختلفة .
انك ياصديقى لم تجرب القناع الواقى من الغاز حينما ترتديه لمده ساعة واحده على وجهك ماذا يفعل ؟ التهابات قويه والام تعصف بك فمابالك وانت ترتدية يوما كاملا خوفا من ضربة غاز سام انا جربت هذا الشعور فى حرب تحرير الكويت حرارة قائظة وحياه عنيفه بينما رجال اعمالنا فى التكييف وزعمائنا يحاربون بالحناجر فقط ولهذا ياصديقى انا مؤيد لكامب ديفيد لانى ذقت مرارة الحرب



هناك 11 تعليقًا:

محمد الملاح يقول...

استاذ هشام اد ايه انا مبسوط بكلام حضرتك عني وصداقتك حضرتك شئ يشرفني بكل تأكيد, اولا اقولك صح النوم ويارب تكون نمت كويس :), مبدئيا فصل الدين عن الدولة هو تعريف العلمانية يا استاذ هشام وهو بكل تأكيد منافي بل مضاد للاسلام, يعني العلمانية اللي ظهرت في اوروبا نتيجة سيطرة الكنيسة علي الحكم والبشاعات اللي كانت بترتكب باسم ربنا والمسيح صلي الله عليه وسلم والكنيسة خلت الناس تشمئز ان صح التعبير من الكنيسة وتدخلاتها في الحياة السياسية, بالنسبة للشوري بقي المسلمين ماختاروش سيدنا ابو بكر لمكانته عند الرسول صلي الله عليه وسلم والا كانوا اختاروا سيدنا علي كرم الله وجهه صهره وابن عمه صلس الله عليه وسلم المسلمين اختاروا سيدنا ابو بكر لانه كان اكثر الناس استحقاقا لخلافة رسول الله صلي الله عليه وسلم وهو اللي ما فارقش الرسول الكريم صلي الله عليه وسلم في اي وقت من اوقات النبوة, غير كده سيدنا ابو بكر ماكانش راضي ببيعة المسلمين له وانما وافق عليها من باب الالتزام بالنسبة بقي لجزئية راجل عادي انا ماشوفتش راجل زي سيدنا ابو بكر اول خليفة لرسول الله وبالمكانة اللي حضرتك ذكرتها عند الرسول صلي الله عليه وسلم وعند كافة المسلمين وهو واحد من العشرة المبشرين بالجنة يقول للناس اطيعوني ما اطعت الله ورسوله فان عصيت الله ورسوله فلا طاعة لي عليكم وهو ده سر تمييز الشوري والنظام الاسلامي عن الديموقراطية وهي مثلا زي ما ذكرت لحضرتك الديموقراطية ليها مميزات لكن ليها عيوب قاتلة ذكرت بعضها لحضرتك في التعليق علي الموضوع, لكن القاعدة الاسلامية اللي بتقول لا طاعة لمخلوق في معصية الخالق هي دي اللي بتحجم اي حاكم وهي دي اللي بتوضح اد ايه ان الحاكم ده مش اله ولا بيعبر عن ارادة الاله لكن هو شخص بيحكم بشريعة ربنا ان اجتهد واصاب فله اجر وان اجتهد واخطأ فله اجران, الجزئية التانية لما مات سيدنا ابو بكر زكي سيدنا عمر للمسلمين هو ما كانش ليه انه يفرض عليهم او يملي عليهم اي شئ تبعا لقاعدة الشوري اللي عمل بيها سيدنا محمد صلي الله عليه وسلم خصوصا ان سيدنا محمد ص ما قالش مين يخلفه يبقي ازاي سيدنا ابو بكر يقول او يامر المسلمين بحد يخلفه هو بس رشح او زكي سيدنا عمر للمنصب وان كان رأيه مش الزامي للمسلمين (طاعة ولي الامر مقيدة بطاعته لربنا ورسوله) الجز التاني من الرسالة اللي فيه مقارنة حضرتك للانظمة السياسية العربية بالنظام الاسلامي وده مش حقيقي يا استاذ هشام؟؟؟؟! اختيار الشعب للسادات ( مش الشعب اللي اختار بس ما علينا مش موضوعنا) كان بواقع منصبه كنائب لرئيس الجمهورية واللي بيقوم بمحله في غيابه وحاجات كتير كده بيحكمها الدستور(الوضعي) اللي هو بعيد كل البعد عن التشريع الاسلامي اللهم الا فيما يختص بقوانين الاحوال الشخصية, مفيش نظام حكم في اي دولة عربية او اسلامية يتوافق مع الشريعة الاسلامية يا استاذ هشام, انا مش عارف حضرتك شبهت ده بده ازاي, بس علي العموم نظام الشوري بيقول بالظبط ان اللي بيختار الحاكم هو من قبل الجماعة من ويحق للحاكم السابق ترشيح شخص بعينه وان كان ترشيحه مش الزامي, بس بجد بجد انا مش متخيل ان حضرتك متصور ان في حد انتخب عبد الناصر او السادات او مبارك ضد خصومهم, النس دي ما تعرفش انتخابات

Unknown يقول...

ولا استفتاءات لسبب بسيط جدا ان السواد الاعظم من الشعب المصري مقاطع لتمثيلية الانتخابات دي ومش من النهارده ولا امبارح ده من زمان وبعدين معلش مصر ما اتحكمتش بديموقراطية غير في شهور حكم اللواء محمد نجيب الله يرحمه, علي كل انا مش متخيل ان عبد الناصر والسادات ومبارك مسكوا الحكم تطبيقا لنظام اسلامي,
بالنسبة لموضوع عدو عدوي انا عارف طبعا اد ايه مصر دولة ربنا حباها بموارد مش محدودة, لكن حضرتك قولتها وطيتها بين قوسين (ان حسن توظيف مواردها) امتي بقي خسن توظيف موارد مصر من بعد محمد علي لحد النهارده؟؟؟؟
سيدي الفاضل زعماء حماس وقادة فتح وخالد مشعل لا يعنوني في شئ انا يهمني فلسطين وماتنساش حضرتك ان الفوضي دي ما حصلتش غير بعد اغتيال الشيخ احمد ياسين والدكتور عبد العزيز الرنتيسي لكن فعلا حركة حماس قامت بكذا محاولة لرأب الصدع بين حركة فتح وحماس منها اطلاق سراح معتقلين ودعوة غير مشروطة للوفاق وكل ده لم يجد اذانا صاغية ليه من حركة فتح طول عمر حركة فتح ختي من ايام ياسر عرفات وهي بتعترف بدولة اسرائيل بعد مؤتمر اوسلو وده اللي رفضته حركة حماس بقيادة الشيخ ياسين ومع ذلك كانوا الحركتين علي وفاق مع بعضهم حتي لو اختلفوا في الطريق لكن هدفهم كان واحد علي اي حال كامب ديفيد عطلت القضية الفلسطينية باعترافها بدولة اسرائيل يا استاذ هشام انا مش عشان خايف علي شبابنا اقبل باستيطان واحتلال ارضي والا ان ماكانش الناس دي هتستشهد وهي بتحاول تدافع عن ارضها ودينها ومقدساتها يبقي هيستشهدوا امتي؟؟؟؟ مافيش وجه مقارنة بين فيلم الناصر صلاح الدين وموقف ريتشارد وصلاح الدين ووضه فلسطين احمد مظهر في الفيلم كان بيحرر القدس وكلامه كله كان اعتراض علي محاولة تزييف موقف ريتشارد وأطماعه باحتلال القدس كلام حضرتك ينفع يتقال لليهود اللي لو خايفين علي دمهم ودم ولادهم يسيبوا ارضنا والا هندفنهم فيها علي الاقل لو مش قادرين دلوقتي يبقي مانلومش علي ناس بتحاول تعمل حاجة احنا مش عارفين نعملها انا مش هسأل نفسي الراجل اللي شايل سلاح ده مين بيحميه وقاعد فين واهدافه الخفية انا مالي طول مانا مش قادر اوصل هناك واشيل سلاح وادافع عن ارضي وديني ومقدساتي يبقي خلاص ماتكلمش علي اللي قادر يعمل كده ويلات الحرب ماتبررش الاستسلام يا استاذ هشام وقد قال الله عز وجل بسم الله الرحمن الرحيم
(ولا تهنوا في ابتغاء القوم ان تكونوا تالمون فانهم يالمون كما تالمون وترجون من الله ما لا يرجون وكان الله عليما حكيما) صدق الله العظيم
وفي النهاية دي انا بشكر حضرتك علي الرد وبعتذر منك علي التطويل ده كله :) اشوفك علي خير ومستني ردك :)

Hesham يقول...

استاذ محمد
اولا انا سعيد باختلاف الرأى معك وسعيد اكثر بحماسك للقضية الفلسطنية والدفاع عنها ولكن اسمح لى طالما ان الحوار قد تطرق لابعاد اخرى فارجو منك ان يتسع صدرك للرد وكما انا دائما اقول ان الخلاف فى الراى لايفسد للود قضية ,
ارجو منك الإجابة على هذه الأسئلة
1- لماذا مصر ؟ دائما وابداً تتحدثون عن مصر لماذا هى من يجب ان تتحمل تبعات القضية بينما الاخرون اما فى ثروات البترول ينعمون او بالتنمية الإقتصادية هم عازمون مثل المغرب مثلا ؟
عندما زار الرئيس مبارك امريكا منذ نحو عشر سنوات او اكثر اجتمع بالمغتربين العرب فى امريكا وفوجئ بهجوم عنيف عليه لماذا لاتفتح الحدود للجهاد سيتدفق الألالاف من المتطوعين ومالى ذلك من هذا الكلام ماذا فعل مبارك ؟
قال لسكرتيره احضر ورقه وقلم وخد اسامى الناس اللى عايزة تتطوع من هنا وحنخادهم معانا فى الطيارة ونوديهم سيناء يحاربوا وطبعا لم يتقدم احد لانهم ببساطه مجاهدين الكلام - الكلام وبس
2- لماذا لم تجب على سؤالى المطروح اين يعيش خالد مشعل - انه فى فندق اميه فى دمشق - فايف ستار - حيث السيمون فيميه ياعزيزى والتكييف المركزى مش فى المخميات حيث الضرب والجهاد
3- لقد قال الله تعالى ولا تلقوا بايديكم الى التهلكه ياسيدى فويلات الحرب نعم لاتبرر الأستسلام ولكن ان استطعت تجنب ويلاتها فهذا افضل - وأن جنحوا للسلم فاجنح لها وتوكل على الله - ماذا قدم لى الأخوة فى العروبه عندما تم تدمير جيش مصر بل ماذا قدموا ونحن نبنى هذا الجيش مرة اخرى وحاربنا وانتصرنا لاشئ
4- سيدى العزيز تخيل معى لو ان العرب قاموا فجأة بالوحده الإقتصادية كما فعل الأوربيون ليس سلاحا وحربا بل وحده اقتصادية هل سيكون لاسرائيل وجود ؟ اشك فى ذلك ان استردإاد الحق ليس فقط بالحرب بل السياسة والإقتصاد هما الأساس فى هذا الموضوع وانت للأسف مستسلم سياسيا ومنهوب اقتصاديا وكلنا شعبا وحكومه مسئولين عن هذا العيب ليس حكومه فقط بل العيب كمان فى الشعوب ( هذا بعض ماكتبته عن مايجرى فى الوطن )

ياصديقى أنها ليست مشكلات انه الفساد الذى أزكم أنوف العالمين
لقد سرق الكبار منا كل مانملك وأصبحنا شعب من المساكين
ولم يكتف الشعب بذلك فقام هو الأخر بالسرقة والنهب ونهش لحم هذا الوطن الحزين
وضج كل شريف وتعالت فينا أصوات الانين

Hesham يقول...

استاذ محمد الملاح
لقد فهمتنى خطأ ياصديقى معذرة انا لم اكتب ماكتبته لاقول انى مع الديمقراطية او ضدها انا فقط سردت لك ماهى الديمقراطية والفرق بينها وبين الشورى ثم انك تتكلم من الواقع النظرى فقط وانا اتناول دائما أراءى من الناحية العمليه نعم سيدنا ابو بكر قال للناس كما قلت قومونى ان وجدتم فى اعوجاجا ولكن هل هذا يحدث فى الواقع حاليا ؟؟؟؟ ياسيدى دعك من احلام الخيال ولنعد على ارض الواقع وهو ماقلته ان مجرد قرب سيدنا ابو بكر من الرسول (ص) لهو كاف جدا للناس ان يجعلوة اماما ومجرد تزكيه ( ترشيح يعنى باللغة الحديثه ) سيدنا ابو بكر لعمر بن الخطاب لهو كاف ايضا لتوليه السلطه ومااشبه الليله بالبارحة كما حدث مع السادات ومبارك قارن المواقف ياملاح مش الأفراد لانه لا وجه للمقارنه بين هؤلاء وهؤلاء ولكن الموقف واحد وهو مايؤكد ماطرحته ان مجرد طرح اسم الخليفه من الحاكم لهو كاف عند العرب لاختياره
لانه من الظلم البين المقارنه بين سيدنا عمر فاروق الأسلام وبين السادات او عبد الناصر او مبارك او غيرهم ولكن عد معى ياصديقى الى اصدار كنت قد كتبته تحت اسم جناب المدير الغالى وعند قراءته تأكد انك ستفهم مااعنيه ان التاريخ هو الحكم بيننا

محمد الملاح يقول...

انا سعيد اكتر بالنقاش مع حضرتك يا استاذ هشام
صدقني يا استاذ هشام انا مش بتكلم علي مصر بصفة خاصة انا بتكلم علي مصر لاني عايش في مصر واقرب بلد ليها انا مش هعمل زي واحد زي حسن نصر الله عايش في بلد وبتكلم وبعيب علي بلد تاني خالص وبعدين انا عايز انبه حضرتك لحاجة في حالة وجود كارثتين في بلد من البلاد الاسلامية البلد الاقرب ليا هي الاولي بانضمامي ليها لحد ما تتحل مشكلتها يعني بصفة عمة مصر والدول المحيطة بفلسطين اولي الناس بمساعدتها وده طبعا ما يسقطش واجب الجهاد عن بقيت الناس وبقية الدول وبرضه انا عايز انبه حضرتك لاننا مش بنحارب او بنجاهد عشان فلسطين او الفلسطينيين يا عم لو البلاد التانية بينعموا بثروات البترول والتنمية الاقتصادية وغيره انا راجل يشرفني ويكفيني اني اموت وانا بجاهد في سبيل الله وفي سبيل مقدساتنا وارضنا واهلنا وعرضنا يا سيد هشام بغض النظر عن ان الناس التانية عايشة حياتها وغرقانة في العسل, انا شخصيا مايلزمنيش الحوارات دي كلها, وبعدين ازاي الناس تقول اشمعني مصر وليه مصر ونرجع نتكلم علي تراجع دور مصر ومكانتها الدولية والاقليمية ماهو بسبب السياسات دي مع اختلافي الكامل مع سياسات عبد الناصر وطريقة تفكيره وقناعاته وافكاره بس تعالي نبص علي وضع مصر الاقليمي سواء عربي او افريقي او وضعها الاسلامي او وضعها دوليا بعد انضمامها لدول عدم الانحياز وقارن بينها وبين مصر المهمشة بسبب كامب ديفيد والله يخليك ماتقوليش العرب سعوا بعد كده لسلام مع اسرائيل وان هما اللي بيتحايلوا علي اسرائيل لان انا مش موافق علي كده, انا ماليش دعوة بمجاهدين الكلام يا استاذ هشام انا ليا دعوة بس بان الارض دي بتاعتنا وانها عمرها ما هترجع من غير الجهاد وان كان اقامة وطن قومي لليهود اللي كان من قبيل احلام اليقظة بالنسبة لهم تم واتحول لواقع فتفكيك الكيان الغصب ده اسهل بكتير من اقامته محتاجين بس ايمان وارجوك ماتقوليش الترسانة النووية وامريكا احنا لما بنحارب مش بنحارب بعدة وعتاد احنا بنحارب بايمان ويقين باحدي الحسنيين اما النصر او الشهادة وفي نفس الوقت كامب ديفيد كانت قايمة علي اساس اعتراف الفلسطينيين باسرائيل كدولة وده ما ينفعش حتي لو دول العالم كله اعترفت بيها وحتي لو مصر وغيرها من الدول العربية والاسلامية للاسف اعترفوا بيها ده مش هيغير من الوضع شئ لا تفريط في شبر من ارض فلسطين ولو عايزين يقيموا وطن قومي لليهود يروحوا يرموا بلاويهم علي حد تاني دول ناس ربنا حكم عليهم بالذلة والمسكنة والتيه في الارض لو الاحتلال السرائيلي لفلسطين استمر 61 سنة فالاحتلال البريطاني لمصر استمر 74 سنة وطول مدة الاستعمار مش مبرر لشرعيته يا استاذ هشام
جزئية خالد مشعل عايش فين انا جاوبت علي حضرتك لما قولت خالد مشعل وغيره لا يعنوني في شئ انا يعنيني عدم اعترافه باسرائيل نيته بقي واللي في قلبه ربنا مطلع عليه مش احنا
ربنا قال (ولا تلقوا بايديكم الي التهلكة) بي قال برضه (كتب عليكم القتال وهو كره لكم) بس الجهاد مش تهلكة يا استاذ هشام ومفيش مسلم علي وش الارض نفسه مش بتحدثه بالجهاد ولا تلقوا بايديكم الي التهلكة مكانها مش الجهاد بالاضافة ان ربنا سبحانه وتعالي قال (وان جنحوا للسلم فاجنح لها) ماقالش اجنحوا انتم للسلم والعياذ بالله ماقالش روحوا تل ابيب واخطبوا قدام العالم ومثلوا قدام الكاميرات الاخبارية قد ايه انتوا مسالمين وتقاسموا مع الارهابيين جايزة نوبل للسلام وحطوا ايدكوا في ايد اليهود وهي ملوثة بدم اخواتكم العرب قدموا ايه لا قدموا يا استاذ هشام سواء بعد النكسة او وقت حرب اكتوبر قدموا بس احنا بقينا عاملين زي القطط بناكل وننكر طبعا احنا مش محتاجين من حد حاجة موارد بلدنا تعيشنا ملوك ومصر كانت في يوم من الايام سلة غلال الارض لكن ده مش معناه اننا نعترف بالجميل لحد وقف جنبنا
انا طبعا ماقصدش حضرتك انا اقصد الحملة الاعلامية الرسمية اللي معظم شعبنا ضحية ليها, استاذ هشام اقرب وقت في العصر الحديث كان ممكن اقامة وحدة عربية واسلامية كان بعد حرب اكتوبر مباشرة مع الدعم اللي اخدناه من دول الخليج واحساسهم بالامن بوجود دولة قوية بتحمي مصالهم في المنطقة وبتربطهم بيها جذور دينية وتاريخية ولغوية, ايوة هما كل اللي يهمهم حماية مصالهم وصدقني كان اكرملنا واكرملهم ان احنا اللي نحمي مصالهم عن ان امريكا اللي تحميهم صدقني كلنا مشتركين في الوزر ده احنا وهما شعوب وحكومات زي ما حضرتك تفضلت ويبقي في الاخر الايمان هو حجر الاساس للوحدة وغيرها الاسلام هو الحل رغم اني مش اخوان مسلمين :)

محمد الملاح يقول...

سيدنا ابو بكر قال اطيعوني ما اطعت الله ورسوله فان عصيت الله ورسوله فلا طاعة لي عليكم وده مش بيحصل دلوقتي بس فين وجه التشابه بين اللي بيحصل دلوقتي وايام الخلفاء الراشدين؟؟؟؟ لا يا فندم قرب سيدنا ابو بكر لوحده مش كفاية لان كان فيه كتير من عظماء الصحابة رضوان الله وسلامه عليهم مقربين من الرسول صلي الله عليه وسلم القصة ان الصحابة والمسلمين اجتمعوا عليه وفقا لاحكام الشوري واجتمعوا لمبايعته وقد كان الرسول صلي الله عليه وسلم ما الزمش المسلمين بسيدنا ابو بكر وكمان تزكية سيدنا ابو بكر ما كانش ليها معني لولا ان سيدنا عمر كان قاضي المدينة وكان لو صح التسمية مستشار لسيدنا ابو بكر والراجل اللي لقبه الرسول صلي الله عليه وسلم بالفاروق لانه فرق بين الحق والباطل القصة ان المسلمين اجتمعوا علي اختيار ابو بكر ثم عمر ثم عثمان ثم علي رضوان الله عليهم اجمعين برضه انا مش شايف وجه مقارنة للموقف السادات كالن نائب رئيس الجمهورية وطبقا للدستور بيستفتي الشعب علي نائب الرئيس بعد وفاة الرئيس الحالي وان رفض الشعب بيحصل انتخابات نزيهة (ما علينا) وبيختار الشعب واحد بالاقتراع اللي حصل ان مجلس قيادة الثورة اتفقوا علي تولية السادات باعتباره اضعف راجل بينهم ويقدروا يتحكموا فيه واللي حصل بعد اغتيال السادات استفتاء علي حسني مبارك ونجح في الاستفتاء وبقي رئيس الجمهورية قولي بقي فين وجه المقارنة؟ وبعدين معلش ان كان جمال عبد الناصر ولا السادات ولا مبارك دول ولاد انقلاب عسكري ترزح البلد تحت الحكم العسكري بسببه بقالها اكتر من نص قرن ايه وجه المقارنة بين الاتنين؟ انا ماليش دعوة باشخاص انا بقارن بين شرعية حكم الصحابة واتفاق المسلمين عليهم وعدم شرعية حكم حرامية العسكر الناس في مصر وقت سيدنا موسي مش هما النس وقت الخلفاء الراشدين وبالذات سيدنا ابو بكر وعمر كان اغلبهم شاف الرسول صلي الله عليه وسلم وتأدب بسنة الرسول كان فيه منافقين انا معاك بس كان اغلبهم مسلمين تلقوا اسلامهم وتربيتهم من اول وجديد علي ايد الرسول صلي الله عليه وسلم وحكمهم من بعده خلفاؤه الراشدين
انا برضه مش شايف ايه وجه اعتراضك علي نظام الشوري :)

Hesham يقول...

الاخ العزيز محمد الملاح
شوف ياصديقى حكاية ان البلد اللى جنبى هى الاولى فى الدفاع معلش بقولك راجع الخريطه ستجد ان فيه كمان سوريا والعراق والسعودية ( مش حجيب سيرة لبنان طبعا ) هما كمان ليهم حدود مشتركة مع فلسطين يعنى مش مصر بس طيب هما عملوا ايه بقى اما حكاية الموت فى سبيل المقدسات الإسلامية فمعك حق فيها طبعا بس الكل هنا بينظر للقضية على انها قضية سياسية فى الاساس اما المقارنة بين وضع مصر الإقليمى وتراجع الدور معلش بقى مش من العقل ولا المنطق ولا الدين حتى انى اترك بلدى تعانى وشعبها يموت ويدمر علشان احارب لناس تانيين والمشكلة انهم اصلا مش منتبهين لقضيتهم وعمالين يضربوا بعض يعنى انا اوافقك لو انهم متحدين ومش قادرين اما انهم سايبين قضيتهم الاساسية ويتصارعون على السلطة يااخى دا المثل بيقول انا وابن عمى على الغريب لا هما بقى على بعض مش على الغريب .
اما موضوع الترسانه النووية فانا لم اذكرها ولن اذكرها لانها كلام فى الهوا وعسكريا وحتى مناخيا لايمكن ان يتم استخدام اسلحة نووية فى حروب العرب مع اسرائيل لان اسرائيل ايضا ستتأثر سلبيا وبقوة لو هى استخدمن النووى ( عرض مساحة اسرائيل 9 كيلو متر فقط )
ثم انى لابرر شرعية الإستعمار انا فقط اريد ان يكون الحصول على الحق بقوة مش بالكلام ومقصد القوة هنا هى القوة الشاملة اقتصاديا واجتماعيا وسياسيا ثم عسكريا وانظر الى اليابان وانت تعرف مقصدى ليس بالحرب وحدها احصل على حقى والصراع خدعة والحرب خدعة .
اما مسألة انه كتب عليكم القتال وهو كره لكم نعم صحيح وانا معك ولكن علينا نحن ان نختار التوقيت المناسب مش يالله ياجماعه ههههههه حنحارب لا المواضيع دى ليها اصول وليها ترتيبات مش خناقة صعايده فى قهوة .
انا اريد منك ان تعمل خيالك وتطرح لى سيناريو محدد وواضح سيناريو متخيل منك سأعطى لك مفاتيحه
1- لم يتم التوقيع على اتفاقية كامب ديفيد
2- كيف كان سيبقى الحال
3- هل كانت القوى الدولية ستسمح لنا باسترداد باقى الارض
4- موازين القوى الدولية والإقليمية العسكرية فى هذه الفترة وحتى الان هل كانت ستسمح لك بالحرب ؟
انا اتكلم هنا عن سيناريو وفقا للأوضاع الفعليه على الأرض يعنى الناس هما الناس متجبليش ملايكه وتقولى هما اللى حيحاربو والمقصود بالعبارة اننا على ارض الواقع يجب ان نصلح من انفسنا اولا ان نتقرب الى الله كى ينصرنا ياصديقى العزيز المسلمون جميعا اخرجوا الله سبحانه وتعالى من معادلة القوى الشاملة فاصبحنا كما الفرنجة نعتمد على العوامل المادية فقط وهم طبعا متفوقين فيها اما ان كنا نحن المسلمون نعطى الله حقه ( لانكذب / لانسرق / لانزنى ) او بمعنى ادق نطبق اول خمس آيات كريمات من سوة البقرة ( راجعها وقولى ) اذا كنا نحن كما جاء فى هذه الآيات هل كنا سننهزم ؟؟ ابدا بل كان سيبقى النصر المبين اما والحال كما الحال فلله سبحانه وتعالى يحب اذا عمل احدكم ( لم يقل المسلم او المؤمن خطابه للناس جميعا ) أن يتقنه والغرب اتقن ادواته وبالتالى ستجد المسلم قد يرسب فى امتحان ينجح فيه الملحد لماذا ؟ لانه اخذ بالأسباب نحن تواكلنا ولم نتوكل نحن الذين افشلنا انفسنا بأيدينا ثم بعد ذلك تقول الجهاد ؟ الجهاد له اساليبه وعناصرة ويبدا بجهاد النفس وهو الجهاد الاكبر كما قال رسولنا الحبيب وبالتالى وفى ظل المعايير المادية التى اخترناها نحن يجب ان نأخذ بالاسباب
وبالتالى فنحن لم ناخد بأسباب الدنيا او حتى الدين ثم بعد ذلك تقول الجهاد فلنصلح من انفسنا اولا ثم نقول جهاد اتدرى لماذا انهزم المسلمون فى احد وفيهم رسول الله ؟؟ لانهم ابتعدوا عن طاعته كقائد حربى فى هذه الغزوة وبالتالى وبما ان الإسلام دين عقل فانهزموا لان الله اراد ان يلقنهم درسا ان عدم الاخذ بالاسباب خطأ كبير واعتقد ان عباس ابو مازن او خالد مشعل ليسوا بافضل من رسول الله عند الله فكيف ينصرهم وهم اصلا مختلفون
سيدى انظر الى الامور بواقعيه شديده بعيدا عن الاقوال التى تنادى اصوات وهى مختبئة بين طيات شرائح السيمون فيميه
صدقنى انا اعتبر ان الدولة الإسلامية الحقه بدات مع رسول الله (ص) وانتهت بمقتل عثمان ابن عفان على ايدى مسلمون مثله وكل مالحق بعد ذلك هى دول دنيويه بصبغة دينيه بداية من الامويين ( باستثناء فترة عمر بن عبد العزيز ) وانتهاء بالعثمانيين وهو الإستثناء الذى يثبت القاعدة
ولنا عودة اخرى باذن الله

Hesham يقول...

إلحاق الى محمد الملاح
اما بعد اولا انا لما ذكرت لك قصة سيدنا موسى تناولتها من منظور اخر تماما انت لم تفهمنى ولهذا اقول لك ان حماسك الشديد قد غلب على التأنى عندك انا حينما ذكرت عن لسان استاذى احمد بهجت قصة سيدنا موسى اردت ان اوضح اسقاطا رمزيا الى سلبية الشعب المصرى منذ الالاف السنين فهم رأو الحق البين وكان امامهم فرصة ذهبية لاسقاط فرعون فهم الجموع وهم الأكثرية ولكن لم يتحركوا ليس المقصود المقارنة بين الناس فى هذا الزمن او ذاك هذا من ناحية
ومن ناحية اخرى من قال لك اننى ضد نظام الشورى ؟؟؟ انما اقول لك ان لكل شئ ادواته ولكل نظام حيثياته التى ينجح من خلالها فلا تقل لى ان نظام الشورى يمكن ان ينجح الأن والأرض ليست ممهدة له واعتقد فى ردى السابق شرحت لك ماهى هذه الأرضية ( الخمس آيات لأولى من سورة البقرة ) فعندما يكون المجتمع هؤلاء الناس فلنطبق الشورى لان الناس ساعتها حتفهم وتعرف تطبق ازاى متجيش مثلا تقول اصل بابا كان لعيب كورة كويس يبقى انا اروح العب فى الأهلى علشان بابا كان بيلعب فى الاهلى وانت ليس لديك مقومات لاعب الكورة
اذا لابد من توافر المقومات الأول علشان اكون زى اسلافى اكون مجتمع كما كان فى عهد الرسول (ص) مش مجرد انى مسلم النهاردة يبقى ينفع اى حاجة ومش معنى انى اكون مجتمع زى اسلافى انى ارجع اعيش فى خيمة - علشان بس متفهمنيش غلط - المقصود مجتمع اخلاقى مجتمع - حب لأخيك ماتحب لنفسك -ان الله يحب ان عمل احدكم عملا ان يتقنه - من غشنا فليس منا - مازال جبريل يوصينى بالجار حتى ظننت انه سيورثه - الراشى والمرتشى فى النار - اظن السؤال هنا هل اى مجتمع اسلامى تجتمع فيه هذه الصفات حاليا ؟؟؟ سؤال ارجو الإجابة عنه انا لم اذكر مجتمع صلاه وزكاه انما مجتمع معاملات اما بقى المجتمعات الغربية وللأسف كما قال الأمام محمد عبده فهم اناس مسلمون بلا اسلام نعم لقد عشت فى الخارج نحو 4 سنوات ووجدت الامانه والشرف والصدق ووو هى القيم السائدة والتى كانت السبب فى نجاحهم
صديقى العزيز ليس بالصوت فقط يكون النجاح المجتمع اخلاق ومعاملات اولا - واوعى هنا تقولى اصل اخلاق الغرب فيها وفيها وانحرافات وبورنو اقولك اذا كان دا موجود عندهم علنا فهو اكثر واشد عندنا خفاءَ ويمكن كمان دلوقتى بقى علنى لانه ماهو الفرق بين فيلم مثلا دكان شحاته وغيرة ومايعرض فى الغرب ؟ حتقولى الغرب فيه اكتر حقولك معلش وهنا برضه وشوف على اليونيوب حتلاقى بلاوى
صدقنى اذاكر اولا لكى انجح اما انى ادخل الامتحان ولم اذاكر واقول انا اصلى دعيت ربنا ينجحنى لا حتسقط لانك مش اعز عند الله من سيد الخلق الذى كابد وعانى فى رحلة الهجرة والله كان كفيل بان ينقله كما كان فى الأسراء والمعراج ديننا دين عمل مش كلام

محمد الملاح يقول...

ازيك يا استاذ هشام
انا عارف طبعا ان فيه دول تانية ليها حدود مع فلسطين وماعملوش حاجة, بس وبعدين؟ ده مبرر ان احنا كمان مانعملش حاجة؟؟؟؟ تاني حاجة حبيت اكلم حضرتك فيها قضية فلسطين عمرها ما كانت ولا هتكون قضية سياسية يا استاذ هشام ده اعتداء علي ارض اسلامية وممارسة ابشع انواع المذابح مع اهلها المسلمين وهدم مقدساتها وتهويد مدنها وعلي راسها القدس طبعا, فين السياسة في كده؟ طيب حضرتك قولت في معرض كلامك ان مش من العقل ولا المنطق انك تسيب شعبك يعاني ويتدمر عشان تحارب لناس تانية صدقني يا استاذ هشام شعبنا بيعاني وبيتدمر في كل الاحوال بس انا ليا تحفظ علي جزئية الحرب لناس تانية دي, احنا مش بنحارب عشان الفلسطينيين احنا اصلا بنحارب في سبيل ربنا, لاحظ ان الوضع اللي هما فيه ده نتيجة تخلي الدول العربية من مصر والاردن وغيرها عنهم لقوا نفسهم لوحدهم قدام العدو الصهيوني ومع خبرة سياسية مضمحلة ( ده في تقديري طبعا) انا عايز انبه حضرتك ان حركة فتح وحماس مختلفين في الرؤية والمنهج من ايام مؤتمر اوسلو ويمكن من قبلها ومع ذلك كان فيه قيادات حكيمة وواعية بتمنع الفوضي بين الفريقين ورغم ان حماس عمرها ما اتخلت عن موقفها بعدم الاعتراف بدولة الكيان الصهيوني او حق العودة او غيره الا انها عمرها ما دخلت في صراع مع حركة فتح اللي زعيمها قال مرة في تونس "لو قامت دولة فلسطين ساجعلها دولة علمانية" علي كل الصراع الحاصل دلوقتي احنا مش ابرياء منه احنا العالم العربي والاسلامي كله مش بس مصر وان كانت مصر بدات بالفرقة, انا يا فندم ما قصدتش الا ان احنا ناخد حقنا بقوة انا ما قصدتش ان يلا يا جماعة هنجاهد يلا بينا وبتاع :) حضرتك فهمتني غلط وان كان ربنا قال كتب عليكم القتال وهو كره لكم فقال كمان واعدوا لهم ما استطعتم من قوة ومن رباط الخيل ترهبون به عدو الله وعدوكم, طيب يعني الجهاد محتاج تجهيز روح معنوية واخلاقية ودينية وبرضه تجهيز مادي ممثل في معدات واسلحة, طيب القوة الاقتصادية والاجتماعية والسياسية دي اتوفرت في ايد السادات بعد حرب اكتوبر, اول مرة تتاح للعرب فرص الوحدة الحقيقية بس اخدها السادات ورمي بيها عرض الحائط, حضرتك عايز سيناريو اوك هدي حضرتك السيناريو,
لم يتم التوقيع علي اتفاقية كامب ديفيد كانت
1- الحال كان هيبقي كالاتي وحدة فيدرالية او خليني مابقاش متفائل اوي ونقول وحدة كونفيدرالية بين الدول العربية وزيها مع الدول الافريقية اللي كان لمصر ايامها علاقات قوية جدا بيها
2-ازالة دولة اسرائيل من الوجود او في اسوأ الاحوال حصرها في شريط ضيق ومنعها من اقامة مستوطنات دنست بيها ارض فلسطين ومنع المستوطنين اليهود من كل دول العالم من الهجرة لفلسطين باعتبارها مش امنة عليهم واللي كان هيفرض عليهم وجود ديموجرافي مضمحل
3- ما كانش هيبقي فيه العدد الرهيب ده من مدمني ومتعاطي المخدرات وكان هيبقي فيه مشروع قومي يستوعب طاقاتهم
4- ماكانش هيبقي فيه مسخرة وهزلة التطبيع
5- ما كانتش ثروات مصر اللي حضرتك بتتكلم عنها تتباع لاسرائيل باقل من سعر استخراجها ما كانش الاسمنت والحديد هيتباع لاسرائيل عشان تبني جدار عازل ولا عشان تبقي حتي سور لبيت, مواردنا حرام عليهم هما بالذات يا استاذ هشام, ما علينا
6- كانت هتتوفرلنا القوة الاقتصادية والاجتماعية والسياسية اللي حضرتك اتكلمت عنها
7- كان هيبقي عندنا صناعة حقيقية للاسلحة وكان هيكون فيه اكتفاء ذاتي في كل حاجة
8- بالنسبة بقي للقوي الدولية بشكل او باخر القوي الدولية يهمها مصانع السلاح بتاعتها تشتغل زي ما حضرتك ذكرت في موضوع صراع الحضارات وبعدين كان مين اللي ممكن يمنعنا يا استاذ هشام بعد استخدام البترول كسلاح لاول مرة وتوقف ماكينات المصانع في الدول الاوروبية؟ ده معناه العكس تماما انك بشكل او باخر كنت هتاخد دعم وتأييد دوليين حتي لو كان مدفوع الاجر مش مطلوب منهم يأيدوا الحق طبعا
9- امريكا نفسها اقصي حاجة عملتها هي مد اسرائيل بالجسر الجوي واحدث اسلحة, طيب دي القوي الدولية
10- اي قوي اقليمية يا استاذ هشام؟ ايران ولا تركيا لاحظ ان في حالة ايران كان في علاقة قوية نوعا ما بين السادات والشاه, وتركيا ما كانتش هتتدخل في الموضوع من قريب او بعيد,

محمد الملاح يقول...

انا مش بجيبلك ملايكة يا استاذ هشام انا بكلمك عن بشر, بشر ومجتمع نسبة الجريمة بقدرة قادر بقت صفر وقت الحرب؟ ازاي حضرتك تقول انهم خرجوا ربنا من معادلة القوي, جايز دلوقتي ماشي, لكن الناس اللي كانوا عايشين قبل الاتفاقية اللي حضرتك بتدافع عنها مختلفة تماما عن الناس اللي حضرتك بتشوفهم وتسمع عنهم دلوقتي, بس بصفة عامة للناس اللي موجودين دلوقتي حضرتك عندك حق طبعا بس برضه الكلام عن احنا مالنا ودول ناس بدل ما يبقوا زي المثل الشعبي ما بيقول ويبقوا هما وان اختلفوا مع بعض علي الغريب لا ده هما بيضربوا في بعض يبقي نسيبهم يولعوا ببعض والقضية دي قضية سياسية بالمقام الاول والكلام ده كله مش هو اللي هيخلي الناس ترجع لدينها وتدخل ربنا في معادلة القوي يا استاذ هشام
انا حافظ طبعا الايات اللي حضرتك بتتكلم عنها ومتفق معاك تماما في رايك انا برضه ما قولتش ان احنا نجمع نفسنا ونروح نحارب وعارف ان الجهاد محتاج تجيزات وترتيبات بس خالد مشعل عمل حاجة وحضرتك شايف انه غلط طيب احنا عملنا ايه؟؟؟؟ هو خالد مشعل بس هو اللي مسلم؟ واحنا دورنا اننا نقعد ننقد او نصفق ؟ ده مش ماتش كورة يا استاذ هشام, دي ارض ومقدسات ودم مسلمين, واحنا مسلمين يا استاذ هشام
الواقعية معناها اني اني اشوف الوضع الحالي واعمل اللي اقدر عليه عشان اغيره, غير كده تبقي سلبية الواقعية مش معناها اني اشوف اسرائيل جاثمة علي ارض ومقدسات المسلمين واشوف اليهود بيقتلوا في اخواتنا المسلمين واقول خلاص بقي انا هعمل ايه يعني واتفرج علي الاخبار شوية وادخل انام ولا كأن حاجة حصلت, مش هو ده الحل يا استاذ هشام
انا طبعا مختلف مع حضرتك في جزئية الدولة الاسلامية وانتهائها مع مقتل عثمان بن عفان رضي الله عنه وارضاه لان في دول كتير قامت في مملكة خوارزم والاندلس وكل مكان في العالم الاسلامي وجد فيها الحاكم العادل والحاكم الفاسد ووجد فيها العالم الحق الذي لا يخشي في الحق لومة لائم والعالم الفاسد اللي يعلم ويكتم علمه ولك مني جزيل الشكر ومنتظر عودتك ان شاء الله :)

Unknown يقول...

انا اسف يا استاذ هشام انا فعلا ما فهمتش حضرتك تقصد ايه سامحني, سلبية الشعب المصري واي شعب في الدنيا حاجة طبيعية في ظل وجود حاكم بيأله نفسه في كل الاحوال المصريين دول هما الجند اللي بقيادة قطز قضوا علي الخطر المغولي وكسروا شوكتهم لاول مرة في التاريخ وهما اللي كانوا عاملين زي العصار لا يبقي ولا يذر وهما اللي قاموا بحرب اكتوبر وحضرتك قارئ تاريخ اكتر مني ممكن تورد امثلة كتير علي كده المعيار هو مين اللي بيحكم قولي مين بيحكم وقولي خلفيته الثقافية والدينية ايه اقولك الشعب في ظل حكمه عامل ازاي طيب يا استاذ هشام انا مع حضرتك تماما في جزئية ان الشوري والنظام الاسلامي بصفة عامة لازم يطبق علي ناس معينة ان كنا احنا بنصلي ونزكي ونصوم وما الي ذلك بس فين المعاملات الاسلامية انا مع حضرتك بس لو خلق المعاملات الانسانية في الاسلام مش موجود عندنا نوجده وننشره بين الناس ولا نقبل باي نظم جاية لنا من الغرب وخلاص؟ احنا بنستسهل :) المقومات دي يا استاذ هشام نوجدها ازاي؟ انا عجبني اوي من كام سنة لما اتقدم الاخوان بمشروع حزب كانوا قالوا في بنود الحزب اللي هما هيعملوه ده انهم هيطبقوا النظام الاسلامي كله بس قبل كده هيكون فيه هترة انتقاليه عشان المجتمع الحالي ما ينفعش يطبق فيه لا شوري ولا حدود ولا اي حاجة بس برضه المفروض نعمل ايه؟؟؟
اكيد انا عارف ان بره مفيش فرق بين البلاد الغربية ةبيننا الا انهم بيعملوا اللي هما عايزينه في النور

اصدقائى الاعزاء

شكرا لزيارتكم لمدونتى تمنياتى ان تحوز إعجابكم دائما واتمنى المزيد من تعليقاتكم سواء من يتفق معى فى الرأى أو يختلف وطبقا للمقولة المشهورة شكرا لمن قال نعم وشكرررررررا لمن قال لا ( والحدق يفهم )